Komello e kholo
1Lena ke lentsoe la Morena, le ileng la fihla ho Jeremia malebana le komello:
2“Juda e bofifing,
metse e shoa ke lenyora,
chaba se rapaletse fatše,
se apere bofifi,
sello sa Jerusalema
le sona se hlaba holimo!
3Mahosana a rōmetse bahlanka
ho ea kha metsi,
ba fihla lilibeng,
ba fumana li se na metsi;
ba khutla linkho tsa bona li le feela,
ba hlabiloe ke lihlong, ba tsielehile,
matsoho ba a beile holim'a lihlooho.
4Naha e omeletse
hobane pula ha e eo,
balemi le bona
pelo tsa bona li nyahame,
matsoho ba a beile holim'a lihlooho.
5Khama le eona
e tsoaletse har'a naha,
e siile lelinyane
hoja e qeta ho le tsoala,
e le siea
hobane naha e se na joang.
6Tonki tse hlaha,
holim'a maralla a phollatsi,
li fofonela moea
joalokaha eka ke liphokojoe,
mahlo a tsona aa eba,
hobane joang ha bo eo!”
7Oho, Morena,
leha re qōsoa ke libe tsa rōna,
ak'u re thuse
ka baka la lebitso la hao.
Re khelohile haholo,
re fela re u sitetsoe!
8Oho, uena tšepo ea Iseraele,
Mopholosi oa eona
ka nako ea litsietsi,
ke hobane'ng
u kang moeti naheng ee,
u kang motsamai
ea fapohelang ho robaletsa?
9Ke hobane'ng
u kang motho ea tsielehileng?
U kang senatla
se sitoang ho re pholosa?
Oho, Morena, uena u har'a rōna,
uena u itse re sechaba sa hao;
oho, se re furalle ke hona!
10Morena o bua tjena ka sechaba sa hae:
“Se rata ho lelera haholo,
se sitoa ho thibela maoto a sona.
Kahoo Morena ha a se amohele,
joale o tla hopola bokhopo ba sona,
a se otle ka baka la libe tsa sona.”
11Joale Morena a re ho 'na: “U se ke ua rapella katleho ea sechaba sena. 12Leha se ka itima lijo, nke ke ka mamela sello sa sona; leha se ka etsa linyehelo tsa secheso, le linyehelo tsa lino, tsena nke ke ka li amohela. Empa ke tla se timetsa ka sabole, le ka sekoboto, le ka lefu la seoa.”
13Eaba ke re: “Ao! Morena Molimo, ak'u bone! Ke baporofeta ba ntseng ba re ho sona: ‘Le ke ke la bona sabole kapa la bolaoa ke sekoboto. Ruri ke tla le nea khotso ea kamehla eohle sebakeng sena.’ ”
14Joale Morena a re ho 'na: “Baporofeta ba porofeta leshano ka lebitso la ka. Ha ke e-s'o ka ke ba rōma, kapa ho ba laela, leha e le ho bua le bona. Ba porofeta lipono tsa bohata, le bonohe ba leshano, le lintho tsa mafeela, le lithetso tse tsoang lipelong tsa bona.” 15Ka baka lena, Morena o bua tjena ka baporofeta bana ba porofetang ka lebitso la hae: “Ha ke e-s'o ka ke ba rōma, empa bona ba re: ‘Ha ho na ho ba le sabole kapa sekoboto naheng ena.’ Baporofeta bao ba tla bolaoa ka sabole, ba bolaoe ke sekoboto.
16“Sechaba seo ba se porofetelang, se tla lahleloa literateng tsa Jerusalema ka baka la sekoboto le sabole. Ha ho ea tla se epela, kapa ea tla epela basali ba sona, bara ba sona kapa barali ba sona. Ke tla se lihela koluoa ka baka la bokhopo ba sona.
17“Ka baka leo, u tl'u se bolelle mantsoe ana:
“ ‘Mahlo a ka a ke a keleketle likeleli,
li keleketle bosiu le motšeare,
li keleketle li se ke tsa khaotsa,
hoba morali oa moroetsana,
e leng chaba sa ka,
o qhemelitsoe, a etsoa litsekana,
maqeba a hae ha a ka ke a fola.
18Ha ke tsamaea ke kena har'a naha,
ke bona ba bolailoeng ka sabole!
Ha ke re ke kena kahar'a motse,
ke bona ba bolailoeng ke sekoboto!
Moporofeta le moprista
ka ho tšoana
ba lelera har'a naha
ba sa e tsebe.’ ”
Sechaba se ipiletsa ho Morena
19“Na u fela u lahlile Juda ho hang?
Na u fela u se u nyonya Sione?
Ke hobane'ng ha u re otlile,
re se na pheko?
Re ne re lebeletse khotso,
empa molemo ha re o fumane;
re ne re lebeletse
nako ea ho folisoa,
empa re bona litsietsi feela!
20Morena, re ipolela bokhopo,
bokhopo ba rōna;
re bolela le molato,
molato oa bo-ntat'a rōna,
hobane re fela re u sitetsoe.
21Ka baka la bitso la hao
u se ke ua re nyonya,
u se ke ua tlontlolla
terone e tlōtlehang ea hao.
Hopola selekane
seo u se entseng le rōna,
u se hopole,
u se ke ua se felisa.
22Har'a melingoana ea mafeela,
melingoana ea balichaba,
na o teng
o ka tsebang ho nesa pula?
Na leholimo
le theola mafafatsane ka bolona?
Na hase uena Morena,
Molimo oa rōna?
Ka baka leo, rōna re tšepile uena,
hoba tsena tsohle li etsoa ke uena.”
