Linyehelo tsa koro
1“ ‘Ha motho a tlisetsa Morena nyehelo ea koro, a e sile pele, e be phofo e thumisehileng. A tšèlè ole ea mohloaare le mokubetso holim'a eona, 2ebe o e tlisa ho baprista, e leng bara ba Arone. Moprista a nke phofo e thumisehileng ka seatla, le ole, le mokubetso kaofela, a li chesetse holim'a aletare, e be khopotso holim'a aletare; e be secheso se monko o monate, se amohelehang ho Morena. 3Phofo ea nyehelo e setseng ke ea Arone le bara ba hae; ke nyehelo ea secheso, e halalelang ka ho fetisisa, ea Morena.
4“ ‘Ha u tlisa nyehelo ea bohobe bo phehiloeng ka onto, e be ba likuku tse sa lomosoang, tse entsoeng ka phofo e thumisehileng, e lubiloeng ka ole; kapa e be moqathane o tlotsitsoeng ka ole ea mohloaare.
5“ ‘Haeba nyehelo ea hao e le ea bohobe bo besitsoeng rosetereng, bo etsoe ka phofo ea koro e thumisehileng, e lubiloeng ka ole ea mohloaare, bo se ke ba lomosoa. 6U bo rathele, ebe u tšèla ole holim'a bona; ke nyehelo ea phofo.
7“ ‘Haeba nyehelo ea hao e le ea bohobe bo phehiloeng ka pitsa, bo etsoe ka phofo e thumisehileng, e lubiloeng ka ole. 8Joale u tlisetse Morena nyehelo ea phofo ea koro, e entsoeng ka lintho tsena. U li nee moprista, eena a li ise aletareng.
9“ ‘Moprista a nke bo bong ba bohobe, e le khopotso, ebe o bo chesetsa holim'a aletare; e be secheso se monko o monate, se amohelehang ho Morena. 10Lijo tsa nyehelo tse setseng ke tsa Arone le bara ba hae; ke nyehelo ea secheso, e halalelang ka ho fetisisa, e etsetsoang Morena.
11“ ‘Nyehelo efe le efe ea lijo, eo u e etsetsang Morena, e se ke ea lomosoa. U se ke ua chesa tomoso kapa mahe a linotši, e le secheso se etsetsoang Morena. 12U ka tlisetsa Morena nyehelo ea lilopotsiea tsa tse kotutsoeng, empa u se ke ua e chesetsa holim'a aletare, e le secheso se monko o monate. 13Nyehelo e 'ngoe le e 'ngoe ea hao, ea lijo, u e nōke ka letsoai. Letsoai, e leng selekane se pakeng tsa hao le Molimo oa hao, le se ke la e-ba sieo nyehelong ea hao ea lijo; linyehelo tsohle tsa hao li nōkoe.
14“ ‘Ha u tlisetsa Morena nyehelo ea lilopotsiea tsa tse kotutsoeng, u nyehele ka lilopotsiea tsa liqhōme kapa tsa lijo. 15U li tlotse ka ole ea mohloaare, 'me u tšèlè mokubetso holim'a nyehelo eo. 16Bakeng sa khopotso, moprista o tla chesa e 'ngoe ea lijo tseo, le ole, le mokubetso kaofela, e le nyehelo ea secheso se etsetsoang Morena.
