JUDITHA 13

₁Nako e ne e se e ile, 'me bahlanka ba hae ba itlhahanela ho tsamaea. Bagoase a koala tente a le kantle, 'me a koalla ntle bahlanka ba neng ba sebeletsa morena oa hae. Bohle ba ea robala ba khathetse ke botaoa. ₂Juditha a sala a le inotši ka tenteng ea Holofernese, ea neng a rapaletse holim'a moalo a tahiloe haholo ke veine. ₃Juditha o ne a boleletse lekhabunyane la hae hore le mo emele ka ntle ho tente ea boroko, joalokaha le ne le etsa bosiu bo bong le bo bong. O ne a itse o tla tsoa ho ea thapelong ea hae; hape o ne a boleletse Bagoase ntho e tšoanang.

₄Nakong eo bohle ba ne ba siile Holofernese, ho se mang kapa mang ea neng a setse ka phaposing ea boroko. Juditha a ema ka thoko ho moalo oa Holofernese, a rapella ka pelong a re: “Morena, uena Molimo eo matla 'ohle e leng a hao, talima ka mohau seo ke tla se etsa motsotsong ona ka matsoho a ka, tlotlisong ea Jerusalema; ₅hobane joale nako e fihlile ea ho baballa lefa la hao, le ea ho atlehisa morero oa ka, e le hore ho tamolloe lira tse re tsohetseng matla.”

₆Eaba o atamela moalong lehlakoreng la hlooho ea Holofernese, 'me a hakolla sabole ea hae. ₇A atamela haufi-ufi le moalo, a mo tšoara ka moriri, a re: “Morena Molimo oa Iseraele, ak'u 'matlafatse hona kajeno.” ₈Ka matla 'ohle a hae a mo ratha molaleng ka makhetlo a mabeli, a mo poma hlooho. ₉Eaba o thetela setopo sa hae moalong, a tlosa sesireletso sa monoang lipalong tse se tšoereng. Kapele-pele a tsoa, eaba o nea lekhabunyane la hae hlooho ea Holofernese. ₁₀Lona la e kenya khetsing. Ka bobeli ba bona ba tsoa joalokaha e ne e le tloaelo ea bona ho etsa joalo ha ba e-ea ho rapela. Ba khaohanya liahelo, ba hlakothisa khohlo, ba e-hloa thaba ea Bethulia, 'me ba fihla likhorong tsa motse.

₁₁A sa le sebakana, Juditha a hoelehetsa balebeli ba likhorong, a re: “Bulang khoro; bulang, hobane Molimo, Molimo oa rona o na le rona; o ntse a bontša matla a hae Iseraele, bonatleng ba hae o hlola lira, joalokaha a entse kajeno!”

₁₂Eare ha ba utloa lentsoe la hae, banna ba motse ba theohela khorong ea motse ka potlako, 'me ba bitsa baholo ba motse. ₁₃Batho bohle, e moholo le e monyenyane, ba mathela teng kaofela, hobane ho ne ho le thata ho bona ho lumela hore o khutlile. Ba bula khoro, ba amohela Juditha le lekhabunyane la hae, ba hotetsa mello ho khantša, 'me ba ba kopela hare. ₁₄Eaba Juditha o bua ka lentsoe le phefa, a re: “Rokang Molimo, mo rokeng! Rokang Molimo ea sa kang a amoha ntlo ea Iseraele mohau oa hae, empa o tamolotse lira tsa rona ka letsoho la ka, bosiu bona.” ₁₅A ntša hlooho ka khetsing, a ba bontša eona, a re ho bona: “Ena ke hlooho ea Holofernese, molaoli e moholo oa lebotho la Baasiria; sesireletso, seo a neng a robetse tlas'a sona a tahiloe, ke sena! Morena o mo otlile ka letsoho la mosali. ₁₆Ke hlapanya ka Morena ea phelang, ea ntširelelitseng tseleng eo ke e latetseng, hore, leha a ile a hoheloa timelong ea hae ke sefahleho sa ka, ha aa ka a etsa sebe le 'na ho ntšilafatsa le ho ntlhabisa lihlong.”

₁₇Batho bohle ba itihela fatše ka mangole, ba maketse haholo, ba khumamela Molimo, ba hooa ba le ntsoe-leng, ba re: “U bokoe, uena Molimo oa rona, ea fentseng lira tsa sechaba sa hao tsatsing la kajeno!”

₁₈Usiea a re ho Juditha: “Morali oa ka, u hlohonolofalitsoe ke Molimo ea holimo-limo ho feta basali bohle ba lefatšeng! Ho bokoe Morena Molimo, 'Mopi oa leholimo le lefatše, eo, ka tataiso ea hae, u khaotseng hlooho ea moetapele oa lira tsa rona. ₁₉Tšepo eo u bileng le eona ha e ka ke ea lebaleha lipelong tsa batho; empa ba tla hopola ho ea ho ile matla a Molimo. ₂₀Molimo a ke a etse hore u tlotlisoe kamehla, 'me u sitsoe ka mahlohonolo a hae, kaha u sa ka ua qenehela bophelo ba hao, mohla sechaba sa heso se neng se kokobelitsoe; empa ua thibela timelo ea rona, ka ho tsamaea tseleng e otlolohileng ea Molimo oa rona.”

Sechaba sohle sa arabela, sa re: “Amen! Amen!”