Sebaka sa ho nyehella se seng feela
1Morena a bua ho Moshe, a re:
2“Bua ho Arone, le ho bara ba hae, le ho bana bohle ba Iseraele, u re ho bona: ‘Sena ke seo Morena a se laetseng, ha a re: 3Motho ofe kapa ofe oa ntlo ea Iseraele, ea hlabelang pholo, kapa nku, kapa pōli, ka liahelong; kapa ea e hlabelang kantle ho liahelo, 4a sa e tlise pele, monyakong oa Tente ea Morena, ho nyehela ka eona ho Morena, kapele ho Leaho la hae, o tla talingoa a le molato oa ho tšolla mali. Motho eo o tšolotse mali, 'me o tla khaoloa sechabeng sa habo. 5Hona ke hore bana ba Iseraele ba tlise mahlabelo a bona, ao ba neng ba a etsetsa naheng; ba a tlise ho Morena, monyakong oa Tente ea Morena, ho moprista, 'me ka 'ona ba etsetse Morena nyehelo ea teboho. 6Moprista o tla fōka aletare ea Morena, e monyakong oa Tente ea Morena, ka mali, 'me a chese mafura e le nyehelo e monko o monate, e amohelehang ho Morena. 7Ba se ke ba hlola ba nyehella melingoana ea liphooko eo ba e setseng morao, ba e khumamelang. Ona e tla ba molao oa mehla eohle oa bona, le oa litlōhōlō tsa bona.’
8“U re ho bona hape: ‘Motho ofe kapa ofe oa ntlo ea Iseraele, kapa oa molichaba ea jakileng har'a bona, ea etsetsang Morena nyehelo ea secheso, 9a sa e tlise monyakong oa Tente ea Morena ho nyehella Morena, o tla khaoloa sechabeng sa habo.
Ho ja bobete ha ho lumelloe
10“ ‘Motho ofe kapa ofe oa ntlo ea Iseraele, kapa oa molichaba ea jakileng har'a bona, ea jang bobete ba mofuta ofe kapa ofe, ke tla mo halefela. Motho eo ea jang bobete ke tla mo khaola sechabeng sa habo. 11Kahobane bophelo ba ntho bo maling, mali ana ke le neile 'ona hore le iketsetse tefelo ea sebe ka 'ona aletareng; ke mali a etsetsang motho tefelo ea sebe. 12Ka lebaka lena ke itse ho bana ba Iseraele: “Ho se be le ea mong oa lōna ea jang bobete; le molichaba ea jakileng har'a lōna a se ke a ja bobete.”
13“ ‘Motho ofe kapa ofe oa bana ba Iseraele, kapa oa molichaba ea jakileng har'a bona, ea tsōmang phoofolo kapa nonyana e ka jeoang, ha a e bolaile o tla fophisa mali a eona, a a koahele ka mobu. 14Bophelo ba lintho tsohle ke mali a tsona; ka baka leo, ke itse ho bana ba Iseraele: “Le se ke la ja bobete ba ntho efe kapa efe, hobane bophelo ba lintho tsohle ke mali a tsona. Mang kapa mang ea ka bo jang, o tla khaoloa sechabeng sa habo.”
15“ ‘Mang kapa mang ea jang nama ea ntho efe le efe e ichoeletseng feela, kapa e harotsoeng ke libatana, e ka ba letsoalloa kapa molichaba, a hlatsoe liaparo tsa hae, a be a tole ka metsi. O tla sala a ntse a le sesila ho fihlela ka phirimana, joale e tla ba o hloekile. 16Empa haeba a sa hlatsoe liaparo tsa hae, a bile a sa tole ka metsi, o tla jara bokhopo ba hae.’ ”
