BAAHLOLI 9

₁Abimeleke, mora oa Jerubaale, a ea Shekeme ho bo-malom'ae. A bua le bona le ba lelapa lohle la ntat'ae-moholo ea tsoalang 'm'ae, a re: ₂“Kea le kōpa: Buang moo bana bohle ba Shekeme ba utloang, le re: ‘Ho molemo ho lōna ke hofe: Na ke ho busoa ke banna ba mashome a supileng, bao bohle e leng bara ba Jerubaale, kapa ke ho busoa ke monna a le mong feela?’ Hopolang hore 'na le lōna re nama e le 'ngoe le mali a le mang.”

₃Bo-malom'ae ba bua mantsoe ana 'ohle ka Abimeleke, moo banna bohle ba Shekeme ba utloang, 'me lipelo tsa bona tsa sekamela ka ho Abimeleke, hobane ba ile ba re: “Ke ngoan'abo rōna.” ₄Ba nea Abimeleke lichelete tse mashome a supileng tsa silefera, tse neng li e-tsoa ka tempeleng ea Baale-Berite. Ka chelete ena a hira banna ba likoeta, 'me bao ba mo latela. ₅Abimeleke a ea tlung ea ntat'ae e Ofera, 'me a bolaela bana babo, e leng banna ba mashome a supileng, bao e leng bara ba Jerubaale, holim'a lejoe le le leng. Empa Jotame, mora oa Jerubaale oa ho fela, eena a sala, hobane o ne a ipatile. ₆Banna bohle ba Shekeme le ba Bethemilo ba phuthehela sefateng sa eike se Shekeme, moo ho nang le sefika, 'me ba etsa Abimeleke khosi ea bona hona teng.

₇Ha Jotame a bolelloa tsena a nyoloha, a fihla a ema tlhōrōng ea thaba ea Gerisime. A hōoeletsa, a re ho banna ba Shekeme: “'Mameleng, lōna banna ba Shekeme, e le hore Molimo a tle a le mamele. ₈Ho thoe lifate li kile tsa kopana ho ikhethela khosi. Eaba li re ho sefate sa mohloaare: ‘E-ba khosi ea rōna.’

₉“Empa sefate sa mohloaare sa re ho lifate tseo: ‘Le re ke tlohele ho etsa ole ea ka, eo ka baka la ka ho tlōtloang Molimo le batho ka eona, ke 'ne ke e'o fokaela holim'a lifate?’

₁₀“Joale lifate tsa re ho sefate sa feiee: ‘Tloo, u be khosi ea rōna.’

₁₁“Empa sefate sa feiee sa re ho tsona: ‘Le re ke tlohele bomonate ba ka, le litholoana tsa ka tse monate, ke 'ne ke e'o fokaela holim'a lifate?’

₁₂“Eaba lifate li re ho sefate sa morara: ‘Tloo, u be khosi ea rōna.’

₁₃“Sefate sa morara sa re ho tsona: ‘Le re ke tlohele veine ea ka e thabisang Molimo le batho, ke 'ne ke e'o fokaela holim'a lifate?’

₁₄“Joale lifate tsohle tsa re ho leōka: ‘Tloo, u be khosi ea rōna.’

₁₅“Empa leōka la re ho lifate: ‘Haeba le fela le ntlotsa hore ke be khosi ea lōna, tloong, le tšabele moriting oa ka, empa haeba le sa etse joalo, eka mollo o ka tsoa meutloeng ea ka, oa chesa lifate tsa likedare tsa Lebanone.’

₁₆“Ka baka leo, na le sebelitse ka 'nete le ka nepo, ka ho etsa Abimeleke khosi? Na le entse Jerubaale le ba lelapa la hae hantle, ho ea kamoo liketso tsa hae li lokelang kateng? ₁₇Ntate o le loanetse, a bea bophelo ba hae kotsing, a le namolela matsohong a Bamidiane. ₁₈Empa kajeno lōna le tsohetse lelapa la ntate matla. Le bolaetse bara ba hae, e leng banna ba mashome a supileng, holim'a lejoe le le leng, 'me Abimeleke, mora oa lekhabunyane la hae, le mo entse khosi ea banna ba Shekeme, hobane ke ngoan'abo lōna. ₁₉Haeba kajeno le sebelelitse Jerubaale le ba lelapa la hae ka 'nete le ka nepo, thabelang Abimeleke, 'me le eena a ke a le thabele. ₂₀Empa haeba ho se joalo, eka mollo o ka tsoa ho Abimeleke, oa chesa banna ba Shekeme le ba Bethemilo, 'me eka mollo o ka tsoa ho banna ba Shekeme le ho ba Bethemilo, oa chesa Abimeleke.”

