JOBO 28

₁“Silefera

e na le morafo oa eona,

khauta

e na le setšèkèlo sa eona;

₂tšepe eona e chekoa

e e-tsoa katlas'a lefatše,

lethose le fumanoa

ka ho qhibilisa moralla.

₃Motho o kenella hare

mpeng ea lefatše,

a e'o fihla khocheletsaneng tse hōle,

a etse merafo

har'a lefifi le letšo-letšo.

₄O cheka chafo

hōle le leaho la batho,

bakeng tseo

leoto le e-s'o hate ho tsona;

a leketle marapong

a le hōle le batho,

a tsokotsehe, a ee koana le koana.

₅Lijo li mela kaholim'a lefatše,

katlase le fuluuoa

joalokaha ho fuluuoa mollo.

₆Majoe a lona

a bōpeletsoe le lisafire,

a bile a na le mereto ea khauta.

₇Tsela ea teng

ha e tsejoe le ke letlaka,

esita le phakoe

ha e e-s'o ka e e bona.

₈Batana tsa naha

ha li e-s'o tsamaee ho eona,

esita le tau ha e e-s'o fete le moo.

₉“Lejoe la moremaphofu

motho oa le thuaka,

thaba a li fure methèong ea tsona.

₁₀Har'a mafika a phunyake mesèlè,

mahlo a hae a bone tsa bohlokoa

li le mefuta.

₁₁Metsi a rothelang ka merafong

oa a thibela,

tse patehileng a li bee 'mananeng,

li bonoe ke bohle.”

₁₂“Ebe joale bohlale

re ka bo fumana kae?

Lehae la kutloisiso lona

le fumanoa kae?

₁₃Bohlale ha bo fumanoe

fatšeng la ba phelang,

ha ho ea utloisisang

bohlokoa ba bona.

₁₄Boliba bo re:

‘Ka ho 'na bohlale ha bo eo!’

Leoatle le re:

‘Le ho 'na bohlale ha bo eo!’

₁₅Ka khauta e hloekisitsoeng

bo ke ke ba rekoa,

kapa theko ea bona ea methoa

ka boima ba silefera.

₁₆Ka khauta ea Ofire

bo ke ke ba rekoa,

kapa ka kareneleane

le safire ea bohlokoa.

₁₇Khauta kapa mahakoe

a ke ke a lekana le bona.

kapa ba ananngoa

ka mekhabiso ea khauta.

₁₈Likhetla le mahakoe

tsona ha li sa boleloa;

theko ea bohlale

e feta le mabenyane a bohlokoa.

₁₉Joe la bohlokoa la Kushe

le ke ke la lekana le bona,

ka khauta e hloekisitsoeng

bo ke ke ba rekoa.”

₂₀“Ebe joale bohlale bo tsoa hokae?

Lehae la kutloisiso lona le hokae?

₂₁Bo patetsoe libōpuoa tsohle,

bo patetsoe le tsona

nonyana tse fofang.

₂₂Timelo le lefu le tsona li re:

‘Re utloa bo-fuufu ha ba bo bolela.’

₂₃“Ke Molimo feela

ea tsebang tsela ea bona,

ke eena feela

ea tsebang habo bohlale,

₂₄hoba o bona pheletso tsa lefatše,

o bona tsohle tse tlas'a maholimo.

₂₅Ha Molimo a nea moea

matla a oona,

le maoatle a a sehela moeli;

₂₆ha a ne a beela pula taelo,

lehalima le lona a le betlela tsela,

₂₇o il'a bona bohlale, a bo hlahloba,

a bo leka, a bo ananela.

₂₈“Eaba o re ho motho:

‘Ho tšaba Morena

ke bona bohlale;

ho furalla bokhopo

ke eona kutloisiso.’ ”