JOBO 32

“Ke sa le 'motlana,

lōna le tsofetse,

ka hona ke ile ka itšoara,

ka tšaba ho le bolella

seo ke se tsebang.

₇Ke ile ka nahana:

‘Eka khona baholo ba bue,

ba lemo li ngata ba rute bohlale.’

₈Empa ke moea o ka ho motho,

e leng moea oa Ea Matla 'ohle,

oona o neang motho kutloisiso.

₉Hase ba baholo feela

ba nang le bohlale,

kapa maqheku feela

a utloisisang ho lokileng.

₁₀Ka baka leo,

ke re le ke le 'mamele,

le 'na ke bolele seo ke se tsebang.

₁₁“Ke ile ka le emela

hore le ke le bue,

puo tsa lōna ka li thèèla tsèbè

ha le ntse le khetha mantsoe.

₁₂Ke fetse ka le mamela:

Ha ho le ea mong

ea shanofalitseng lipuo tsa Jobo,

kapa ea arabileng polelo tsa hae.

₁₃Hlokomelang, le se ke la re:

‘Rōna bohlale re bo fumane;

Molimo ke eena ea tla mo hlōla,

a ke ke a hlōloa ke motho.’

₁₄Polelo tsa Jobo

li ne li sa lebisoa ho 'na,

nke ke ka mo araba joaloka lōna.

₁₅“Banna bana ba nyahame lipelo,

ba se ba feletsoe ke likarabo,

mantsoe le 'ona aa ba haella.

₁₆Ebe nka lebella,

hobane ba sa arabe,

hobane ba themeletse,

ba se ba hloka puo?

₁₇Le 'na ke tla hlahisa ea ka karabo,

ke be ke bolele seo ke se tsebang.

₁₈Ke pipitlelane ke mantsoe,

moea oa ka o ntšusumetsa

hore ke bue;

₁₉fuba sa ka se ka veine e bitieletsoe,

se khatheng la ho phatloha

sa makuka a macha.

₂₀Ke tla bua,

ho pipitleloa ho fele;

ke tla tsoa molomo,

le 'na ke arabe.

₂₁Ha nka ke ka talima

tšobotsi ea motho,

ha nka ke ka kakamatsa

mang le mang.

₂₂Ha ke ne ke tseba ho kakamatsa,

'Mōpi oa ka o n'a ntlosa

ka ho panya ha ntši!”