BAAHLOLI 6

₁Bana ba Iseraele ba siteloa Morena. Morena a neelana ka bona matsohong a Bamidiane ka lilemo tse supileng. ₂Bamidiane ba imela bana ba Iseraele. Ka baka la ho tšaba Bamidiane, bana ba Iseraele ba ile ba ipata matsabeng, le mahaheng, le liqhobosheaneng. ₃E ne e ee ere ha Baiseraele ba jetse, Bamidiane, le Baamaleke, le ba merabe ea Bochabela, ba nyolohe, ba futuhele Baiseraele. ₄Ba ne ba ee ba hlome malebana le Baiseraele, ba senye lijalo masimong ho ea fihla Gasa, ba se ke ba ba siela leha e le nku kapa khomo kapa tonki. ₅Bamidiane ba ne ba ee ba nyolohe le mehlape ea bona, le litente tsa bona, ba tle joaloka boieane ba litsie. Palo ea bona le ea likamele tsa bona e ne e ke ke ea baloa, 'me ba fihle naheng eo ba e falatse. ₆Baiseraele ba futsaneha ka baka la Bamidiane. Bana ba Iseraele ba ipiletsa ho Morena.

₇Eare ha bana ba Iseraele ba ipiletsa ho Morena, ka baka la Bamidiane, ₈Morena a rōmela moporofeta ho bana ba Iseraele. Moporofeta eo a re ho bona: “Morena Molimo oa Iseraele, o bua tjena: ‘Ke le nyolotse Egepeta; ke le ntšitse moo le neng le le makhoba teng. ₉Ke le namoletse matsohong a Baegepeta, le matsohong a bohle ba neng ba le hateletse. Ke ba lelekile kapele ho lōna, 'me ka le nea naha ea bona.’ ₁₀Ka re ho lōna: ‘Ke 'na Morena Molimo oa lōna; le se ke la tšaba melimo ea Baamore bao le ahileng naheng ea bona.’ Empa ha lea ka la 'mamela.”

₁₁Lengeloi la Morena la fihla, 'me la lula katlas'a sefate sa eike se Ofera, seo e neng e le sa Jōoashe, oa Moabiesere. Gideone, mora oa Jōoashe, o ne a ntse a pōlela koro setlhōtlelong sa veine, hore a e patele Bamidiane. ₁₂Lengeloi la Morena la itlhahisa ho Gideone, la re ho eena: “Morena o na le uena, uena mohlabani oa senatla.”

₁₃Gideone a re ho lona: “Monghali oa ka, haeba Morena a e-na le rōna, ke ka baka la'ng ha re hlahetsoe ke ntho ee? E kae mehlolo eohle ea hae, eo bo-ntat'a rōna ba re boleletseng eona, ba re: ‘Na Morena ha aa re nyolla Egepeta?’ Empa joale o re lahlile, o neelane ka rōna matsohong a Bamidiane.”

₁₄Morena a retelehela ho eena, a re: “E-ea ka matla ana a hao, u namolele bana ba Iseraele matsohong a Bamidiane. Na ha kea u rōma?”

₁₅Gideone a re ho Morena: “Oho, Moren'a ka, ke tla namolela Baiseraele ka eng? Bona, lelapa leso ke lona le fokolang haholo morabeng oa Manase, 'me 'na ke oa ho fejana lapeng leso.”

₁₆Morena a re ho eena: “Ruri ke tla ba le uena, 'me u tla hlōla Bamidiane joalokaha eka ke motho a le mong.”

₁₇Eaba Gideone o re ho eena: “Haeba u nkhauhetse, ak'u nketsetse pontšo ea hore efela ke uena ea buang le 'na. ₁₈Se ke ua tloha mona, kea u rapela, ho fihlela ke ba ke khutlela mona ho uena, ke u tlisetsa nyehelo ea ka, ke e bea kapele ho uena.”

Morena a re: “Ke tla ema mona ho fihlela u ba u khutla.”

₁₉Eaba Gideone o kena ka tlung ea hae, o hlaba potsanyane, oa e pheha, 'me ka phofo e thumisehileng, e ka bang boima ba likilo tse leshome, a etsa likuku tse sa lomosoang. A nka nama, a e kenya ka serōtōng, a tšèla moro ka pitseng, a li tlisetsa Morena a le katlas'a sefate sa eike, a mo nea tsona.

₂₀Lengeloi la Morena la re ho eena: “Nka nama le likuku tse sa lomosoang, u li bee holim'a lefika lena, u tšèle moro holim'a tsona.” Gideone a etsa joalo. ₂₁Lengeloi la Morena la ama nama le likuku tse sa lomosoang ka ntlha ea molamu oa lona, 'me mollo oa tlōla holim'a lefika, oa chesa nama le likuku tse sa lomosoang. Eaba lengeloi la Morena le nyamela a nts'a le shebile.

