Joshua o hlōla Jabine le bathusi ba hae
1Ha Jabine, khosi ea Hasore, a utloa litaba tsena, a rōmela molaetsa ho Jobabe, khosi ea Madone, le ho khosi ea Shimerone, le khosi ea Akashafe. 2A o rōmela le ho likhosi tsohle tse ka leboea, naheng e maralla, le Leoatleng la Letsoai ka boroa ho Kinerete, le liphuleng le maralleng a Dore, ka bophirimela. 3A o rōmela le ho Bakanana, ka bochabela, le ka bophirimela; le ho Baamore, le ho Bahete, le ho Baperise, le ho Bajebuse ba naheng e maralla; le ho Bahife ba neng ba le mosikong oa thaba ea Heremone, naheng ea Misepa. 4Bana ba futuha, e le bona le mabōtho 'ohle a bona. E ne e le batho ba bangata, ba joaloka lehlabathe le lebōpong la leoatle; e le letšoele, le lipere, le likariki tsa ntoa tse ngata. 5Likhosi tsena tsohle tsa kopanya mabotho, 'me hammoho tsa fihla tsa hloma metsing a Merome, ho loantša Baiseraele.
6Morena a re ho Joshua: “U se ke ua ba tšaba, hobane hosasane, ka eona nako ena, ke tla neelana ka bona ho Baiseraele e se e le litōpō. U tla khaola mesifa ea lipere tsa bona, likariki tsa bona tsa ntoa tsona u li chese ka mollo.”
7Joshua le bahlabani bohle ba neng ba e-na le eena ba ba futuhela ka tsometso ha ba le metsing a Merome, ba ba loantša. 8Morena a neelana ka bona matsohong a Baiseraele, ba ba bolaea, ba ba phalalisa ho ea fihla Sidone e Kholo, le ho ea fihla Miserefote-Maime, le ho ea fihla khohlong ea Misepa, ka bochabela. Ba ba bolaea, ba se ke ba siea le ea mong. 9Joshua a ba etsa joalokaha Morena a ile a mo laela. A khaola mesifa ea lipere tsa bona, likariki tsa bona tsa ntoa tsona a li chesa ka mollo.
Joshua o hapa naha eohle
10Ka eona nako eo Joshua a khutla, a hapa Hasore, 'me khosi ea teng a e bolaea ka sabole. Pele ho moo, Hasore e ne e le oona motse oa moreneng oa mebuso eo. 11Batho bohle ba neng ba phela moo ba ba bolaea ka sabole, 'me ba ba timetsa ho hang, ha se ke ha sala le ea mong ea phelang. Motse oa Hasore ba o chesa ka mollo.
12Joshua a hapa metse eohle ea likhosi tseo, a hapa le likhosi tsa eona, a li bolaea ka sabole, 'me a li timetsa ho hang, joalokaha Moshe, mohlanka oa Morena, a ne a ile a laela. 13Empa ha e le metse eohle e holim'a lithaba, eona Baiseraele ha baa ka ba e chesa, haese Hasore feela, eo Joshua a ileng a e chesa. 14Bana ba Iseraele ba inkela thepa eohle ea metse ena, le liphoofolo, e le khapo ea bona. Empa banna bohle bona ba ba bolaea ka sabole, ho fihlela ba ba timetsa; ba se ke ba siea le ea mong ea phelang. 15Joalokaha Morena a ne a ile a laela Moshe, mohlanka oa hae, le Moshe a laela Joshua joalo, 'me Joshua a etsa joalo. Ha ho letho la tsohle tseo Morena a neng a li laele Moshe, leo Joshua a sa kang a le phetha.
16Ka mokhoa o joalo, Joshua a hapa naha eo eohle, e maralla, le naha eohle e ka boroa, le naha eohle ea Goshene, le naha e liphuleng, le naha ea Araba, le naha e maralla ea Iseraele, le liphula tsa eona. 17Ho tloha thabeng ea Halaka, ho ea fihla Seire, le ho ea fihla Baale-Gade, khohlong ea Lebanone, mosikong oa thaba ea Heremone, Joshua a hapa likhosi tsohle tsa linaha tsena, a li otla, 'me a li bolaea. 18Joshua a loantša likhosi tsena ka nako e telele. 19Ha ho motse le o mong o ileng oa etsa khotso le bana ba Iseraele, haese oa Bahife feela, e leng oa baahi ba Gibeone; e meng eohle ba ile ba e hapa ntoeng. 20Morena o ne a thatafalitse lipelo tsa bona, hore ba tle ba loantše Baiseraele, e le hore ba tle ba timetsoe ho hang, ba se ke ba hauheloa; ba timetsoe joalokaha Morena a laetse Moshe.
Baanake baa felisoa
21Ka eona nako eo, Joshua a fihla a felisa Baanake naheng e maralla, le Heborone, le Debiri, le Anabe, le naheng eohle e maralla ea Juda, le naheng eohle e maralla ea Iseraele. Joshua a ba timetsa ho hang, 'moho le metse ea bona. 22Ha ho le ea mong oa Baanake ea ileng a sala naheng ea bana ba Iseraele, haese Gasa, le Gate, le Ashedode feela, moo methoaela e ileng ea sala. 23Ka mokhoa o joalo Joshua a hapa naha eohle, ho ea ka tsohle tseo Morena a ileng a li laela Moshe. Joshua a nea Baiseraele naha eo e le lefa la bona, ho ea ka likarolo tsa bona, le ka merabe ea bona.
Joale naha ea phomola, ea hloka ntoa.
