Lenyalo la Samosone
1Samosone a theohela Timina, 'me ha a le hona teng a khahloa ke moroetsana e mong oa baroetsana ba Bafilesita. 2A nyolohela ha habo, 'me a bolella batsoali ba hae, a re: “Ke khahliloe ke moroetsana e mong oa baroetsana ba Bafilesita, mane Timina. Ka baka leo, nqelleng eena hore e be mosali oa ka.”
3Batsoali ba hae ba re ho eena: “Na ha ho na moroetsana har'a baroetsana ba bang ka uena, kapa har'a sechaba sohle sa heso, hoo u ka ratang ho nyala mosali har'a Bafilesita baa ba maqai?”
Samosone a re ho ntat'ae: “Nqelle eena, hobane ke mo rata haholo.”
4Empa batsoali ba hae ba ne ba sa tsebe hore hona ho tsoa ho Molimo, hobane a ne a batla monyetla oa ho loantša Bafilesita. Ka eona nako eo Bafilesita ba ne ba busa Baiseraele.
5Joale Samosone a theohela Timina a e-na le batsoali ba hae. Ha ba fihla masimong a morara a Timina, taoana ea purumèla Samosone. 6Moea oa Morena oa theohela holim'a hae ka matla, 'me a tamolla taoana eo joalokaha motho a ka tamolla potsanyane. O ne a sa nka letho matsohong a hae. Empa ha a ka a bolella batsoali ba hae seo a se entseng.
7A theohela Timina, a buisana le moroetsana eo, 'me moroetsana eo a khahla Samosone haholo. 8Kamora' matsatsi a se makae, a khutlela hape ho ea mo nyala. A khelohela kathōko ho ea bona sefifi sa taoana, 'me a fumana linotši li hahetse ka sefifing seo, li behetse mahe. 9A ntšetsa linotši tseo ka matsoho, a tsoela pele, a tsamaea a ntse a e-ja. Eaba o khutlela ho batsoali ba hae, a fihla a ba fa mahe a linotši, 'me ba e-ja. empa a se ke a ba bolella hore o ntšelitse mahe ana a linotši ka sefifing sa taoana.
10Ntat'ae a theohela habo moroetsana, 'me Samosone a etsa mokete teng, hobane hona e ne e le tloaelo ea bahlankana. 11Ha Bafilesita ba 'mona, ba rōmela bahlankana ba mashome a mararo ho ea hlola le eena.
12Samosone a re ho bona: “Kea le lōtha. Ha le ka la ntlhalosetsa selōtho sena matsatsi a supileng a mokete a e-s'o fete, 'me la se nepa, ke tla le nea lihempe tse mashome a mararo, tse entsoeng ka lesela la lene, le liaparo tse mashome a mararo tsa mokhabo. 13Empa haeba le hlōloa ho ntlhalosetsa sona, ke lōna ba tla 'nea lihempe tse mashome a mararo, tse entsoeng ka lesela la lene, le liaparo tse mashome a mararo tsa mokhabo.”
Eaba ba re ho eena: “Re lōthe, re ke re utloe!”
14A ba lōtha, a re:
“Lijeoang li tsoile ka ho maja,
limonate li tsoile ka ho ea matla.”
Ba hlōloa ho hlalosa selōtho ka matsatsi a mararo.
15Ka letsatsi la bosupa ba re ho mosali oa Samosone: “Qeka monna oa hao hore a re hlalosetse selōtho sena, esere ra u cheseletsa ka tlung ea ntat'ao. Na le re memetse ho tla re futsanehisa? Ha ho joalo?”
16Mosali oa Samosone a itšèla ka likhapha, a re ho eena: “Ruri u ntlhoile, ha u nthate. U lōthile baheso, empa ha u e-s'o ntlhalosetse selōtho seo.”
Eaba Samosone o re ho eena: “Bona mona, esita le batsoali ba ka ha kea ka ka ba bolella. Joale uena u re ke u bolelle?” 17A mo llela ka matsatsi a supileng a mokete, 'me ka letsatsi la bosupa a 'molella tlhaloso ea sona, hobane mosali o ne a sa mo fe tšoeea. Mosali eo a ea bolella ba habo.
18Ka letsatsi la bosupa, pele letsatsi le likela, banna ba motse ba re ho eena:
“Ho monate ho fetisa linotši
ke hofe?
Ho matla ho feta tau
ke hofe?”
Samosone a re ho bona: “Hoja le se leme ka pholo ea ka, le ka be le sa hlalosa selōtho sa ka!”
19Moea oa Morena oa theohela holim'a hae ka matla, eaba o theohela Ashekelone, teng a bolaea banna ba mashome a mararo. A nka liaparo tsa bona, a nea banna ba ileng ba 'molella tlhaloso ea selōtho sa hae liaparo tsa mokhabo. Khalefo ea hae ea tlōkōma, a nyolohela lapeng habo. 20Eaba mosali oa Samosone o neoa molekane oa Samosone, eo e neng e le moetsana oa hae.
