'Mika le ba morabe oa Dane
1Mehleng eo Baiseraele ba ne ba se na khosi. Ka eona nako eo, ba morabe oa Dane ba batla lefa la naha eo ba ka ahang ho eona, hobane ho fihlela ka nako eo, e ne e le bona feela, har'a merabe ea Baiseraele, ba neng ba e-s'o ka ba abeloa lefa. 2Bana ba Dane ba rōma banna ba bahlano ba lelapa labo bona, e le bahlabani ba tsoang metseng ea Sora le Eshetaole, ho ea hloela naha, le ho e hlahloba. Ba re ho bona: “Tsamaeang le e'o hlahloba naha.”
Bao ba ea fihla naheng e maralla ea Efraime, tlung ea 'Mika, 'me ba robaletsa teng. 3Ha ba ntse ba le tlung eo ea 'Mika, ba tseba lentsoe la mohlankana oa Molevi, ba fapohela teng, ba re ho eena: “U tlisitsoe ke mang moo? U etsa'ng moo? U batla'ng moo?”
4A re ho bona: “'Mika o nkentse tjena: O nkhirile, 'me ke moprista oa hae.”
5Ba re ho eena: “Ak'u kōpe keletso ho Molimo, rea u rapela, e le hore re tle re tsebe hore na leeto leo re leng ho lona le tla atleha na.”
6Moprista a re ho bona: “Tsamaeang ka khotso; leeto la lōna le matsohong a Morena.”
7Banna bao ba bahlano ba tsamaea, ba fihla Laishe, ba fumana batho ba phelang moo ba phela ka boikhetlo, joaloka Basidone, ba khotsofetse, ba iketlile, hobane naheng eo ho ne ho se le ea mong ea nang le matla holim'a bona, ea ka ba tšoenyang ka letho. Ba ne ba le hōle le Basidone, 'me ba sa amane le motho ofe kapa ofe ka letho.
8Ha ba fihla ho bana babo bona ba Sora le Eshetaole, bana bao babo bona ba re ho bona: “Le re'ng?”
9Ba re ho bona: “Emang! A re ba futuheleng, hobane re bone naha, 'me re fumane e le ntle haholo. Le sa emetse'ng? Le se ke la tsoafa ho ea kena le hapa naha eo. 10Ha le e-ea, le tla fumana batho ba iketlileng, 'me naha e le kholo. Molimo o le neile eona matsohong, 'me ke sebaka se sa haelloeng ke letho la tse teng lefatšeng.”
11Ba morabe oa Dane ba tsoa naheng ea Sora le Eshetaole, e le banna ba makholo a tšeletseng, ba hlometseng. 12Ba nyoloha, 'me ba hloma Kiriate-Jearime e Juda. Ke ka baka leo le ho fihlela kajeno-ea-bokajeno, sebaka seo se ntseng se bitsoa Liahelo tsa Dane. Se ka bophirimela ho Kiriate-Jearime. 13Ho tloha moo ba fetela naheng e maralla ea Efraime, ba ea fihla tlung ea 'Mika.
14Joale banna ba bahlano, ba neng ba il'o hloela naha ea Laishe, ba re ho bana babo bona: “Na lea tseba hore kahar'a matlo aa, ho na le setipe le molingoana oa lelapa, le setšoantšo se betliloeng, le setšoantšo se bōpiloeng? Ka baka leo, imamelleng hore na le tla etsa joang.” 15Ba khelohela teng, ba fihla tlung ea mohlankana oa Molevi, e leng ntlo ea 'Mika. Ba 'motsa bophelo. 16Ha e le banna ba makholo a tšeletseng, ba morabe oa bana ba Dane, ba hlometseng, ba ema khorong ea motse. 17Banna ba bahlano, ba neng ba il'o hloela naha, ba nyoloha, ba kena ka tlung, ba nka setšoantšo se betliloeng, le setipe, le molingoana oa lelapa, le setšoantšo se bōpiloeng. Moprista eena e ema khorong ea motse le banna ba makholo a tšeletseng, ba hlometseng.
18Ha banna bana ba kena ka tlung ea 'Mika, ba nka setšoantšo se betliloeng, le setipe, le molingoana oa lelapa, le setšoantšo se bōpiloeng, moprista a re ho bona: “Le etsa'ng?”
19Ba re ho eena: “Khutsa! Bea letsoho molomong, u tsamaee le rōna, 'me u be ntat'a rōna le moprista oa rōna. Ho molemo ho uena ke hofe: Ho ba moprista oa lelapa la motho a le mong, kapa ho ba moprista oa morabe le oa lelapa la Iseraele?” 20Moprista a nyakalla. A nka setipe, le molingoana, oa lelapa le setšoantšo se betliloeng, 'me a kena har'a sechaba seo.
21Eaba baa reteleha, ba kena tseleng. Ba eteletsa bana, le likhomo, le thepa kapele. 22Ha ba se ba le hōle le ntlo ea 'Mika, banna ba neng ba le ka matlung a haufi le ntlo ea 'Mika, ba phutheha, ba sala bana ba Dane morao, ba ba ba fihla ho bona. 23Ba hōoeletsa bana ba Dane, 'me bao ba reteleha, ba re ho 'Mika: “U batla'ng, ha u bokantse batho tjee?”
24'Mika a re ho bona: “Le nkile molimo oa ka, o ke iketselitseng oona, le moprista le mo nkile, eaba lea tsamaea. Ke sa na le eng? Joale le re na ke batla'ng?”
25Bana ba Dane ba re ho eena: “U se hlole u bua le rōna, esere banna bana ba halefileng ba u loantša, 'me uena le ba lelapa la hao la shoa.” 26Bana ba Dane ba tsoela pele leetong la bona. Ha 'Mika a bona hore ba matla ho mo feta, a khutlela tlung ea hae.
27Ba nka lintho tseo 'Mika a neng a li entse, ba nka le moprista oa hae, ba fihla Laishe, sechabeng sa khotso, se iketlileng, ba se bolaea ka sabole, ba chesa motse ka mollo. 28Ba hloka ea ka ba namolelang, hobane ba ne ba le hōle le Sidone, ebile ba sa amane le motho ofe kapa ofe. E ne e le ka khohlong e haufi le Bete-Rehobe.
Bana ba Dane ba haha motse, 'me ba phela moo. 29Motse oo ba o rea lebitso la Dane, ba o reella ntat'a bona Dane, eo e neng e le mora oa Iseraele. Pele ho moo motse oo o ne o bitsoa Laishe. 30Bana ba Dane ba hloma setšoantšo se betliloeng. Jonathane, mora oa Gereshome, setlōhōlō sa Moshe, eena le bara ba hae ea e-ba baprista ba morabe oa Dane, ho fihlela mohl'a letsatsi leo ka lona ho hapuoang naha ea bona. 31Ka nako eohle, eo Tente ea Molimo e neng e le Shilo ka eona, ba khumamela setšoantšo seo 'Mika a iketselitseng sona.
