Tšepo ea kamoso
1“Ho malimabe balisa ba timetsang linku tsa makhulo a ka, ba li qhale,” ho rialo Morena. 2Ka baka lena, Morena Molimo oa Iseraele, o bua tjena malebana le balisa ba alosang sechaba sa hae: “Le qhalile mohlape oa ka, la o leleka, 'me ha lea ka la o hlokomela. Bonang, ke tla le otla ka baka la bokhopo ba liketso tsa lōna,” ho rialo Morena. 3“'Na ka seqō, ke tla bokella masalla a mohlape oa ka linaheng tsohle tseo ke neng ke o leleketse ho tsona, ke boele ke o khutlisetse masakeng a oona, 'me o tla tsoala, o anafale. 4Ke tla o khethela balisa ba tla o alosa. Ha o sa tla hlola o tšaba letho, kapa o tsieleha, 'me ha ho le e 'ngoe ea oona e tla lahleha,” ho rialo Morena.
5“Bonang, matsatsi aa tla,”
ho rialo Morena,
“ao ka 'ona ke tla tsosa
lehlōmela le lokileng la Davida,
khosi e tla busa,
e sebetse ka bohlale,
e sebetse ka toka
le ka ho loka lefatšeng.
6Mehleng ea khosi eo,
Juda e tla pholosoa,
Iseraele le eona
e iphelele ka khotso.
Lebitso le tla reoa khosi eo
ke lena:
Morena ke eena
ho loka ha rōna.
7“Ka baka leo, matsatsi aa tla,” ho rialo Morena, “ao ka 'ona ba ke ke ba hlola ba re: ‘Re hlapanya ka Morena ea phelang, ea nyolotseng bana ba Iseraele naheng ea Egepeta.’ 8Empa ba tla re: ‘Re hlapanya ka Morena ea phelang, ea ileng a ntša litlōhōlō tsa ntlo ea Iseraele naheng e ka lebōea, le linaheng tsohle tseo a neng a li leleketse ho tsona,’ 'me li tla aha naheng ea tsona.”
Baporofeta ba bohata
9Malebana le baporofeta, Jeremia o re:
Pelo ea ka e nyahame kahare ho 'na,
e nyahamisitsoe ke baporofeta;
masapo a ka 'ohle
a kenoe ke thōthōmelo.
ka baka la Morena
le mantsoe a halalelang a hae,
ke se ke itšoanela
le monna oa letahoa,
ke tšoana le monna
ea itlōpileng veine.
10Naha ena eohle
e s'e tletse lifèbè,
ka baka la thōhako
naha e apere bofifi,
makhulo a lithota a omeletse.
Tsela tsa lifèbè tsena ke tse khopo,
matla a tsona ha a sebelisoe ka toka.
11“Baporofeta le baprista
bobeli ba silafetse,
e, ka tlung ea ka
ke fumane bokhopo ba bona,”
ho rialo Morena.
12“Tsela ea bona e tla thèlla,
e thelle joaloka e lefifing,
ba tla kharametsoa,
ba oele fifing leo,
hobane ke tla theolela koluoa
holim'a bona, ka selemo sa kotlo,”
ho rialo Morena.
13“Ke bone sebe
sa baporofeta ba Samaria,
ba porofetile ka Baale,
ba khelosa chaba sa ka sa Iseraele.
14Har'a baporofeta ba Jerusalema
ke bone se tšosang:
Ba etsa bofèbè,
ba phela ka ho bua mashano,
ba bile ba khothaletsa batho
ho etsa bokhopo,
hoo ho seng ea furallang
bokhopo ba hae.
Kaofela ha bona
ho 'na ba tšoana le ba Sodoma,
baahi ba teng
ba tšoana le ba Gomora hantle.”
15Ka baka leo, Morena oa mabōtho o bua tjena malebana le baporofeta:
“Bonang, ke tla ba noesa lengana,
ke ba noese metsi
a babang sa leshokhoa,
hobane ho silafala
ho tletseng kahar'a naha
ke ho tsoang ho baporofeta,
baporofeta ba Jerusalema.”
16Morena oa mabōtho o bua tjena:
“Le se ke la mamela
mantsoe a baporofeta,
ba le porofetelang
ka ho le bolella mafeela;
ba bua ka lipono tse tsoang
mehopolong ea bona,
e seng tse tsoang
ka molomong oa Morena.
17Ho ba 'nyelisang,
baporofeta ba re ho bona:
‘Morena o boletse hore
le tla phela ka khotso;’
ho ba latelang pelo tsa bona
tse manganga, ba re:
‘Ha ho na koluoa
e tla le oela holimo!’
18Ke ofe ho bona
ea kil'a ba lekhotleng la Morena?
Ke ofe ea kil'a 'mona,
a b'a utloa ntsoe la hae?
Ke ofe ea kil'a utloa
ntsoe la hae, a le mamela?
