LUKA 11

₁Eare hoba Jesu a qete ho rapela a le sebakeng se seng, morutuoa e mong oa hae a re ho eena: “Morena, re rute ho rapela, joalokaha Johanne a rutile barutuoa ba hae.”

₂A re ho bona: “Ha le rapela, le re:

₅A ba a re ho bona: “Ke mang ho lōna ea ka bang le motsoalle, a ea ho eena ka seroko, a re ho eena: ‘Motsoalle, ak'u nkalime linkhoa tse tharo, ₆hobane motsoalle oa ka ea leetong o mphapohetse, 'me ha ke na seo nka mo fang sona.’

₇“Eaba eo o araba a le kahare, o re: ‘U se ke ua ntšoenya; monyako o se o notletsoe, 'me ke se ke robetse le bana ba ka; nke ke ka tsoha ho u fa!’ ₈Kea le bolella, leha a ke ke a tsoha ho mo fa ka baka la hobane e le motsoalle oa hae, o tla mpe a tsohe a mo fe kamoo a hlokang kateng ka lebaka la qophello ea hae.

₉“Ke re ho lōna: Kōpang, 'me le tla fuoa; batlang, 'me le tla fumana; kokotang, 'me le tla buleloa. ₁₀Mang kapa mang ea kōpang oa fuoa, ea batlang oa fumana, ea kokotang oa buleloa.

₁₁“Ana ke ntate ofe ho lōna, eo ekareng ha mora oa hae a kōpa tlhapi, ebe o mo nea nōha bakeng sa tlhapi? ₁₂Kapa haeba a kōpa lehe, ebe o mo nea phepheng na? ₁₃Ha ho le joalo, ha lōna ba khopo le tseba ho fa bana ba lōna limpho tse molemo, Ntate ea leholimong o tla fana haholo hakaakang ka Moea o Halalelang ho ba mo kōpang!”

₁₄Jesu o ne a leleka modemona o semumu; eare hoba modemona o tsoe, semumu sa bua. Matšoele a makala, ₁₅empa ba bang ho bona ba re: “O leleka bademona ka Beele-Sebule, morena oa bademona.” ₁₆Ba bang bona ba mo kōpa mohlolo o tsoang leholimong, ka ho mo leka.

₁₇Empa ka ho tseba mehopolo ea bona, Jesu a re ho bona: “'Muso o mong le o mong o ikarolang ho itoantša o fetoha lesupi, le lelapa le ikarolang ho itoantša, le tla oa. ₁₈Haeba le Satane a ne a arohane ho itoantša, 'muso oa hae o ne o tla tiea joang? Etsoe le re, ke leleka bademona ka Beele-Sebule. ₁₉Haeba 'na ke leleka bademona ka Beele-Sebule, bara ba lōna ba ba leleka ka mang? Ka baka leo, e tla ba bona baahlōli ba lōna. ₂₀Empa ha ke leleka bademona ka monoana oa Molimo, ruri 'Muso oa Molimo o fihlile ho lōna.

₂₁“Ha seqhobane se lebela lelapa la sona se hlometse kahohle, thepa ea sona e bōlōkehile, ₂₂empa ha ho e-tla e mong ea se fetang ka matla, a se hlōla, o nka lihlomo tsa sona tseo se li tšepileng, a abe tseo a li hapileng.

₂₃“Ea sa emeng le 'na oa ntoantša, 'me ea sa bōkelleng le 'na oa qhalanya.

₂₄“Moea o litšila ha o tsoile ho motho, o sōlla mahoatateng, o batla phomolo, empa ha o sa e fumane, o re: ‘Ke tla khutlela tlung ea ka moo ke tsoileng teng.’ ₂₅Joale ha o fihla, o e fumana e fietsoe, e khabisitsoe; ₂₆ebe o ea lata meea e meng e supileng, e o fetang ka bokhopo, 'me e kene, e ahe teng, hoo litaba tsa motho eo tsa morao li bang mpe ho feta tsa pele.”

₂₇Eitse ha Jesu a bolela taba tseo, mosali e mong har'a letšoele a phahamisa lentsoe, a re ho eena: “Ho lehlohonolo pōpelo e ileng ea u emola le matsoele ao u ileng ua a anya!”

₂₈Empa Jesu a re: “E, empa haholo ho lehlohonolo ba utloang lentsoe la Molimo, ba le bōlōke.”

