ESAEA 32

₁Bonang, khosi e tla busa,

e buse ka ho loka,

mahosana a eona a buse ka toka.

₂Khosi ka 'ngoe e tla ka lephèphè

ha moea o puka,

e ke setšabelo nakong ea sefefo,

e ke nōkana tsa metsi lehoatateng,

e ke moriti oa lefika

naheng e omeletseng.

₃Mahlo a ba bonang a ke ke a fifala,

tsebe tsa ba utloang li tla mamela.

₄Ba kelello li tatang

ba tla tseba, ba utloisise,

maleme a mahoelea a rarolohe,

a bue hantle.

₅Sethoto se ke ke sa hlola

se bitsoa khosana,

kapa senokoane

sa hlompheha haholo;

₆hobane sethoto se bua bothoto,

le ho nahana se nahana tse khopo:

Se etsa tse khopo,

se bua tsa bohata ka Molimo;

ba lapileng ha se ke se ba fepa,

ba nyoriloeng se ba tima metsi.

₇Mekhoa ea senokoane e mebe,

kamehla se rera merero e khopo,

ho timetsa mafutsana

ka polelo tsa mashano,

leha thapeli ea bahloki

e nepahetse.

₈Empa ea khabane

o rera merero e khabane,

bokhabaneng ba hae

a ke ke a sisinngoa.

₉Lōna basali ba iketlileng,

tsohang le mamele lentsoe la ka!

Lōna baroetsana ba itšepileng,

mamelang seo ke se bolelang!

₁₀Etlare hoba selemo se feta-fete,

lōna basali ba iketlileng

le tla thōthōmela;

morara o kotuloang o tla ba sieo,

le litholoana

li ke ke tsa e-ba teng.

₁₁Thōthōmelang,

lōna basali ba iketlileng!

Tlakaselang,

lōna baroetsana ba itšepileng!

Hlobolang aparo tsa lōna,

itlameng matheka ka tse mahoashe!

₁₂Llelang masimo a lōna

a matle-matle,

le llele morara o atlehileng;

₁₃le llele le naha ea chaba sa ka,

naha e metseng meutloa

le hlabahlabane;

llelang matlo 'ohle a boithabiso,

le llele motse ona oa menyanyako.

₁₄Ntlo ea khosi

e tla sala e le feela,

'milimili o har'a motse o fele;

qhobosheane le tora

e tla ba lithako kamehla,

tonki li thalle teng,

le mehlape e fule teng,

₁₅ho fihlela Moea o tsoang holimo

o theoleloa holim'a rōna,

lehoatata

le fetoha khoiti ea masimo,

khoiti eo e tšoana

le moru o teteaneng.

₁₆Toka e tla ba teng lehoatateng,

ho loka ho be teng

har'a khoiti ea masimo.

₁₇Ho loka ho tla bèha

tholoana ea khotso,

ho loka ho tsoale

khutso le letšepa kamehla.

₁₈Chaba sa ka se tla phela

naheng e nang le khotso,

se lule malapeng

a sireletsehileng,

bakeng tsa phomolo

tse hlokang matšoenyeho.

₁₉Leha fako se ka ruthutha

moru oa healla,

motse oa heletsoa kahohle,

oa batalla,

₂₀lōna le tla ba lehlohonolo haholo,

le jale peō ea lōna

mabōpong a linōkana tsohle,

pholo le tonki tsa lōna

li khapheloe sekoai.