₂₁Jotame a matha, a baleha, a ea Beere. A aha teng ka baka la ho tšaba Abimeleke, ngoan'abo.

₂₂Ha Abimeleke a qetile lilemo tse tharo e le khosana ea Baiseraele, ₂₃Molimo a rōmela moea o mobe pakeng tsa Abimeleke le banna ba Shekeme. Banna bao ba Shekeme ba fetohela Abimeleke, ₂₄e le hore polao e ileng ea etsoa ho bara ba mashome a supileng ba Jerubaale, le mali a bona a tšolotsoeng, tsena li tle li botsoe Abimeleke, ngoan'abo bona, ea ba bolaileng; li botsoe le banna ba Shekeme ba ileng ba mo thusa ho bolaea bana babo. ₂₅Banna ba Shekeme ba lalla Abimeleke holim'a lithaba. Ba koeta bohle ba neng ba feta ka tsela eo. Eaba Abimeleke oa tsebisoa.

₂₆Gaale, mora oa Ebede, a tla a e-na le bana babo, ba fallela Shekeme. Banna ba Shekeme ba mo tšepa. ₂₇Ba ea masimong, ba kotula morara oa bona. Ba ritela veine, ba etsa mokete. Ba kena ka tempeleng ea molimo oa bona, ba e-ja, ba e-noa, 'me ba rōhaka Abimeleke. ₂₈Eaba Gaale, mora oa Ebede, o re: “Le re Abimeleke ke mang? Rōna ba Shekeme re mo sebeletsa ka baka lefe? Na hase eena mora oa Jerubaale, le molaoli oa hae Sebule, ba neng ba sebeletsa banna ba Hamore, ntat'a Shekeme? Joale rōna re mo sebeletsa ka baka lefe? ₂₉Haeba sechaba see se busoa ke 'na! Ke ne ke tla leleka Abimeleke! Ke ne ke tla re ho Abimeleke: ‘Eketsa bahlabani ba hao, u tle, re loane.’ ”

₃₀Eare ha Sebule, 'musi oa motse, a utloa mantsoe a Gaale, mora oa Ebede, bohale ba hae ba tlōkōma. ₃₁A rōma maqōsa ho Abimeleke a le Aruma, a re: “Bona, Gaale, mora oa Ebede, le bana babo ba tlile Shekeme, 'me ba hlohleletsa batho ba motse hore ba u fetohele. ₃₂Ka baka leo, uena le batho ba ka ho uena, le tsohe bosiu, le ba lalle ka naheng. ₃₃Hosasane u tsohe ka malungoalungoana, ere hang-hang ha letsatsi le chaba, u futuhele motse. Etlare ha Gaale le batho ba ka ho eena ba u khahlanyetsa, uena u ba etse kamoo u ka etsang kateng.”

₃₄Abimeleke le batho bohle ba neng ba e-na le eena ba tsoha e sa le bosiu, ba lalla motse oa Shekeme ba le lihlopha li 'ne. ₃₅Gaale, mora oa Ebede, a tsoa, a ema khorong ea motse. Abimeleke le banna ba neng ba e-na le eena ba rōpōha moo ba neng ba laletse teng.

₃₆Eitse ha Gaale a bona batho bao a re ho Sebule: “Bona, batho ke bao ba theoha kaholim'a thaba!”

Eaba Sebule o re ho eena: “U bona meriti ea lithaba, e kang ke batho.”

₃₇Gaale a boela a bua hape, a re: “Bona, batho ke bano ba theoha letsatseng la thaba. Sehlopha se seng se theoha ka tsela e fetang sefateng sa eike sa linōhe.”

