JEREMIA 47

“Metsi ke ao,

a phorosela ho tsoa lebōea,

a tla ka sekhahla

se kang sa sekhōhōla,

a tla aparela naha

le tsohle tse ho eona,

a aparele metse

le baahi ba eona bohle.

Banna ba tla tšoha

ba hlabe mokhosi,

baahi bohle ba naha

bona ba bokolle.

₃Ha ho utloahala

molumo oa litlhako,

oa litlhako tsa lipere tsa hae,

ho utloahala lekharakhara,

lekharakhara la kariki

tsa hae tsa ntoa,

ho utloahala le molumo

oa mabili a tsona,

bo-ntat'a ha ba sa tla natsa

le bana ba bona,

hobane matsoho a bona

a tla be a fokola.

₄Tsatsi le fihlile,

tsatsi la ho timetsa Bafilesita,

basireletsi ba Tire le Sidone

ba tla felisoa,

hobane Morena

o tla timetsa Bafilesita,

masalla a sehlekehleke sa Kafatore.

₅Gasa e tla ba bofifing,

e beole hlooho,

Ashekelone eona e tla ripitloa.

Lōna masalla a chaba sa Baanake,

le tla itlhōkōfatsa,

le lle ho fihlela neng?

₆Uena sabole ea Morena,

u tla phomola neng?

Boela selateng sa hao,

u phomole, u ikhutsetse.

₇E ka khutsa joang,

Morena a e neile taelo,

taelo ea ho futuhela Ashekelone,

ea ho futuhela naha

tse bōpong la leoatle?

Ke hona moo Morena

a e laoletseng teng.”