Lintho tse hlokang mahlabelo a sebe
1“ ‘Ha motho a bitsoa ka molao ho tla fana ka bopaki, 'me a hana ho bolela seo a se boneng kapa seo a se tsebang, o molato.
2“ ‘Ha motho a ama ntho e sa hloekang, leha e se ka morero, e ka ba sefifi sa phoofolo, kapa sefifi sa khomo, kapa sefifi sa sehahabi se sa hloekang, kapa ntho eo a sa e bonang, 'me eba oa silafala, o tla ba molato.
3“ ‘Ha motho a ama motho ea sesila, e ka ba sesila sa mofuta ofe le ofe se mo silafalitseng, 'me a sa tsebe, ha a elelloa o tla ba molato.
4“ ‘Ha motho a hlapanyetsa bobe kapa botle a sa imamela hantle, e ka ba eng kapa eng eo a e hlapanyetsang, feela a sa tsebe, ha a elelloa o tla ba molato oa e 'ngoe ea lintho tsena.
5“ ‘Ha motho a le molato oa e 'ngoe ea lintho tsena, o tla ipolela sebe sa hae. 6O tla tlisetsa Morena nyehelo ka baka la sebe seo a se entseng, e be khutšoane, e tsoang mohlapeng oa hae, nku e tšehali kapa pōli e tšehali, e le nyehelo ea sebe. Moprista o tla etsetsa motho eo tefelo ea sebe sa hae.
7“ ‘Empa ha motho a sitoa ho fumana nku kapa poli, o tla tlisetsa Morena nyehelo ea hae ea sebe seo a se entseng, ea maebana-khoroana a mabeli, kapa malinyane a mabeli a maeba, le leng e le la nyehelo ea sebe, le leng e le la nyehelo ea secheso. 8O tla a tlisa ho moprista ea tla nyehela pele ka leebana-khoroana leo e leng la nyehelo ea sebe. O tla le sotha molala, empa ha a na ho le khaola hlooho. 9O tla fōka lebota la aletare ka mali a mang a nyehelo e tlosang sebe. Mali a setseng a tla lutlisetsoa maotong a aletare. Ena ke nyehelo e tlosang sebe. 10Leebana-khoroana la bobeli o tla nyehela ka lona, ho ea ka molao oa secheso. Ka makhoa o joalo moprista o tla mo etsetsa tefelo ka baka la sebe seo a se entseng, 'me motho eo o tla tšoareloa.
11“ ‘Ha motho a sitoa ho ntša maebana-khoroana a mabeli, kapa malinyane a mabeli a maeba, o tla tlisa phofo e thumisehileng e boima ba kilo e le 'ngoe, e le nyehelo e tlosang sebe. A se ke a ba a e tšèla ka ole kapa ka mokubetso, hobane ke nyehelo e tlosang sebe. 12O tla e tlisa ho moprista, 'me eena o tla e ngoatha ka seatla e le khopotso, a e chesetse aletareng, holim'a linyehelo tsa secheso, tsa Morena. Ke nyehelo e tlosang sebe. 13Ka mokhoa o joalo moprista o tla mo etsetsa tefelo ea sebe sa hae, ho e 'ngoe ea lintho tsena, 'me motho eo o tla tšoareloa. Phofo e setseng e tla ba ea moprista, joalokaha ho etsoa ka nyehelo ea lijo.’ ”
Linyehelo tse tlosang molato
14Morena a bua ho Moshe, a re: 15“Ha motho a etsa sebe e se ka morero, linthong tse halalelang tsa Morena, o tla tlisetsa Morena nyehelo e tlosang molato, e be pheleu e se nang sepha, e tsoang mohlapeng oa hae. Ke uena ea tla lekanya theko ea eona, e be silefera e boima ba likeramo tse leshome le motso o le mong le halofo tse lekantsoeng ka tekanyo e sebelisoang ka Sehalalelong, bakeng sa nyehelo e tlosang molato. 16Hape o tla lefa tseo a itšietseng tsona tsa tse halalelang, a be a li eketse ka karolo tse mashome a mabeli ho tse lekholo. A li nee moprista, 'me moprista o tla mo etsetsa tefelo ea sebe ka pheleu ea nyehelo e tlosang molato, 'me motho eo o tla tšoareloa.
17“Ha motho a etsa sebe ka ho tlōla o mong oa melao ea Morena e se ka morero, o molato, leha a ne a sa tsebe, o tla jara bokhopo ba hae. 18A tlisetse moprista pheleu e se nang sepha, e tsoang mohlapeng oa hae, e le nyehelo e tlosang sebe. Theko ea eona e be e lekanngoang ke uena. Moprista o tla mo etsetsa tefelo ea sebe seo a se entseng e se ka morero, 'me motho eo o tla tšoareloa. 19Ke nyehelo e tlosang molato. Ruri motho eo o sitetsoe Morena.”