₂₉Eare ha matšoele a subuhlellana, Jesu a re: “Molōko ona ke molōko o khopo; o batla sesupo, empa o ke ke oa neoa sesupo, haese sesupo sa Jonase. ₃₀Joalokaha Jonase e ile ea e-ba sesupo ho ba Ninife, Mor'a Motho le eena o tla ba joalo ho molōko ona. ₃₁Mofumahali oa Boroa o tla ema, a qose batho ba molōko ona, a ba ahlōle, hobane o ne a tlohe lipheletsong tsa lefatše ho tla mamela bohlale ba Solomone, empa mona ho teng ho fetang Solomone. ₃₂Batho ba Ninife ba tla ema, ba qose molōko ona, ba o ahlōle, hobane ba ne ba bake ha ba rutoa ke Jonase, empa bonang, mona ho teng ho fetang Jonase.

₃₃“Ha ho ea hotetsang lebone a le bee sebakeng se patehileng, leha e le katlas'a nkho, empa le beoa seluloaneng sa lona, hore ba kenang ba bone leseli. ₃₄Leihlo la hao ke lebone la 'mele. Ha leihlo la hao le hloka sepha, 'mele oohle oa hao o tla ba leseling, empa ha le le lebe, le oona 'mele oa hao o aparetsoe ke lefifi. ₃₅Ha ho le joalo u hlokomele hore leseli le ka ho uena e se be lefifi, ₃₆hobane ha 'mele oa hao oohle o e-na le leseli, o se na karolo le e 'ngoe e aparetsoeng ke lefifi, o tla be o e-na le leseli ka botlalo, joalokaha lebone le u bonesetsa ka leseli la lona.”

₃₇Eare ha a ntse a bua, Mofarisi e mong a mo kōpa hore a e'o ja le eena; a kena, a ja. ₃₈Mofarisi eo a mpa a makala ha a bona hore Jesu ha aa ka a itlhatsoa a e-s'o je.

₃₉Morena a re ho eena: “Lōna, Bafarisi, le hloekisa bokantle ba senoelo le ba mohope, empa bokahare ba lōna bo tletse meharo le bokhopo. ₄₀Lithoto ting! Na ea ileng a etsa bokantle hase eena ea entseng le bokahare? ₄₁Leha ho le joalo, fanang ka se tsoang botebong ba pelo, 'me bonang, tsohle li tla be li hloekile ho lōna.

₄₂“Empa le malimabe, Bafarisi, hobane le ntša karolo e le 'ngoe ho tse leshome ea koena, le ea lengana, le ea moroho o mong le o mong, athe le tlohela toka le lerato la Molimo. Empa eka khona ho etsoe tsena ho sa tloheloe tsane.

₄₃“Le malimabe, Bafarisi, hobane le rata litulo tse hlomphehang matlung a thapelo, le litumeliso mabaleng a metse.

₄₄“Le malimabe, hobane le tšoana le mabitla a sa bonahaleng, ao batho ba tsamaeang holim'a 'ona ba sa a lemohe.”

₄₅E mong oa Litsebi tsa Molao a mo araba, a re: “Moruti, ha u rialo, le rōna ua re hlapaola.”

₄₆Jesu a re: “Le lōna le malimabe, Litsebi tsa Molao, hobane le jarisa batho mejaro e ba imelang, empa lōna le sa ame mejaro eo leha e le ka o mong oa menoana ea lōna.

₄₇“Le malimabe, hobane le haha liemahale tsa baporofeta ba bolailoeng ke bo-ntat'a lōna. ₄₈Kahoo le lipaki, 'me le lumellana le liketso tsa bo-ntat'a lōna, hobane bona ba ile ba ba bolaea, athe lōna le haha liemahale tsa bona. ₄₉Ka baka leo, Molimo, ka bohlale ba hae, o ile a re: ‘Ke tla ba rōmela baporofeta le baapostola, 'me ba bang ba bona ba tla bolaoa, le ho hlorisoa, ₅₀hore mali a baporofeta bohle a tšolotsoeng haesale lefatše le thèoa, a tle a batloe ho molōko ona, ₅₁ho tloha maling a Abele, ho ea fihla maling a Sakariea, ea ileng a timetsoa pakeng tsa aletare le Tempele.’ E, kea le bolella, a tla batloa ho molōko ona.

₅₂“Le malimabe, Litsebi tsa Molao, hobane le nkile senotlolo sa tsebo, empa ka bolōna ha lea ka la kena, le thibetse ba neng ba kena.”

₅₃Hoba a tlohe moo, Litsebi tsa Molao le Bafarisi ba qala ho mo hlonamela hampe, ba leka ho 'muisa tse ngata, ₅₄ba ntse ba mo chehile, hore ba tle ba tšoase ho hong ho ka tsoang molomong oa hae.