Jonase o hana taelo ea Morena
1Lentsoe la Morena la fihla ho Jonase, mora oa Amitai, la re: 2“Tsamaea, u ee Ninife, motseng o moholo, u e'o o khalemela, hobane ke bone bokhopo ba oona.”
3Empa Jonase a tsamaea, a balehela Tarashishe hore a be hōle le Morena. A theohela Jopo, moo a fumaneng sekepe se lebang Tarashishe. Hoba a lefelle leeto, a kena ka sekepeng, hore a tle a ee Tarashishe 'moho le basesisi ba sona, hōle le Morena.
4Eaba Morena o fōkisa moea o matla holim'a leoatle, 'me ha tsoha sefefo se tšabehang se ileng sa batla se thua sekepe. 5Basesisi ba sekepe ba tšoha, 'me e mong le e mong oa bona a ipiletsa ho molimo oa hae. Ba lahlela thōtō leoatleng, e le hore ba imolle sekepe.
Ha e le Jonase eena o ne a theohetse ka kamoreng e katlase ea sekepe, a ithobaletse, a ile le sephume sa boroko. 6Molaoli oa sekepe a tla ho eena, a re: “U hlola'ng, ha u robetse tjee? Tsoha, u ipiletse ho molimo oa hao! Mohlomong molimo eo oa hao a ka re hopola, ra se ke ra timela.”
7Eaba basesisi ba sekepe baa buisana, ba re: “Tloong, re laoleng ka lōtho, re tle re tsebe hore na ke ka baka la mang re oeloang ke koluoa ena.” Ba laola ka lōtho, 'me lōtho la ntša Jonase.
8Joale ba 'motsa, ba re: “Re bolelle hore na ke ka baka la mang re oeloang ke koluoa ena? Mosebetsi oa hao ke ofe? Hona u tsoa kae? Haeno ke hokae? Chaba sa heno ke sefe?”
9Jonase a ba araba, a re: “ 'Na ke Moheberu; ke khumamela Morena, Molimo oa leholimo, ea entseng leoatle le lefatše.”
10Banna bao ba tšoha haholo, ba 'motsa, ba re: “U entse'ng?” Ba ne ba tseba hore o baleha Morena, hobane o ne a se a ba boleletse.
11Eaba baa 'motsa, ba re: “Joale re u etse joang, e le hore leoatle le tle le kokobele?” Leoatle le ne le befile, le ntse le tuluana.
12A ba araba, a re: “Nkukeng, le nkakhele leoatleng, 'me leoatle le tla kokobela. Kea tseba hore ke ka baka la ka ha e le mona sefefo sena se matla se le befetse tjena.”
13Leha ho le joalo, banna bao ba leka ka matla ho sokela sekepe lebōpong, empa ba sitoa, hobane leoatle le ne le befile, le ntse le tuluana. 14Kahoo ba ipiletsa ho Morena, ba re: “Oho, Morena u se ke ua re timetsa, ua re re bolaile monna enoa. U se ke ua re bea molato oa ho tšolla mali a se nang molato, hobane uena Morena, u entse se u khahlang.”
15Eaba ba kakasa Jonase, ba mo akhela leoatleng, 'me maqhubu a kokobela. 16Banna bao ba tšoha haholo, ba nyehella Morena ka sehlabelo, 'me ba mo etsetsa likano tse itseng.
17Eaba Morena o laela leruarua ho metsa Jonase. Jonase a ba ka mpeng ea leruarua leo ka matsatsi a mararo le masiu a mararo.
