JUDITHA 3

₁Joale maqosa a ile a romeloa ho eena ho kopa khotso ka ho re: ₂“Rona, bahlanka ba Khosi e Kholo Nebukadenesare, re itihela ka lifahleho ka pele ho uena. Etsa ka rona kamoo u ratang kateng. ₃Matlo a rona, le naha ea rona kaofela, le masimo 'ohle a rona a koro, le manku le makhomo a rona, le masaka 'ohle a liahelong tsa rona, ke tsa hao. Etsa ka tsona kamoo u ratang kateng. ₄Metse ea rona le baahi ba eona, le eona e ke e oele tlas'a hao ho u sebeletsa. Tloo, u kene ho eona ho ea ka boithatelo ba hao.”

₅Batho bana ba ea ho Holofernese, 'me ba tlisa molaetsa oo. ₆Eaba Holofernese o theohela lebopong la leoatle le lebotho la hae, a siea mabotho a balebeli metseng eohle e sirelelitsoeng, 'me har'a baahi ba eona a hira bahlabani ba khethehileng ho tlatsana le 'ona. ₇Batho ba metse ena, le ba naha e ka mathoko, ba mo amohela ba roetse mefapahlooho, ba tjeka ba ntse ba tilinya meropa. ₈Empa, leha ho le joalo, a liha liqalo tsa bona tsa borapeli, a rema meru ea bona e halalelang, a phethisa thomo ea hae hore ho ripitloe melimo eohle ea libaka tseo, e le hore lichaba li khumamele Nebukadenesare feela, le hore batho ba lipuo tsohle le meloko eohle ba mo rapele joaloka molimo.

₉Ka mokhoa oo a fihla malebana le Jesereele, haufi le Dotane, motse o shebaneng le mokoloko oa lithaba tsa Judea. ₁₀A lara pakeng tsa Geba le Bete-Sheane, 'me a hlola khoeli eohle ea ho sikilela lebotho la hae tsohle tse hlokahalang.