Baruke o bala buka ka Tempeleng
1Ka selemo sa bone sa puso ea Jehoeakime, mora oa Josiea, khosi ea Juda, lentsoe lena le tsoang ho Morena la fihla ho Jeremia, la re: 2“Nka buka, u ngole ho eona mantsoe 'ohle ao ke a buileng ho uena ka Iseraele le Juda le lichaba tsohle, ho tloha mohla ke neng ke bua le uena, mehleng ea Josiea, ho fihlela kajeno lena. 3Mohlomong ba morabe oa Juda ba tla utloa likoluoa tsohle tseo ke rerileng ho ba lihela tsona, 'me motho ka mong a bake mekhoeng ea hae e mebe, ebe ke ba tšoarela bokhopo ba bona le sebe sa bona.”
4Eaba Jeremia o bitsa Baruke, mora oa Neriea. Baruke a ngola mantsoe 'ohle a tsoang molomong oa Jeremia, ao Morena a neng a a buile ho eena, a a ngola bukeng. 5Jeremia a bolella Baruke, a re: “'Na ke thibetsoe, nke ke ka ea ka Tempeleng ea Morena; 6ka baka leo, uena tsamaea, u e'o bala litaba tseo u li ngotseng bukeng li e-tsoa molomong oa ka, e leng mantsoe a Morena; u li balle ka Tempeleng ea Morena, moo sechaba se ntseng se utloa, mohl'a letsatsi la ho itima lijo. U be u li balle le bohle ba morabe oa Juda ba tsoang metseng ea bona. 7Mohlomong ba tla ithapella ho Morena, 'me motho ka mong a khutle tseleng ea hae e khopo, hobane khalefo eo Morena a halefetseng sechaba sena ka eona e kholo.”
8Eaba Baruke, mora oa Neriea, o phetha tsohle tseo moporofeta Jeremia a mo laetseng tsona, a bala mantsoe a Morena bukeng, a le ka Tempeleng ea Morena.
9Ka khoeli ea borobong ea selemo sa bohlano sa puso ea Jehoeakime, mora oa Josiea, khosi ea Juda, ha phatlalletsoa sechaba sohle sa Jerusalema, le sechaba sohle se tlileng Jerusalema se e-tsoa metseng ea Juda, letsatsi la ho itima lijo moo Morena a leng teng. 10Eaba Baruke o bala mantsoe a Jeremia bukeng eo, eena a le ka Tempeleng ea Morena, ka kamoreng ea Gemariea, mora oa Shafane, eo e neng e le mongoli oa puso. Kamore ena e ne e le lebaleng le kaholimo, khorong ea Monyako o Mocha oa Tempele ea Morena. A a bala moo sechaba sohle se ntseng se utloa.
Babusi ba balloa buka
11Eare hoba 'Mikiea, mora oa Gemariea, setlōhōlō sa Shafane, a utloe mantsoe 'ohle a Morena a tsoang bukeng, 12a theohela tlung ea khosi, a kena ka kamoreng ea mongoli oa puso. Ka teng a fumana mahosana 'ohle a lutse, e leng: Eleshama, eo e neng e le mongoli oa puso, le Delaea, mora oa Shemaea, le Elenathane, mora oa Akabore, le Gemariea, mora oa Shafane, le Sedekiea, mora oa Hananiea, le mahosana a mang 'ohle. 13Eaba 'Mikiea o ba bolella mantsoe 'ohle ao a a utloileng a baloa ke Baruke bukeng, moo sechaba sohle se ntseng se utloa. 14Ka baka leo, mahosana 'ohle a rōma Jehudi, mora oa Netaniea, setlōhōlō sa Shelemiea, setlōhōloana sa Kushi, ho Baruke, a re: “Nka buka eo u ileng ua e balla sechaba, u tle le eona koano.” Eaba Baruke, mora oa Neriea, o nka buka, o ea ho mahosana. 15Mahosana a re ho eena: “Lula fatše, u re balle buka, re utloe.” Baruke a a balla eona.
