Ho hapuoa Jeriko
1Menyako ea Jeriko e ne e koetsoe nti! ka baka la ho tšaba bana ba Iseraele. Ho ne ho se le ea mong ea tsoang, ho se le ea mong ea kenang.
2Joale Morena a re ho Joshua: “Bona, ke neelana ka Jeriko le khosi ea eona, le banna ba linatla, ba sebete, matsohong a hao. 3Le potolohe motse ona le bahlabani bohle, le o potolohe hanngoe. Le etse joalo ka matsatsi a tšeletseng. 4Baprista ba supileng ba tsamaee kapele ho areka ba nkile manaka a supileng a pheleu. Ka letsatsi la bosupa le potolohe motse ka makhetlo a supileng, baprista ba letse manaka. 5Ere ha ba letsa lenaka la pheleu halelele, 'me lōna le utloa molumo oa lenaka, sechaba sohle se hōoe haholo; lerako la motse le tla helehela fatše, 'me sechaba sohle se le tlōle, monna ka mong a b'a s'a toba pele.”
6Joshua, mora oa Nune, a bitsa baprista, a re ho bona: “Nkang areka ea selekane, baprista ba supileng ba tsamaee kapele ho areka eo ea Morena, ba nkile manaka a supileng a pheleu.” 7Eaba o re ho sechaba: “Tsamaeang, le potolohe motse, bahlabani ba tsamaee kapele ho areka ea Morena.”
8Ha Joshua a se a buile ho sechaba, baprista ba supileng, ba nkileng manaka a supileng a pheleu, ba fetela kapele ho Morena, ba ntse ba letsa manaka ao, 'me areka ea Morena ea ba sala morao. 9Bahlabani ba etella pele baprista ba neng ba letsa manaka, 'me serao sa tsamaea kamora' areka, baprista bona ba ntse ba letsa manaka. 10Joshua a laela sechaba, a re: “Le se ke la hōoa, leha e le ho hoeshetsa; ho se be lentsoe le tsoang melomong ea lōna, ho fihlela mohl'a letsatsi leo ka lona ke le laelang hore le hōoe, ebe lea hōoa.” 11A laela hore areka ea Morena e potolohe motse, e o potolohe hanngoe. Eaba ba khutlela liahelong, ba robala teng.
12Joshua a tsoha ka malungoalungoana, baprista ba jara areka ea Morena. 13Baprista ba supileng, ba nkileng manaka a supileng a pheleu, ba tsamaea kapele ho areka ea Morena, ba ntse ba letsa manaka ao. Bahlabani ba tsamaea kapele ho baprista, 'me serao sa tsamaea kamora' areka ea Morena, baprista bona ba ntse ba letsa manaka. 14Le ka letsatsi la bobeli ba potoloha motse hanngoe, eaba ba khutlela liahelong. Ba etsa joalo ka matsatsi a tšeletseng.
15Ka letsatsi la bosupa ba tsoha hoseng ha mafube a hlaha. Ba potoloha motse ka makhetlo a supileng, ka mokhoa o tšoanang le oa pele; feela ka letsatsi lena ba potoloha motse makhetlo a supileng. 16Eare ha ba potoloha lekhetlo la bosupa, baprista ba letsa manaka, Joshua a re ho sechaba: “Hōoang, hobane Morena o le neile motse ona! 17Motse o tla timetsoa, hammoho le tsohle tse ka ho oona, hobane o tlas'a thōhako ea Morena. Ke Rahaba oa seotsoa feela ea tla phela; eena le bohle ba nang le eena ka tlung ea hae, hobane o ne a pate barōmuoa bao re neng re ba rōmile. 18Feela lōna le itlhokomele, le khese tse rōhakehileng, esere ka ho nka lintho tseo tse rōhakehileng la itlisetsa thōhako, la tlisetsa le liahelo tsa Baiseraele thōhako le tsietsi. 19Empa ha e le silefera, le khauta, le lijana tse entsoeng ka lethose le ka tšepe, ke tsa Morena. Tsona li tla kena letlōleng la Morena.”
Ho oa ha Jeriko
20Eaba sechaba sea hōoa, le baprista ba letsa manaka. Eare ha sechaba se utloa molumo oa manaka, sa hōoa haholo, 'me lerako la helehela fatše. Sechaba sa kena ka motseng, monna ka mong a tobile pele feela, 'me ba hapa motse oo. 21Tsohle tse neng li le kahar'a motse ba li ripitla ho hang ka sabole: banna le basali, bacha le maqheku, le khomo, le nku, le tonki.
22Ho banna ba babeli, ba neng ba rōmetsoe ho ea hloela naha, Joshua a re: “E-eang tlung ea seotsoa, le tle le mosali eo, le bohle bao a nang le bona, joalokaha le ile la mo hlapanyetsa.” 23Bahlankana ba lihloela ba ea, ba tla le Rahaba, le ntat'ae, le 'm'ae, le bana babo, le bohle bao a neng a e-na le bona. Ba ntša le ba malapa 'ohle a bang ka eena, ba ba bea kantle ho liahelo tsa Baiseraele.
24Motse oona ba o chesa ka mollo, le tsohle tse neng li le kahar'a oona. Ha e le silefera, le khauta, le lijana tse entsoeng ka lethose le ka tšepe, tsona ba li kenya letlōleng la ntlo ea Morena. 25Joshua a pholosa Rahaba oa seotsoa, le ba lelapa lohle la ntat'ae, le bohle bao a neng a e-na le bona. O ntse a phela le Baiseraele ho fihlela kajeno, hobane o ne a ile a pata barōmuoa bao Joshua a neng a ile a ba rōma ho hloela Jeriko.
26Mohlang oo, Joshua a nea Jeriko thōhako ena, a re:
“Morena a rōhake motho,
motho ea tla ema,
a tsose marako
a motse ona oa Jeriko;
ka lefu la mor'a hae oa matsibolo
a etse mothèo oa oona,
ka lefu la mor'a hae oa lethōpō
a hahe menyako ea oona.”
27Morena a ba le Joshua, 'me botumo ba hae ba aparela naha eohle.
