Naha eo ba tla e hapa
1Joshua o ne a tsofetse, 'me lilemo tsa hae li se li ile. Morena a re ho eena: “U tsofetse, 'me lilemo tsa hao li ile, empa ho sa setse naha e kholo, e lokelang ho hapuoa.
2“Ena ke naha e sa setseng: Litereke tsohle tsa Bafilesita, le tsohle tsa Bageshure. 3E tloha Shihore e ka bochabela ho Egepeta, ho ea fihla moeling oa Ekerone, ka leboea, eo e leng ea Bakanana. Ke ea mahosana a mahlano a Bafilesita, e leng a Gasa, le a Ashedode, le a Ashekelone, le a Gate, le a Ekerone, le a Baafa ka boroa. 4Ho tloha ka boroa, naha eohle ea Bakanana, le ea Meara, eo e neng e le ea Basidone, ho ea fihla Afeke, le ho ea fihla moeling oa Baamore. 5Le naha ea Bagebale le Lebanone eohle, ho ea fihla bochabela, ho tloha Baale-Gade e mosikong oa thaba ea Heremone, ho ea fihla lekhalong la Hamate.
6“Baahi bohle ba naha e maralla, ho tloha Lebanone, ho ea fihla Miserefote-Maime, le Basidone bohle, ke tla ba leleka kapele ho bana ba Iseraele. Linaha tsena u li abele bana ba Iseraele e le lefa la bona, joalokaha ke u laetse. 7Ka baka lena, abela merabe ena e robong, le karolo e 'ngoe ea morabe oa Manase, naha ena, hore e be lefa la eona.”
Naha e ileng ea abeloa Manase, le Rubene, le Gade
8Karolo e 'ngoe ea morabe oa Manase, le morabe oa Rubene, le morabe oa Gade, e ne e se e amohetse lefa la naha, leo Moshe a e abetseng lona ka bochabela, mose oane ho Jorodane, joalokaha Moshe, mohlanka oa Morena, a ile a ba abela lona.
9Ho tloha Arōoere e lebōpong la nōka ea Arenone, le motse o kahar'a khohlo, le phula eohle e tlohang Medeba ho ea fihla Dibone; 10le metse eohle ea Sihone, khosi ea Baamore, ea neng a busa Heshebone, ho ea fihla moeling oa bana ba Amone. 11Le Gileade eohle le meeli ea Bageshure, le ea Bamaaka, le thaba eohle ea Heremone, le Bashane eohle ho ea fihla Saleka, 12le naha eohle e Bashane, ea Oge, ea neng a busa Ashetarote le Ederei, e leng e mong oa masalla a Barefaime. Bana Moshe o ile a ba hlōla, a hapa naha ea bona. 13Leha ho le joalo, bana ba Iseraele ha baa ka ba leleka Bageshure le Bamaaka; kahoo Bageshure le Bamaaka ba aha har'a Baiseraele, ho fihlela kajeno-ea-bokajeno.
14Ke Balevi feela bao a sa kang a ba abela lefa. Linyehelo tsa secheso, tsa Morena Molimo oa Iseraele, ke lona lefa la bona, joalokaha Morena a ne a ba tšepise.
Naha e ileng ea abeloa morabe oa Rubene
15Moshe a abela bana ba morabe oa Rubene naha, ho ea ka malapa abo bona. 16Moeli oa bona o ne o tloha Arōoere e lebōpong la nōka ea Arenone, le motseng o kahar'a khohlo, le phula eohle e pel'a Medeba, 17le Heshebone, le metse eohle ea eona e phuleng: Dibone, le Bamote-Baale, le Bete-Baale-Meone, 18le Jahase, le Kedemote, le Mefaata, 19le Kiriataime, le Sibema, le Serete-Shahara e holim'a leralla la khohlo, 20le Bete-Peore, le matsoapo a Pisega, le Bete-Jeshimote, 21le metse eohle e phuleng, le naha eohle ea Sihone, khosi ea Baamore, ea neng a busa Heshebone, eo Moshe a neng a 'molaee hammoho le mahosana a Midiane: Efi, le Rekeme, le Sure, le Hure, le Reba, e leng mahosana a Sihone, a neng a ahile naheng ena. 22E mong oa ba bolailoeng ke bana ba Iseraele ka sabole e ne e le Bileame oa senohe, mora oa Beore. 23Moeli oa bana ba Rubene o ne o fella Jorodane. Lena e ne e le lefa la bana ba Rubene, ho ea ka malapa abo bona, e leng metse le metsana ea eona.
Naha e ileng ea abeloa morabe oa Gade
24Moshe a abela bana ba morabe oa Gade naha, ho ea ka malapa abo bona.
25Moeli oa bona e ne e le Jasere le metse eohle ea Gileade, le karolo e 'ngoe ea naha ea bana ba Amone, ho ea fihla Arōoere, kapele ho Raba; 26le ho tloha Heshebone, ho ea fihla Rama-Misepa, le Betonime, le ho tloha Mahanaime ho ea fihla moeling oa Debiri; 27le ka khohlong ea Bete-Harame, le Bete-Nimera, le Sukote, le Safone, le karolo e setseng ea naha ea Sihone, khosi ea Heshebone; le lebōpo la Jorodane e le moeli o il'o fihla lebōpong la leoatle la Kinerete, ka bochabela ho Jorodane. 28Lena ke lefa la bana ba Gade, ho ea ka malapa abo bona, e leng metse le metsana ea eona.
Naha e ileng ea abeloa karolo e 'ngoe ea morabe oa Manase
29Moshe a abela karolo e 'ngoe ea morabe oa Manase naha. E ne e le karolo e 'ngoe ea bana ba morabe oa Manase, ho ea ka malapa abo bona.
30Moeli oa bona o ne o tloha Mahanaime, le Bashane eohle, le naha eohle ea Oge, khosi ea Bashane, le metsana eohle ea Jaire e mashome a tšeletseng, e neng e le Bashane, 31Le karolo e 'ngoe ea Gileade, le Ashetarote, le Ederei, e leng metse ea naha ea Oge e Bashane. Ena e ne e le ea bana ba Makiri, mora oa Manase, le ea karolo e 'ngoe ea bana ba Makiri, ho ea ka malapa abo bona.
32Tsena ke linaha tseo Moshe a ileng a li aba e le lefa liphuleng tsa Moabe, kamose oane ho Jorodane, ka bochabela ho Jeriko. 33Empa Moshe ha aa ka a nea Balevi lefa, hobane Morena Molimo oa Iseraele, ke eena lefa la bona, joalokaha a ne a ba tšepise.
