LUKA 3

₁Ka selemo sa leshome le metso e mehlano sa puso ea Sesare Tiberiuse, ha Pontiuse Pilato a busa Judea, Heroda a busa Galelea, Filipi ngoan'abo a busa naha ea Ituria le Terakonite, Losaniase a busa Abilene, ₂mehleng ea Baprista ba Baholo Hannase le Kaiafa, lentsoe la Molimo la fihlela Johanne, mor'a Sakariea, a le lefeelleng. ₃A ea tikolohong eohle ea Jorodane a ntse a phatlalatsa tsa kolobetso ea pako e isang tšoarelong ea libe, ₄joalokaha ho ngotsoe bukeng ea mantsoe a moporofeta Esaea, ho thoe:

₇Joale a re ho matšoele a tlang ho tla kolobetsoa ke eena: “Malinyane a marabe, ke mang ea le boleletseng hore le ka baleha bohale bo tlang? ₈Behang litholoana tse lokelang pako he, 'me le se ke la qala ho re ka ho lōna: ‘Re na le ntat'a rōna, Aborahama,’ hobane kea le bolella, ke re: Molimo a ka hlahisetsa Aborahama bana le ka majoe ana. ₉Etsoe selepe se se se beiloe metsong ea lifate; ka baka leo, sefate ka seng se sa beheng litholoana tse monate se tla rengoa, se lahleloe mollong.”

₁₀Matšoele a 'motsa, a re: “Ha ho le joalo, re etse eng?”

₁₁A araba, a re: “Ea nang le liaparo tse peli a fe ea se nang letho, le ea nang le lijo a etse joalo.”

₁₂Ha tla le balekhetho ho kolobetsoa, ba re ho eena: “Moruti, re etse'ng?”

₁₃A re ho bona: “Le se ke la khafisa ho feta seo le se laetsoeng.”

₁₄Le masole a 'motsa, a re: “Rōna re etse'ng?” A re ho 'ona: “Le se ke la inkela tsa batho ka mahahapa, leha e le ho ba hatella; le khotsofalle moputso oa lōna.”

₁₅Erekaha sechaba se ne se lebeletse, 'me bohle ba nahana ka lipelong tsa bona ka Johanne, ba re, esebe ke eena Kreste. ₁₆Johanne a araba bohle, a re: “'Na ke fela ke le kolobetsa ka metsi, empa ho tla tla ea mphetang ka matla, eo ke sa tšoanelang le ho lokolla leqhoele la meqathatso ea hae. Eena o tla le kolobetsa ka Moea o Halalelang le ka mollo. ₁₇Ke eo seolōso sa hae se leng letsohong la hae ho hloekisa seotlo sa hae le ho bōkella koro sesiung sa hae, empa 'mōkō o tla o chesa mollong o sa timeng.”

₁₈A 'na a khothatsa le ka litaba tse ling tse ngata, a ntse a bolella batho molaetsa o molemo.

₁₉Hoba Johanne a khalemelle khosi Heroda ho inkela Herodiase, mosali oa ngoan'abo, le ho etsa tsohle tse mpe, ₂₀Heroda a eketsa ka ho koalla Johanne chankaneng.

₂₁Ha batho bohle ba kolobelitsoe, Jesu le eena a kolobetsoa. Ha a ntse a rapela leholimo la buleha, ₂₂'me Moea o Halalelang oa theohela holim'a hae ka sebōpeho se kang sa leeba; lentsoe la tsoa leholimong, la re: “U Mora oa ka eo ke mo ratang, ea nkhahlang.”

₂₃Jesu o ne a ka ba lilemo tse mashome a mararo ha a qala ho ruta. Ha ho lekanngoa, e ne e le mora oa Josefa, mora oa Eli, ₂₄mora oa Matate, mora oa Levi, mora oa Meleki, mora oa Jannai, mora oa Josefa, ₂₅mora oa Matiteea, mora oa Amose, mora oa Nahume, mora oa Hesele, mora oa Nagai, ₂₆mora oa Mahate, mora oa Matiteea, mora oa Shimei, mora oa Joseke, mora oa Juda, ₂₇mora oa Johanne, mora oa Resa, mora oa Sorobabele, mora oa Salatiele, mora oa Neri, ₂₈mora oa Meleki, mora oa Adi, mora oa Kosame, mora oa Elemadama, mora oa Ere, ₂₉mora oa Joshua, mora oa Eleesere, mora oa Jorime, mora oa Matate, mora oa Levi, ₃₀mora oa Simeone, mora oa Juda, mora oa Josefa, mora oa Joname, mora oa Eliakime, ₃₁mora oa Melea, mora oa Menna, mora oa Matatha, mora oa Nathane, mora oa Davida, ₃₂mora oa Jese, mora oa Obede, mora oa Boase, mora oa Shela, mora oa Nashone, ₃₃mora oa Aminadabe, mora oa Arame, mora oa Areni, mora oa Heserone, mora oa Farese, mora oa Juda, ₃₄mora oa Jakobo, mora oa Isaka, mora oa Aborahama, mora oa Tera, mora oa Nakore, ₃₅mora oa Seruge, mora oa Ragau, mora oa Pelege, mora oa Ebere, mora oa Shela, ₃₆mora oa Kainame, mora oa Arepakeshade, mora oa Sema, mora oa Nōoe, mora oa Lameke, ₃₇mora oa Metushela, mora oa Henoke, mora oa Jerede, mora oa Mahalalele, mora oa Kainame, ₃₈mora oa Enoshe, mora oa Seta, mora oa Adama, mora oa Molimo.