MEETLO 22

₁Morena a bua ho Moshe, a re:

₂“Bolella Arone le bara ba hae hore ba hlomphe lintho tse halalelang, tseo bana ba Iseraele ba nkhethelang tsona, esere ba silafatsa lebitso la ka le halalelang. Ke 'na Morena.

₃“E-re ho bona: ‘Monna ofe kapa ofe oa litlōhōlō tsa hao, melōkong eohle ea tsona, ea ka atamelang lintho tse halalelang, tseo bana ba Iseraele ba li khethelang Morena, monna eo a ntse a silafetse, o tla lelekoa kapele ho 'na. Ke 'na Morena.

₄“ ‘Monna ofe kapa ofe eo o leng setlōhōlō sa Arone, ea tsoileng lepera, kapa ea nang le seso se qhitsang, a se ke a ja lintho tse halalelang a e-s'o ka a hloeka. Monna ofe kapa ofe ea amang motho ea silafalitsoeng ke ho ama setōpō, kapa ea hōshōtsang metsi a bonna; ₅kapa monna ea amang sehahabi se ka mo silafatsang, kapa ea amang monna e mong ea ka mo silafatsang ka baka la sesila sa hae; ₆motho ea amang ea joalo o tla ba le sesila ho fihlela ka phirimana. Motho eo a ke ke a ja lintho tse halalelang, haese ha a se a totse ka metsi. ₇Ha letsatsi le se le liketse e tla ba o hloekile, 'me kamorao ho moo a ka ja lintho tse halalelang, hobane ke lijo tsa hae. ₈A se ke a ja nama ea phoofolo e ichoeletseng feela, kapa e harotsoeng ke libatana, hobane e tla mo silafatsa. Ke 'na Morena.

₉“ ‘Ba tla bōlōka taelo ea ka, hore ba se ke ba ipelesa sebe ka lebaka la eona, 'me ba e-shoa, hobane ba e silafalitse.

₁₀“ ‘Molichaba ofe kapa ofe a se ke a ja lintho tse halalelang; le moeti ea fihletseng ha moprista, kapa mohiruoa, a se ke a ja lintho tse halalelang. ₁₁Lekhoba leo moprista a le rekileng ka chelete ea hae, lona le ka ja lintho tseo tse halalelang. Le bohle ba tsoaletsoeng tlung ea moprista ba ka ja lijo tseo tsa hae.

₁₂“ ‘Ha morali oa moprista a nyetsoe ke molichaba, a ke ke a ja lijo tse halalelang tsa nyehelo. ₁₃Empa haeba morali oa moprista e le mohlolohali, kapa a hlalane le monna, a se na bana, 'me a khutletse tlung ea ntat'ae joalokaha e sa le ngoana, eena a ka ja lijo tseo tsa ntat'ae. Empa molichaba eena a ke ke a li ja.

₁₄“ ‘Ha monna a ka ja ntho e halalelang ka phoso, o tla eketsa ntho eo e halalelang ka karolo e le 'ngoe ho tse hlano ea eona, 'me a e nee moprista.

₁₅“ ‘Baprista ba se ke ba silafatsa lintho tse halalelang, tseo bana ba Iseraele ba li nyehellang Morena; ₁₆ba se ke ba itjarisa molato oa bokhopo ka ho ja lintho tse halalelang, hobane ke 'na Morena ea ba halaletsang.’ ”

₁₇Morena a bua ho Moshe, a re: ₁₈“Bua ho Arone le ho bara ba hae, le ho bana bohle ba Iseraele, u re ho bona: ‘Monna ofe kapa ofe oa ntlo ea Iseraele, kapa ea jakileng naheng ea Iseraele, ea tlisang nyehelo ea hae, e ka ba nyehelo ea kano, kapa nyehelo ea boithaopo, e nyehelloang Morena hore e be ea seheso, ₁₉hore a tle a amohelehe, eka khona e be phoofolo e tona, e se nang sepha; e ka ba khomo, kapa nku, kapa pōli. ₂₀Le se ke la nyehela ka phoofolo e nang le sepha, hobane e ke ke ea amoheleha. ₂₁Ha monna a etsetsa Morena nyehelo ea sehlabelo sa teboho, e le ea kano e khethehileng, kapa e le nyehelo ea boithaopo, e be khomo kapa nku e se nang sepha, hore e tle e amohelehe. ₂₂Tse foufetseng, kapa tse robehileng, kapa tse holofetseng, kapa tse nang le libèbè, kapa lihlahala, kapa lekhoèkhoè, tsena le se ke la nyehella Morena ka tsona; le se ke la etsa nyehelo ea secheso ka tsona holim'a aletare ea Morena. ₂₃Haeba pohoana kapa nku e e-na le maoto a fetanang, u ka etsa nyehelo ea boithaopo ka eona, empa bakeng sa nyehelo ea kano e ke ke ea amoheleha. ₂₄Le se ke la nyehella Morena ka phoofolo eo makoalata a eona a tetetsehileng, kapa a pshatlehileng, kapa a thuehileng, kapa a sehiloeng. Le se ke la etsa joalo naheng ea lōna.

₂₅“ ‘Le se ke la nyehella Morena ka tse tsoang ho balichaba, hore e be lijo tsa hae, hobane li silafetse, li na le sepha, 'me li ke ke tsa amoheleha.’ ”

₂₆Morena a bua ho Moshe, a re: ₂₇“Ha namane, kapa konyana, kapa potsanyane e tsoaloa, e lokela ho nyanya 'm'a eona ka matsatsi a supileng. Ho tloha ka letsatsi la borobeli le a hlahlamang, e ka amoheleha ho etsetsa Morena nyehelo ea secheso. ₂₈Khomo le namane ea eona, kapa nku le konyana ea eona, li se ke tsa hlajoa ka tsatsi le le leng.

₂₉“Ha u etsetsa Morena sehlabelo sa teboho, u tla se etsa hore se tle se amohelehe. ₃₀Se jeoe ka lona letsatsi leo, u se ke ua siea letho le ka fihleloang ke letsatsi la hosasane. Ke 'na Morena.

₃₁“Le bōlōke melao ea ka, le e phethe. Ke 'na Morena. ₃₂Le se ke la silafatsa lebitso la ka le halalelang; ke halaletsoe har'a bana ba Iseraele. Ke 'na Morena ea le halaletsang, ₃₃ea le ntšitseng naheng ea Egepeta, hore ke be Molimo oa lōna. Ke 'na Morena.”