19Tsokotsane sa Morena se tsohile,
se tsohile ka sekhahla le ka khalefo,
ka sekhahla,
ba khopo sea ba tsukutla.
20Khalefo ea Morena
ha e ka ke ea khaotsa,
ho fihlela e phethahatsoa ke eena,
ho fihlela a phethile merero ea hae;
sena le tla se utloisisa
mehleng ea ho qetela.
21Baporofeta bana
ha kea ka ka ba rōma,
empa ba ile ba ea ba potlakile;
ha ke e-s'o ka ke bua le bona,
empa bona ba porofetile.
22Ha ba ne ba bile teng
khotleng la ka,
ba ka be ba entse hore
chaba sa ka se utloe mantsoe a ka,
ba se khelositse
tsela tsa sona tse khopo,
ba se khutlisitse
ketsong tsa sona tse khopo.”
23Morena o re:
“Ke Molimo ea teng hohle,
ea teng hole le haufi.
24Na motho a ka ipata
likhocheletsaneng,
a ipata teng, eaba ha ke 'mone?”
ho rialo Morena.
“Na ha ke fumanoe
leholimong le lefatšeng?”
ho rialo Morena.
25“Ke utloile se boleloang ke baporofeta bana ba porofetang mashano ka lebitso la ka, ba re: ‘Ke lorile! Ke lorile!’ 26Baporofeta baa ba tla porofeta mashano ho fihlela neng? E, ke baporofeta ba porofetang mashano a tsoang mehopolong ea bona. 27Ka litoro tsena tseo ba li bolellanang, ba nahana hore ba tla etsa hore sechaba sena sa ka se lebale lebitso la ka, joalokaha bo-ntat'a bona ba ile ba lebala lebitso la ka ka baka la Baale. 28Moporofeta ea lorileng toro a ke a bolele toro eo, le ea tsebang lentsoe la ka a ke a le bolele ka botšepehi. 'Mōkō ke eng, ha o bapisoa le koro?” ho rialo Morena. 29“Na lentsoe la ka ha le tšoane le mollo?” ho rialo Morena. “Na ha le tšoane le hamore e thuang mafika, e a etse maqhetsoana?
30“Ka baka leo, ke hanyetsana le baporofeta ba utsoang mantsoe a ka ka ho a nka melomong ea ba bang,” ho rialo Morena. 31“Ke hanyetsana le baporofeta ba buang ka maleme a bona, ba re: ‘Morena o re,’ ” ho rialo Morena. 32“Ke hanyetsana le ba porofetang litoro tsa mashano, ba be ba li bolele, ba etse hore sechaba sa ka se khelohe ka baka la mashano ao a bona le boithoriso boo ba bona, athe ke ne ke sa ba rōma, le ho ba laela ke sa ba laela,” ho rialo Morena. “Ka baka lena, ha ba etsetse sechaba sena molemo,” ho rialo Morena.
Molaetsa oa Morena
33“Ha u ka botsoa ke sechaba sena, kapa ke baporofeta, kapa ke baprista, ha thoe: ‘Molaetsa oa Morena ke ofe?’ Uena u tle u re ho bona: ‘Molaetsa oo ke lōna! Ke tla qetella ke le lahlile,’ ho rialo Morena. 34Ha e le moporofeta, kapa moprista, kapa e mong oa sechaba ea ka reng: ‘Molaetsa oa Morena,’ motho eo ke tla mo otla hammoho le lelapa la hae lohle. 35Kahoo motho ka mong o tla re ho mohahabo, kapa motho ka mong a re ho ngoan'abo: ‘Karabo ea Morena ke efe? Morena o itse'ng?’ 36Ha le ka ke la hlola le bua ka molaetsa oa Morena hape, hobane lentsoe la motho ka mong e tla ba lona molaetsa oa hae. Le sokamisitse mantsoe a Molimo ea phelang, a Morena oa mabōtho, Molimo oa rōna. 37Uena u tle u bue tjena ho moporofeta, u re: ‘Morena o u arabetse ka ho re'ng? Morena o itse'ng?’
38“Empa erekaha le re: ‘Molaetsa oa Morena,’ 'me ke ile ka le tsebisa, ka re: ‘Le se ke la re: “Molaetsa oa Morena,” ’ Morena o bua tjena: ‘Le sebelisitse mantsoe ana: “Molaetsa oa Morena,” ’ le hoja ke ile ka le bolella ka re le se ke la re: ‘Molaetsa oa Morena;’ 39ka baka leo, bonang, 'na, e leng 'na, ke tla le lebala ho hang, ke le furalle le motse ona oo ke neng ke o nee lōna le bo-ntat'a lōna, ebe ke le leleka mahlong a ka. 40Ke tla le soabisa kamehla eohle, ke le hlabise lihlong, tse ke keng tsa lebaloa ka mehla eohle.”