16Eare hoba mahosana a utloe mantsoe ao 'ohle, a shebana a tšohile haholo, a re: “Ruri re tla tsebisa khosi litaba tsena tsohle!” 17Mahosana a botsa Baruke, a re: “Ak'u re bolelle: Mantsoe aa ao u a ngotseng a tsoa kae? Na a tsoa molomong oa Jeremia?”
18Baruke a araba mahosana, a re: “Jeremia o ile a bua mantsoe ana 'ohle ho 'na, eaba 'na ke a ngola bukeng ena ka enke.”
19Eaba mahosana a re ho Baruke: “Uena le Jeremia tsamaeang le e'o ipata, ho se be motho ea tsebang moo le leng teng!”
Khosi e chesa buka
20Mahosana a bea buka ka kamoreng ea Eleshama, eo e neng e le mongoli oa puso, a nt'o ea ho khosi ka lapeng, a e bolella mantsoe 'ohle a buka moo e ntseng e utloa. 21Khosi ea rōma Jehudi ho ea lata buka, 'me a e nka ka kamoreng ea Eleshama, mongoli oa puso. Jehudi a e balla khosi le mahosana a neng a e-na le khosi. 22E ne e le ka khoeli ea borobong, 'me khosi e lutse ka kamoreng eo e lulang ka ho eona mariha, e orile mollo. 23E ne e ee e re ha Jehudi a balile maqephe a mararo kapa a mane, khosi e a sehe ka thipa, e a lahlele mollong o ntseng o tuka ifo, ho fihlela buka eohle e e-cha lore! mollong oo o ntseng o tuka ifo. 24Empa mahosana ha aa ka a tšoha, kapa a hahola liaparo tsa 'ona; esita le eona khosi kapa e mong feela oa bahlanka ba eona ba ileng ba utloa mantsoe ana 'ohle. 25Elenathane le Delaea le Gemariea ba ne ba ile ba rapela khosi hore e se ke ea chesa buka, empa khosi ea se ke ea ba mamela. 26Eaba khosi e laela khosana Jerahameele, le Seraea, mora oa Aseriele, le Shelemiea, mora oa Abedele, hore ba tšoare Baruke, eo e neng e le mongoli, le moporofeta Jeremia, empa Morena a ba pata.
Jeremia o ngola buka e 'ngoe hape
27Hoba khosi e chese buka le mantsoe 'ohle ao Baruke a neng a a ngotse a e-tsoa molomong oa Jeremia, lentsoe la Morena la fihla ho Jeremia, la re: 28“Nka buka e 'ngoe hape, 'me ho eona u ngole mantsoe 'ohle a neng a ngotsoe bukeng ea pele eo Jehoeakime, khosi ea Juda, a ileng a e chesa. 29U be u bolelle Jehoeakime, khosi ea Juda, u re: ‘Morena o bua tjena: U ile ua chesa buka ena, ua re: Ke ka baka la'ng ha u ngotse bukeng ee, ua re: Ruri khosi ea Babilona e tla tla e timetsa naha ena, 'me e felise batho le liphoofolo?’ 30Ka baka leo, Morena o bua tjena ka Jehoeakime, khosi ea Juda: ‘Jehoeakime ha a na ho ba le mora ea tla lula teroneng ea Davida; setōpō sa hae se tla lahleloa ntle, motšeare se chesoe ke lebatama la letsatsi, bosiu se laloe ke serame. 31Eena le bana ba hae le bahlanka ba hae ke tla ba otlela bokhopo ba bona. Bona le baahi ba Jerusalema le baahi ba Juda, ke tla ba lihela koluoa eo ke ba boleletseng hore ke tla e lihela holim'a bona, hobane ha baa ka ba 'mamela.’ ”
32Eaba Jeremia o nka buka e 'ngoe hape, o e nea Baruke, mora oa Neriea, 'me Baruke, kaha e ne e le mongoli, a ngola mantsoe 'ohle a tsoang molomong oa Jeremia, a neng a le bukeng eo Jehoeakime, khosi ea Juda, a ileng a e chesa mollong. Ha eketsoa le mantsoe a mang a mangata, a tšoanang le a pele.
