Kotsi ea ho ba leeme
1Bana beso, tumelo eo le nang le eona ho Jesu Kreste, Morena oa rōna ea tlōtlehang, le se ke la e kopanya le leeme. 2Ho ka etsahala hore phuthehong ea lōna ho kene monna ea roetseng lesale la khauta, ea apereng tse mahali-hali, ho be ho kene le mofutsana ea apereng tse marantha. 3Ha le sheba ea apereng tse mahali-hali, ebe le re ho eena: “Uena, ak'u lule setulong sena se setle,” empa le re ho mofutsana: “Uena, ema mona,” kapa: “Lula fatše mona maotong a ka,” 4na ha le etse khethollo? Na ha le baahlōli ba ahlōlang ka bokhopo?
5Mamelang, bana beso ba ratehang. Na hase Molimo ea khethileng bao e leng mafutsana mahlong a lefatše, hore e be barui tumelong, le majalefa a 'Muso oo a o tšepisitseng ba mo ratang? 6Empa lōna le hlompholotse mofutsana. Na hase barui ba le hatellang, ba le hulelang makhotleng? 7Na hase bona ba nyefolang lebitso le letle la Kreste, leo le bitsoang ka lona?
8Ha le fela le phetha molao oa sehlooho, o ngotsoeng Mangolong, o reng: “Rata oa heno joalokaha u ithata,” le etsa hantle. 9Empa ha le e-na le leeme, le etsa sebe, 'me molao oa le ahlōla hobane le o tlōtse. 10Ha motho a bōlōka molao oohle, haese feela ntlha e le 'ngoe eo a e tlōlang, o molato oa ho tlōla molao kaofela, 11hobane ea itseng: “U se ke ua feba,” o bile o itse: “U se ke ua bolaea.” Leha u sa febe, feela u bolaea, u tlōtse molao.
12Lipuo le liketso tsa lōna e be tsa batho ba tla ahlōloa ka molao oa tokoloho. 13Ea hlokileng mohau o tla ahlōloa ho se mohau, empa ea bileng mohau ha a tšabe ho ahlōloa.
Tumelo le mesebetsi
14Bana beso, ho thusa'ng hore motho a re o na le tumelo, empa a sa phethe mesebetsi ea eona? Na tumelo e joalo e ka mo pholosa? 15Ha ngoan'abo rōna kapa khaitseli ea rōna a hlobotse, 'me a hloka lijo tsa letsatsi le leng le le leng, 16ho thusa'ng hore e mong oa lōna a re ho eena: “Ikele ka khotso, u futhumale, u khōre,” feela a sa mo fa tse hlokahalang hore a phele? 17Ka mokhoa o joalo, tumelo e se nang mesebetsi e shoele shoi!
18Empa e mong o tla re: “Uena u na le tumelo, 'na ke na le mesebetsi.”
Ak'u mpontše tumelo ea hao e se nang mesebetsi, 'na ke tla u bontša tumelo ea ka ka mesebetsi ea ka. 19Ha ke re u lumela hore Molimo o mong feela? U etsa hantle; le bona bademona ba lumela joalo, 'me baa thōthōmela.
20Uena motho ea sethoto, na u rata ho tseba hore tumelo e se nang mesebetsi e nyōpile? 21Na ntat'a rōna Aborahama ha aa ka a lokafatsoa ka mesebetsi, mohla a nyehelang ka mora oa hae Isaka aletareng? 22Ua bona hè, tumelo e ne e tlatsana le mesebetsi ea Aborahama, le mesebetsi ea hae e ne e etsa hore tumelo ea hae e phethehe, 23'me ho ile ha phethahala Mangolo a reng: “Aborahama o ile a lumela ho Molimo, 'me hoo a ho balloa e le ho loka,” a ba a bitsoa motsoalle oa Molimo. 24Kahoo lea bona hore motho o lokafatsoa ka mesebetsi, e seng ka tumelo feela. 25Ho ile ha e-ba joalo le ho Rahaba oa seotsoa. Na ha aa ka a lokafatsoa ka mesebetsi, mohla a amohelang lihloela tsa Baiseraele, a ba a li khutlisa ka tsela esele? 26Efela joalokaha 'mele o se nang moea o shoele, le eona tumelo e se nang mesebetsi e shoele.