₃₈Joale Sebule a re ho eena: “Bo kae joale boithoriso ba hao, uena ea itseng: ‘Le re Abimeleke ke mang, hoo re ka mo sebeletsang?’ Na batho baa hase bona bao u neng u ba nyelisa? Ak'u tsoe joale, u e'o ba loantša.”

₃₉Gaale a tsoa a eteletse banna ba Shekeme pele, a loantša Abimeleke. ₄₀Gaale a baleha, Abimeleke a mo phalalisa. Litōpō tsa banna ba Gaale tsa etsa mofela ho ea fihla khorong ea motse. ₄₁Abimeleke a aha Aruma, Sebule eena a leleka Gaale le bana babo hore ba se ke ba aha Shekeme.

₄₂Ka la hosasane batho ba tsoa ho ea naheng, 'me Abimeleke a tsebisoa taba ena. ₄₃Eaba Abimeleke o nka banna ba hae, o ba arola lihlopha tse tharo, o il'o lalla naheng. Eare ha a talima, a bona banna ba e-tsoa motseng; a ba loantša, a ba bolaea. ₄₄Bo-Abimeleke le sehlopha sa hae ba khōrōhela pele, ba fihla ba ema khorong ea motse. Lihlopha tse peli tsona tsa khōrōhela bohle ba neng ba le naheng, tsa ba bolaea. ₄₅Abimeleke a qeta letsatsi leo lohle a patetse motse, a ba a o hapa, a bolaea batho ba ka ho oona. A heletsa motse oo, a nyanyatsa lesupi ka letsoai.

₄₆Ha banna bohle ba tora ea Shekeme ba utloela hona, ba kena ka qhobosheaneng ea tempele ea Ele-Berite. ₄₇Abimeleke a tsebisoa hore banna bohle ba tora ea Shekeme ba phuthehetse moo, ₄₈'me a nyolohela thabeng ea Salemone, eena le batho bohle bao a neng a e-na le bona. Abimeleke a nka selepe ka letsoho la hae, a rema lekala la sefate, a le nka, a le jara lehetleng, a re ho batho ba neng ba e-na le eena: “Nketsiseng, le etse ka potlako seo le bonang ke se etsa.” ₄₉Batho bohle ba mo etsisa, e mong le e mong a ithèmèla lekala. Ba latela Abimeleke, ba tšetleha makala qhobosheaneng, ba chesa qhobosheane ka makala ao. Batho bohle ba neng ba le ka toreng ea Shekeme, bao e neng e ka ba banna le basali ba sekete, ba e-shoa.

₅₀Joale Abimeleke a futuhela Tebese, a e etsetsa thibella, a e hapa. ₅₁Empa ho ne ho e-na le tora e hahiloeng ka thata kahar'a motse. Batho bohle ba motse, banna bohle le basali bohle, ba tšabela ka toreng eo. Ba ikoalla ka ho eona, ba ba ba hloella le marulelong a eona. ₅₂Abimeleke a fihla toreng eo, a e patela. A atamela monyakong oa tora, hore a tle a e chese ka mollo. ₅₃Mosali e mong a bata Abimeleke ka tšiloana holim'a hlooho, a mo pshatla lehata.

₅₄Kapele-pele Abimeleke a bitsa mohlankana ea jereng lihlomo tsa hae, a re ho eena: “Tsomula sabole ea hao, u mpolaee, esere ba 'na ba bua ka 'na, ba re: ‘O bolailoe ke mosali.’ ” Mohlankana eo a mo phehletsa ka sabole, eaba oa shoa. ₅₅Ha banna ba Baiseraele ba bona hore Abimeleke o shoele, ba tsamaea, monna ka mong a ikela lapeng ha hae.

₅₆Ka mokhoa o joalo Morena a phetetsa bokhopo ba Abimeleke, boo a ileng a bo etsetsa ntat'ae, ka ho bolaea bana babo ba mashome a supileng. ₅₇Molimo a otla banna ba Shekeme ka baka la bokhopo bohle ba bona. Thōhako ea Jotame, mora oa Jerubaale, ea ba oela holimo.