LUKA 21

₁Eare ha Jesu a phahamisa mahlo, a bona barui ba nokela linyehelo tsa bona letlōleng la matlotlo. ₂A bona le mosali e mong oa mohlolohali, ea futsanehileng, a nokela teng cheletana tse peli. ₃Jesu a re: “Kannete kea le bolella: Mohlolohali eo ea futsanehileng o noketse ho feta bohle, ₄hobane bao bohle ba noketse linyehelo ba nkile bonkong, athe eena o noketse seo a se nkileng bohloking, sohle seo a neng a e-na le sona, seo a neng a tla phela ka sona.”

₅Eare ha ba bang ba bua ka Tempele, ba re e khabisitsoe ka majoe a matle le ka linyehelo, Jesu a re: ₆“Ha e le tseo le li bonang, ho tla tla matsatsi ao ka 'ona ho ke keng ha siuoa lejoe holim'a lejoe le leng le sa heletsoa.”

₇Ba 'motsa, ba re: “Moruti, lintho tsee li tla etsahala neng? Pontšo e tla ba efe ha tseo li se li tla etsahala?”

₈A re: “Hlokomelang hore le se ke la tšoha le khelosoa, hobane ba bangata ba tla tla ka lebitso la ka, ba re: ‘Ke 'na,’ ba be ba re: ‘Nako e atametse.’ Le se ke la ba sala morao. ₉Ha le utloa mekhosi ea lintoa le meferefere, le se ke la tšoha, hobane eka khona tseo li etsahale pele, empa bofelo bo ke ke ba e-ba teng hang-hang.”

₁₀Eaba o re ho bona: “Lichaba li tla tsohelana matla, le mebuso e futuhelane. ₁₁Libakeng tse ling ho tla ba le litšisinyeho tse kholo tsa lefatše, le mafu a seoa, le litlala, le matšabeho, le lipontšo tse kholo tse tsoang leholimong.

₁₂“Empa pele ho tseo tsohle ba tla le tšoara, ba le hlorise, ba neelane ka lōna matlung a thapelo le lichankaneng, ba le ise pel'a mahosi le babusisi ka baka la lebitso la ka. ₁₃Hona ho tla etsa hore le mpake. ₁₄Ka hona qetelang ka lipelong tsa lōna hore ha le na ho itokisetsa boitšireletso ba lōna, ₁₅hobane ke tla le nea mantsoe le bohlale boo bahanyetsi bohle ba lōna ba tla sitoa ho bo hanyetsa le ho bo loantša. ₁₆Batsoali ba lōna, le bana babo lōna, le bang ka lōna, le metsoalle ea lōna, ba tla neelana ka lōna, 'me ba tla bolaea ba bang ba lōna. ₁₇Bohle ba tla le hloea ka baka la lebitso la ka. ₁₈Empa ha ho ka ke ha lahleha leha e le qōba e le 'ngoe ea moriri hloohong tsa lōna. ₁₉Ka tiisetso ea lōna le tla ithuela bophelo.

₂₀“Etlare ha le bona Jerusalema e teeloa hare ke mabōtho, le tsebe hore ho ripitloa ha eona ho atametse. ₂₁Mohlang oo ba leng Judea ba balehele lithabeng, ba har'a motse ba tsoe, 'me ba naheng ba se ke ba kena ho oona, ₂₂hobane ke 'ona matsatsi a phetetso, ho tle ho phethahale tsohle tse ngotsoeng. ₂₃Matsatsing ao ho tla ba malimabe baimana le batsoetse. Tlokotsi e tla ba kholo lefatšeng, le khalefo ea Molimo sechabeng sena. ₂₄Ba tla bolaoa ka sabole, ba qhalanyetsoe lichabeng tsohle e le bathōpuoa, 'me Jerusalema e tla hatakeloa ke balichaba, ho fihlela nako ea bona e fela.

₂₅“Ho tla ba le lipontšo letsatsing, khoeling, le linaleling. Lefatšeng lichaba li tla ba matsoalong le tsielehong ka baka la molumo oa leoatle le maqhubu. ₂₆Batho ba tla akheha ke tšabo le tebello ea tse tlang lefatšeng, hobane linaleli tsa leholimo li tla tsukutleha. ₂₇Joale ba tla bona Mor'a Motho a e-tla a le lerung, ka matla le ka tlōtla e kholo. ₂₈E tle ere ha tsena li qala ho etsahala le pashalle, le phahamise lihlooho, hobane topollo ea lōna e atametse.”

₂₉Jesu a ba bolella setšoantšo, a re: “Talimang sefate sa feiee le lifate tsohle: ₃₀Ha le li bona li fupa, le tseba ka bolōna hore lehlabula le se le le haufi. ₃₁Ka mokhoa o joalo le lōna, ha le bona tsena li etsahala, le tsebe hore 'Muso oa Molimo o haufi.

₃₂“Ruri kea le bolella hore molōko ona ha o ka ke oa fela tsena tsohle li e-s'o etsahale. ₃₃Leholimo le lefatše li tla fela, empa mantsoe a ka ha a ka ke a fela.

₃₄“Itlhokomeleng, esere mohlomong lipelo tsa lōna tsa imeloa ke botlofa, le botahoa, le matšoenyeho a bophelo bona, 'me letsatsi lela la le tsometsa, ₃₅hobane joaloka sefi, le tla pitla bohle ba ahileng lefatšeng lohle. ₃₆Falimehang ke hona, le rapele ka linako tsohle, hore le tle le be le matla a ho phonyoha tsena tsohle, tse seng li tla etsahala, le a ho ema pel'a Mor'a Motho.”

₃₇Jesu o ne a ruta ka Tempeleng motšeare, empa bosiu o ne a e-tsoa, a ea hlola thabeng e bitsoang Thaba ea Mehloaare, ₃₈'me batho bohle ba ne ba tsohella ho eena Tempeleng ho ea mo mamela.