Juditha o tšepahala tumelong ea hae
1Holofernese a laela hore Juditha a kenngoe ka moo lijana tsa hae tsa silefera li neng li beuoe teng, 'me a feptjoe ka lijo tsa hae le veine ea hae. 2Empa Juditha a re: “Ha ke batle ho ja lijo tsena, esere ka etsa phoso. Tseo ke tlileng ka tsona li tla ntekana.”
3Holofernese a botsa, a re: “Ha mofao oa hao o fela, re ka u fumanela o kang ona kae? Ha ho motho oa leloko la heno har'a rona mona.”
4Juditha a araba, a re: “Ke hlapanya ka bophelo ba hao, morena oa ka, hore 'na, lekhabunyane la hao, nke ke ka qeta tseo ke tlileng le tsona, Morena a e-s'o phethe ka letsoho la ka seo a se hopotseng.”
5Eaba batlatsi ba Holofernese ba mo isa tenteng, moo a ileng a robala teng ho fihlela seroko. E sa le ka malungoa-lungoane, a tsoha, 6a romela kopo ho Holofernese e reng: “Morena oa ka a ke a laele hore lekhabunyane la hao le lumelloe ho tsoa ho ea rapela.” 7Holofernese a laela balebeli ba hae ho se mo thibele. Juditha a lula liahelong moo matsatsi a mararo. O ne a e-tsoa bosiu bo bong le bo bong ho ea khohlong ea Bethulia, ho tola selibeng se pel'a liahelo. 8Ha a nyoloha moo, o ne a rapele Morena Molimo oa Iseraele, hore a mo tataise morerong oa hae oa ho thusa sechaba sa Molimo ho tsoha molota. 9Ha a se a itlhoekisitse, a khutle 'me a lule ka tenteng ea hae ho fihlela a tlisetsoa lijo tsa hae, mantsiboea.
Mokete oa lijo oa Holofernese
10Ka letsatsi la bone Holofernese a ba le mokete oa lijo, 'me a mema bahlanka ba hae feela, ho se le ea mong oa batlatsi ba hae. 11A laela Bagoase, lehaole le ikarabellang litabeng tsa Holofernese feela, a re; “E-ea u kholise mosali eane oa Moheberu, eo u mo lebelang, hore a tl'o ja le ho noa le rona. 12Haeba re ka tlohela mosali ea kang eo re sa tsebana le eena, re tla hlajoa ke lihlong. Haeba re sa mo qeke, re tla itšehisa batho.”
13Bagoase a siea Holofernese, eaba o ea ho Juditha, 'me a re ho eena: “Lekhabunyane lena le letle le se ke la lika-lika ho ea ho morena oa ka, e le hore le hlomphuoe ke eena, le ithabise ka ho noa veine le rona; 'me le be joaloka e mong oa basetsana ba Baasiria ba sebeletsang tlung ea Nebukadenesare.” 14Juditha a mo araba, a re: “'Na ke mang ea ka hanyetsang morena oa ka? Ke tatetse ho etsa sohle seo a se batlang, 'me e tla ba boitumelo ho 'na ho fihlela lefung la ka.”
15A ema, a itereka ka liaparo tsa hae le mekhabo eohle ea basali. Lekhabunyane la hae la mo etella pele, 'me fatše, ka pele ho Holofernese, la ala liphate tse boea, tseo Bagoase a neng a li file Juditha ho lula holim'a tsona ha a e-ja. 16Juditha a kena 'me a lula fatše. Eare ha Holofernese a 'mona, a mo tsoela pelo 'me moea oa hae oa ferekana. A lakatsa haholo ho robala le eena. Ho tloha mohla a qalang ho 'mona, o ne a batla monyetla oa ho mo hohela. 17Holofernese a re ho eena: “U noe, u thabe le rona!” 18Juditha a fetola, a re: “Ke tla etsa joalo, morena, hobane haesale ke hlaha ha ke e-s'o ka ke iketla joaloka kajeno.” 19A nka seo lekhabunyane la hae le neng le mo lokiselitse sona; a ja 'me a noa a shebane le eena. 20Holofernese o ne a hapehile ke eena, hoo a ileng a noa veine e ngata-ngata, ho feta neng kapa neng bophelong ba hae, haesale a hlahile.
