LUKA 14

₁Eitse ha Jesu a ile lijong tlung ea e mong oa batsamaisi ba Bafarisi ka Sabatha, ba mo lisa. ₂Pel'a hae ho ne ho e-na le monna e mong ea khotšeng seema. ₃Jesu a bua, a re ho Litsebi tsa Molao le Bafarisi: “Na hoa lumelloa hore ho phekoloe ka Sabatha, kapa che?” ₄Ba khutsa. Eaba oa mo nka, oa mo folisa, 'me a mo lokolla.

₅A re ho bona: “Na e ka ba mang ho lōna, eo ekareng ha ho oetse mora oa hae kapa pholo ea hae selibeng, a ke keng a ntša mora kapa pholo kapele ka tsatsi la Sabatha?” ₆Ba sitoa ho arabela litaba tsena.

₇Joale Jesu a bolella bamemuoa setšoantšo, ha a lemōha kamoo ba khethang tulo tse kapele kateng, a re ho bona: ₈“Ha u memiloe ke motho moketeng oa lenyalo, u se ke ua lula litulong tse kapele, esebe e mong ea u fetang ka ho hlompheha le eena o memiloe, ₉ebe ea le memileng oa tla, o re ho uena: ‘Suthela monna enoa sebaka,’ e be moo u qalang ho ea lula ka lihlong tulong tse kamorao. ₁₀Empa ha u memiloe, e-ea u lule litulong tse kamorao, hore ha ea u memileng a e-tla, a tle a re ho uena: ‘Motsoalle, fetela litulong tse kapele!’ e be moo u fumanang hlompho mahlong a ba lutseng le uena, ₁₁hobane e mong le e mong ea iphahamisang o tla kokobetsoa, athe ea ikokobetsang o tla phahamisoa.”

₁₂Eaba Jesu o re le ho ea mo memileng: “Ha u etsa mokete oa lijo tsa motšeare kapa tsa mantsiboea, u se ke ua mema metsoalle ea hao, leha e le bana beno, leha e le bang ka uena, leha e le barui bao u ahisaneng le bona, esere le bona ba boela ba u mema, khalapa tsa buseletsana. ₁₃Empa ha u etsa mokete, mema mafutsana, le lihole, le liritsa, le lifofu, ₁₄'me u tla ba lehlohonolo, hobane ba ke ke ba u buseletsa. U tla buseletsoa mohl'a tsoho ea ba lokileng.”

₁₅Eare ha e mong oa ba memiloeng hammoho a utloa litaba tseo, a re ho eena: “Ho lehlohonolo ea tla ba moketeng oa lijo 'Musong oa Molimo!”

₁₆Jesu a re ho eena: “Motho e mong o ile a etsa mokete o moholo oa lijo tsa mantsiboea, 'me a mema ba bangata. ₁₇A rōma mohlanka oa hae ka nako ea mokete ho ea re ho bamemuoa: ‘Tloong, tsohle li lokisitsoe.’

₁₈“Eaba bohle ba itatōla ka bomong ka ho tšoana. Oa pele a re ho eena: ‘Ke rekile setša, 'me ke tlamehile ho ea se bona. Kea u kōpa, u ntatōlele.’

₁₉“E mong a re: ‘Ke rekile lipholo tse lekanang joko tse hlano, 'me ke sa ea li leka. Kea u kōpa, u ntatōlele.’

₂₀“E mong hape a re: ‘Ke tsoa nyala mosali, 'me nke ke ka tla ke hona.’

₂₁“Mohlanka a khutla, a tsebisa mong'a hae litaba tseo. Ea e-ba moo mong'a ntlo a halefang, a re ho mohlanka oa hae: ‘Phakisa u tsoele litseleng le litselaneng tsa motse, u tlise koano mafutsana, le lihole, le lifofu, le liritsa.’

₂₂“Mohlanka a re: ‘Monghali, ke phethile taelo ea hao, feela ho sa na le sebaka.’

₂₃“Mong'a mohlanka a re ho eena: ‘Tsoela litseleng le meterong, u ba qophelle ba kene, hore ntlo ea ka e tle e tlale, ₂₄hobane kea u bolella hore ha ho le ea mong oa banna bane ba neng ba memiloe ea tla latsoa lijo tsa ka.’ ”

₂₅Matšoelehali a ne a tsamaea le Jesu, eaba oa reteleha, o re ho 'ona: ₂₆“Ha mang kapa mang a e-tla ho 'na, 'me a sa hloee ntat'ae, le 'm'ae, le mosali, le bana, le bana babo, le khaitselie, le bona bophelo ba hae, e ke ke ea e-ba morutuoa oa ka. ₂₇Mang kapa mang ea sa nkeng sefapano sa hae, a ntšala morao, e ke ke ea e-ba morutuoa oa ka.

₂₈“Ke mang ho lōna, eo ereng ha a rata ho haha tora, a sa keng a lule pele ho etsa likhakanyo tsa litšenyehelo, ho bona hore o na le seo a ka e qetang ka sona? ₂₉Esere mohlomong ha a se a theile mothèo, 'me a hloka matla a ho e phetha, bohle ba bonang ba qala ho mo soma, ₃₀ba re: ‘Monna enoa o qalile ho haha, empa o sitiloe ho qeta!’

₃₁“Kapa khosi ke efe, eo ereng ha e ea thulana le khosi e 'ngoe ntoeng, e sa luleng pele ho imamella hore na ka bahlabani ba kete tse leshome e ka ba le matla a ho khahlanyetsa e e futuhelang e e-na le ba kete tse mashome a mabeli na? ₃₂Ho seng joalo, ere eo e sa le hōle, e rōmele maqosa ho phaphatha khotso. ₃₃Ka mokhoa o joalo, e mong le e mong ho lōna, ea sa teleng maruo a hae 'ohle, e ke ke ea e-ba morutuoa oa ka.”

₃₄“Efela letsoai le molemo, empa ha letsoai le tapa, le ka tsoaifatsoa ka'ng? ₃₅Ha le sa na thuso bakeng sa mobu, leha e le bakeng sa moiteli. Le lahleloa kantle.

“Ea nang le litsebe ho utloa a utloe!”