Thabo ea ba lopolotsoeng
1Lehoatata le letsoatlare
li tla thaba,
lefeella le nyakalle,
palesa li thunye.
2Hoatata le tla thunya haholo,
le bine ka thabo, le fumane tlōtla
e kang ea Lebanone,
botle e ke ba Karamele
le ba Sharone;
batho ba tla bona tlōtla ea Morena,
ba bone le botle
ba Molimo oa rōna.
3Matlafatsang matsoho a fokolang,
le tiise le mangoèlè a rèrèkèlang;
4ho ba pelo li tšohileng le re:
“Matlafalang, le se ke la tšaba,
bonang, Molimo oa lōna
o tla ho le phetetsa,
Molimo ke eena
ea tla otla lira tsa lōna,
Molimo o tla tla, a le pholose.”
5Mahlo a lifofu a tla tutubolloa,
litsebe tsa bo-tutu li thibolloe;
6sehlotsa se tla tlōla,
se tlōle joaloka khama,
leleme la semumu le bine ka thabo.
Metsi a tla phorosela har'a lefeella,
melatsoana e phalle har'a lehoatata.
7Hlabathe le chesang
le tla fetoha letša,
liba li kopotse mobung o ommeng.
Moo e n'e le lilao tsa liphokojoe
ho tla mela joang, le lehlaka, le loli.
8'Mila o moholo o tla ba teng moo,
o reoe lebitso la Tsela ea Khalalelo.
Baetsalibe ba ke ke
ba tsamaea ka eona,
e tla ba ea ba lokelang ho e tsamaea,
ba ke ke ba lahleha leha e le lithoto.
9Tseleng tau e ke ke ea e-ba teng,
batana se bohale
se ke ke sa e tsamaea,
ha ho le se seng
se tla bonoa ho eona,
balopolloa ke bona feela
ba tla e tsamaea.
10Balopolloa ba Morena
ba tla khutla ka eona,
ba kene Sione ba bina ka nyakallo,
thabo ea kamehla
e be mefapahlooho ea bona,
thabo le nyakallo li ba aparele,
masoabi le masisapelo
'ona a ba tlohele.
