Jesu o ruta ka tsa tlhalano
1Eare hoba Jesu a qete lipolelo tsena, a tloha Galelea, a fihla naheng ea Judea, mose ho Jorodane. 2Matšoele-tšoele a mo latela, 'me a a folisetsa teng.
3Bafarisi ba tla ho eena, ba 'motsa potso ho mo leka, ba re: “Na hoa lumelleha hore motho a hlale mosali oa hae ka lebaka lefe kapa lefe?”
4A araba, a re: “Na ha le e-s'o bale hore tšimolohong 'Mōpi ‘o ile a etsa e motona le e motšehali?’ 5'Me a re: ‘Ka baka lena monna o tla tlohela ntat'ae le 'm'ae, a matahane le mosali oa hae, 'me ba babeli bao ba tla fetoha ntho e le 'ngoe.’ 6Kahoo ha ba sa le babeli, e se e le ntho e le 'ngoe. Seo Molimo a se kopantseng se se ke sa arohanngoa ke motho.”
7Ba re ho eena: “Joale ke ka baka la'ng Moshe a laetseng hore mosali ‘a neoe lengolo la tlhalo, 'me a hlaloe?’ ”
8A re ho bona: “Ka baka la bothata ba lipelo tsa lōna, Moshe o ile a le lumella ho hlala basali ba lōna, empa tšimolohong ho ne ho se joalo. 9Kea le bolella hore mang le mang ea hlalang mosali oa hae, haese ka baka la bohlola, a nyala e mong, oa feba.”
10Barutuoa ba hae ba re ho eena: “Haeba boo ke boemo ba litaba tsa monna le mosali, ha ho molemo ho nyala.”
11A re ho bona: “Hase bohle ba amohelang polelo ena, e amoheloa feela ke ba abetsoeng joalo, 12hobane ho na le ba tsoetsoeng e le mahaole; ho na le mahaole a entsoeng mahaole ke batho, 'me ho na le ba ikentseng mahaole ka baka la 'Muso oa maholimo. Ea ka amohelang hona, a ke a ho amohele.”
Jesu o hlohonolofatsa bana
13Eaba bana ba tlisoa ho Jesu hore a ba bee matsoho, a ba rapelle, empa barutuoa ba khalemela ba ba tlisang.
14Jesu a re: “Lesang bana ba tle ho 'na. Le se ke la ba thibela ho tla ho 'na, hobane 'Muso oa maholimo ke oa ba joaloka bona.” 15A ba bea matsoho, a ikela.
Mohlankana oa morui
16Monna e mong a tla ho Jesu, a re: “Moruti, nka etsa eng e molemo, hore ke tle ke be le bophelo bo sa feleng?”
17A mo araba, a re: “Ke ka baka la'ng ha u mpotsa ka se molemo? O mong feela ea molemo. Haeba u batla ho kena bophelong, bōlōka Melao.”
18A 'motsa, a re: “Melao efe?”
Jesu a re: “U se ke ua bolaea; u se ke ua feba; u se ke ua utsoa; u se ke ua etseletsa motho e mong; 19hlompha ntat'ao le 'm'ao, 'me u rate oa heno joalokaha u ithata.”
20Mohlankana a re ho eena: “Tsena tsohle ke li bōlōkile; ke sa hloka eng?”
21Jesu a araba, a re ho eena: “Haeba u batla ho phetheha, e-ea, u rekise maruo a hao, u abele mafutsana chelete eo, 'me u tla ba le letlotlo leholimong; joale u tle, u ntatele.”
22Empa mohlankana ha a utloa polelo ena a tsamaea a soabile, hobane o ne a ruile haholo.
23Jesu a re ho barutuoa ba hae: “Ruri kea le bolella: Ho tla ba thata hore morui a kene 'Musong oa maholimo. 24Hape ke re ho lōna: Ho bonolo hore kamele e tsoe lesobeng la nale ho e-na le hore morui a kene 'Musong oa Molimo.”
25Barutuoa ba hlolloa haholo ha ba utloa hoo, ba re: “Ke mang he ea ka pholosoang?”
26Jesu a ba talima, a re ho bona: “Hona ho sita batho, empa Molimo ha a sitoe ke letho.”
27Eaba Petrose o re ho eena: “Bona, re tlohetse tsohle, ra u latela. Ekaba re tla ba le eng?”
28Jesu a re ho bona: “Ruri kea le bolella, mohla tsohle li nchafatsoang, ha Mor'a Motho a lutse teroneng e tlōtlehang ea hae, le lōna ba ntatetseng le tla lula literoneng tse leshome le metso e 'meli, le ahlōle melōko e leshome le metso e 'meli ea Iseraele. 29Hape mang le mang ea tlohetseng matlo, bana babo, likhaitseli, ntat'ae, 'm'ae, bana, kapa masimo ka baka la lebitso la ka, o tla putsoa halekholo, 'me a rue bophelo bo sa feleng. 30Ba bangata bao e leng ba pele e tla ba ba ho qetela, 'me ba ho qetela e be ba pele.