₂₂Ha Gideone a lemoha hore e ne e le lengeloi la Morena, a re: “Oho, Morena Molimo, ke bone lengeloi la hao fahleho li talimane!”

₂₃Morena a re ho eena: “Khotso e be le uena. U se ke ua tšaba, u ke ke ua shoa.”

₂₄Gideone a hahela Morena aletare moo, 'me a e rea lebitso la “Morena ke khotso”. Le kajeno-ea-bokajeno e ntse e le teng sebakeng se bitsoang Ofera, seo e leng sa Baabiesere.

₂₅Hona bosiung boo, Morena a re ho Gideone: “Nka pohoana ea ntat'ao, e leng pohoana, e lilemo tse supileng; u heletse aletare ea Baale, eo ntat'ao a e hahileng. O senye le litšoantšo tsa Ashera, tse pel'a eona. ₂₆Joale u hahele Morena Molimo oa hao aletare, holim'a qhobosheane ena, 'me u e hahe ka makhethe. Ebe u nka pohoana ea bobeli, u bese mollo ka patsi ea lifate tsa litšoantšo tsa Ashera, tseo u tla li ratha.”

₂₇Gideone a nka banna ba leshome ba bahlanka ba hae, a etsa kamoo Morena a mo laetseng kateng. Ka baka la ho tšaba ba lelapa labo, le banna ba motse, Gideone a phetha taelo ea Morena e le bosiu.

₂₈Ha banna ba motse ba tsoha e sa le hoseng, ba bona aletare ea Baale e helelitsoe, le litšoantšo tsa Ashera, tse pel'a eona, li sentsoe, le pohoana ea bobeli e entsoe nyehelo holim'a aletare e hahiloeng.

₂₉Banna bao ba buisana, ba re: “Ke mang ea entseng ntho ee?”

Ba batlisisa, ba botsisisa, ba re: “Ntho ena e entsoe ke Gideone, mora oa Jōoashe.”

₃₀Banna ba motse ba re ho Jōoashe: “Ntša mora oa hao a tl'o bolaoa, hobane o helelitse aletare ea Baale, hape o sentse le litšoantšo tsa Ashera.”

₃₁Jōoashe a re ho bohle ba neng ba eme pel'a hae: “Na le rata ho buella Baale? Kapa le rata ho mo sireletsa? Mang kapa mang ea 'muellang o tla bolaoa bo e-s'o ka bo e-sa. Haeba Baale e le Molimo ha a ke a ipuelle, hobane motho e mong o helelitse aletare ea hae.” ₃₂Ke ka baka leo Gideone a ileng a reoa lebitso la Jerubaale ka lona letsatsi leo, e leng ho re: “Baale a ke a ipuelle”, hobane Gideone o helelitse aletare ea hae.

₃₃Joale Bamidiane bohle, le Baamaleke, le lichaba tsa bochabela, ba bōkellana, ba tšela Jorodane, ba hloma phuleng ea Jesereele. ₃₄Moea oa Morena oa aparela Gideone, a letsa lenaka, 'me Baabiesere ba bōkellana, ba mo latela. ₃₅Gideone a rōmela maqosa ho ba morabe oa Manase, le bona ba bōkellana, ba mo latela. A rōmela maqosa ho ba morabe oa Ashere, le ho oa Sebulone, le ho oa Nafthali, 'me ba nyoloha, ba mo khahlanyetsa.

₃₆Gideone a re ho Molimo: “Haeba u ka fela ua namolela Baiseraele ka letsoho la ka, joalokaha u buile, ₃₇ke tla bea boea ba nku seotlong. Haeba phōka e ka tsoha e letse holim'a boea feela, empa kathōko ho bona ho omme, ke tla tseba hore u tla fela u namolele Baiseraele ka letsoho la ka, joalokaha u buile.” ₃₈Ha fela ha e-ba joalo, hobane eitse ha Gideone a tsoha e sa le hoseng, 'me a tlhōtla boea, ha tsoa phōka e tlalang lefisoana.

₃₉Eaba Gideone o re ho Molimo: “Khalefo ea hao e se ke ea ntlōkōmela, 'me ke tla bua hanngoe feela. Ak'u ntumelle ke leke hanngoe hape ka boea bona ba nku. Ho ke ho omelle boea ba nku feela, hohle fatše phōka e lale.” ₄₀Molimo a etsa joalo hona bosiung boo. Ha tsoha ho omme boea ba nku feela, empa hohle fatše ho letse phōka.