Elehu o bontša ho loka ha Molimo
1Eaba Elehu o tsoela pele, o re:
2“Lōna bahlalefi
mamelang polelo tsa ka!
Lōna bo-tsebanyane
thèang tsèbè le 'mamele!
3Tsèbè e hloaea mantsoe
ha a buuoa,
joalokaha lijo
li latsuoa ke mahalapa.
4A re ikhetheleng
se lokileng ka borōna,
a re tsebeng
ka borōna se leng molemo.
5“Jobo o re:
‘'Na ha ke na molato,
empa Molimo o nkamohile
tokelo ea ka.
6Le hoja ke nepile tjena
ho thoe ke leshano,
le hoja ke se na sebe,
qeba la ka le hana ho fola.’
7“Motho ke ofe ea tšoanang le Jobo?
O momorotsa nyefolo
joalokaha metsi a nooa;
8eena o tsamaea
mokhatlong oa baetsalibe,
ba khopo
o tsamaisana tsela le bona;
9o re: ‘Motho a ke ke
a putsoa ka letho,
leha a leka ho khahlisa Molimo.’
10“Lōna bahlalefi,
'mameleng ke hona:
Molimo a ke ke
a b'a etsa bokhopo,
Ea Matla 'ohle a ke ke
a b'a etsa phoso.
11O putsa motho
ho ea ka mesebetsi ea hae,
o putsa motho
ho ea ka metsamao ea hae.
12Ruri Molimo a ke ke
a b'a etsa bokhopo,
Ea Matla 'ohle a ke ke
a khopamisa ho loka.
13O beiloe ho okamela lefatše
ke mang?
Fatše lohle lona le theiloe
ke mang?
14Haeba e n'e le morero oa hae,
a busetsa moea oa bophelo ho eena,
15tsohle tse phelang li ne li tla timela,
motho le eena a khutlele lerōleng.
16“Ha u le bohlale, ak'u mamele,
polelo tsa ka u li sekehèlè tsèbè!
17Na ea hloileng toka,
ho busa a ka ho tseba?
Kapa u ahlōla Ea Matla,
Ea Lokileng?
18Eena ea reng ho khosi:
‘U motho-likobo,’
ho mahosana:
‘Lōna le balotsana!’
19Ha a ee ka leeme
ha a sebeletsa babusi,
morui le mofutsana
ke litšoantšoang ho eena,
kahoba bohle ke 'mōpo
oa matsoho a hae.
20Ka ho panya ha ntši
ba shoa le har'a bosiu,
chaba se hlōkōlehe,
bona ebe ba iketse;
natla li nyamele
li sa angoa ke letsoho la motho!
21“Mahlo a hae a lisitse
metsamao ea batho,
mehato eohle ea batho
le eona oa e bona.
22Ha ho na lefifi le letšo-letšo,
moo baetsalibe
ba ka tsebang ho ipata.
23Molimo ha a hloke
ho balla batho linako
ho tla kahlōlong, kapele ho eena.
24O thuakanya bo-ramonatla
ho se na nyeoe,
tulong tsa bona ebe o bea ba bang.
25Ka baka leo,
mesebetsi ea bona oa e tseba,
ba phetholoa e le bosiu,
ebe baa phetšeloa.
26Molimo o ba otlela
bokhopo ba bona,
o ba otlela
pontšeng ea batho bohle,
27hobane ba khaolitse ho mo latela,
ha baa ka ba natsa
tsela tsohle tsa hae.
28Lillo tsa mafutsana
ba li fihlisitse ho eena,
lillo tsa bahlomohi
Molimo oa li utloa.
29“Haeba a ikhutsetsa
a ka nyatsoa ke mang?
H'a ipata sefahleho,
teng a ka bonoa ke mang?
O okametse batho le lichaba
ka ho tšoana.
30O thibela motho ea khopo ho busa,
a mo thibele
ha a chehela sechaba maraba.
31“Haeba motho
a ka re ho Molimo:
‘Ke ipona molato,
nke ke ka sitoa hape;
32ak'u nthute tseo ke sa li tsebeng,
haeba ke entse bokhopo
nke ke ka pheta hape;’
33na u re Molimo
a ee ka thato ea hao,
athe uena u nyatsa liketso tsa hae?
Boikhethelo ke ba hao,
hase ba ka,
kahoo uena bolela
seo u se tsebang.
34“Ba nang le kutloisiso
ba tla bolela,
banna ba bohlale,
ba nkutloang, ba re:
35‘Jobo o ipuela feela a se na tsebo,
polelo tsa hae bohlale lia bo hloka.’
36Jobo a 'n'a lekoe ho-ea-ho-ile,
hobane o araba sa batho ba khopo.
37Libe tsa hae
o li eketsa ka bofetoheli,
o etsa nyeliso moo re mo utloang,
ka polelo tse ngata
o nyelisa Molimo.”
