JONASE 4

₁Jonase a utloa bohloko haholo, 'me a halefa. ₂Eaba o rapela Morena, o re: “Kea u rapela, oho, Morena, na see hase seo ke ileng ka se bolela ke sa le haeso? Ke ka lebaka leo ke ileng ka itlhahanela ho balehela Tarashishe. Ke tsebile hore u Molimo ea mosa, ea nang le kutloelo-bohlōkō; u lieha ho halefa, u tletse mohau, u lieha ho otla. ₃Ka baka leo, oho, Morena, mpe u mpolaee, hobane ho molemo ho 'na hore ke shoe, ho e-na le hore ke 'ne ke phele.”

₄Empa Morena a mo araba, a re: “Na u etsa hantle ha u halefa?”

₅Jonase a tsoela kantle ho motse, a lula fatše ka nq'a bochabela ho oona, a iketsetsa lephèphè hona moo. A lula moriting oa lona, a lebella se tla hlahela motse. ₆Morena Molimo a melisa sefate, sa thathalatsa mahlaku, a etsetsa Jonase moriti, hore a tle a phomole ho oona. Jonase a thabela sefate seo haholo. ₇Empa ka le hlahlamang, e sa le kameso, Molimo a rōmela sebōkō se ileng sa e-ja moko oa sefate seo, eaba sea pona. ₈Ha letsatsi le chaba, Molimo a tsosa moea o chesang, o hlahang bochabela, 'me letsatsi la bataola Jonase hloohong, hoo a bileng a akheha. A itakaletsa lefu, a re: “Ho ka ba molemo ho 'na hore ke shoe, ho e-na le hore ke 'ne ke phele.”

₉Empa Molimo a botsa Jonase, a re: “Na ke hantle ha u khenne ka baka la sefate see?”

Jonase a mo araba, a re: “E, ke hantle; ebile ke khenne hoo nka 'nang ka shoa.”

₁₀Eaba Morena o re: “U qenehela sefate sena seo u sa kang ua se fufulelloa, leha e le ho se melisa. Se imeletse ka bosona e le bosiu, sa ba sa ichoella e le bosiu. ₁₁Na 'na nke ke ka hauhela Ninife, motse oa setlètlèhali, o nang le baahi ba fetang likete tse lekholo le mashome a mabeli, ba sa tsebeng ho khetholla botle ho bobe; o bileng o nang le liphoofolo tse ngata hakaale?”