Basebetsi tšimong ea morara
1“'Muso oa maholimo o tšoana le mong'a tšimo ea ileng a tsoha kameso ho ea batla batho ba tla sebetsa tšimong ea hae ea morara. 2Hoba a lumellane le basebetsi hore moputso e tla ba denare ka letsatsi, a ba rōmela tšimong ea hae ea morara.
3“Ha e batla e e-ba hora ea borobong hoseng, a tsoa, a bona banna ba bang ba eme lebaleng la motse ba sa etse letho; 4a re ho bona: ‘Le lōna e-eang tšimong ea ka ea morara, 'me ke tla le nea ho le lokelang.’ 5Ba ea.
“Ha e batla e e-ba hora ea leshome le metso e 'meli, a boela a tsoa, a etsa joaloka pele; le ka hora ea boraro a etsa joalo. 6Ha e batla e e-ba hora ea bohlano motšeare oa mantsiboea, a tsoa, a fumana ba bang ba eme, a re ho bona: ‘Le emetse'ng moo letsatsi lohle le sa etse letho?’
7“Ba re ho eena: ‘Ke kahobane ha ho ea re fang mosebetsi.’
“A re ho bona: ‘Le lōna e-eang tšimong ea ka ea morara.’
8“Mantsiboea mong'a tšimo ea morara a re ho mookameli oa mosebetsi oa hae: ‘Bitsa basebetsi, u ba lefe meputso ea bona, ho qala ka ba ho qetela ho isa ho ba pele.’
9“Ba qalileng ho sebetsa ha e batla e e-ba hora ea bohlano ba tla, ba amohela denare e mong le e mong. 10Ba pele ba tla, ba hopola hore ba tla amohela ho fetang hoo, empa e mong le e mong a amohela denare. 11Ba e amohela ba ntse ba korotlela mong'a tšimo, 12ba re: ‘Bana ba ho qetela ba sebelitse hora e le 'ngoe feela, empa u ba lekantse le rōna ba ileng ba sebetsa ka thata letsatsi lohle har'a mocheso.’
13“A araba e mong oa bona, a re: ‘Monn'a heso, ha ke u tlatlape. Na ha rea lumellana ka denare? 14Nka moputso oa hao, u ikele; ke rata ho fa monna enoa oa ho qetela joalokaha ke u file. 15Na ha ke na tokelo ea ho etsa seo ke se ratang ka seng sa ka? Kapa u mōna ha ke fana?’
16“Ka mokhoa o joalo ba ho qetela e tla ba ba pele, ba pele e be ba ho qetela.”
Jesu o bua ka lefu le tsoho ea hae khetlo la boraro
17Jesu ha a nyolohela Jerusalema a ea le barutuoa ba leshome le metso e 'meli boinotšing, 'me ha ba le tseleng a bua le bona, a re: 18“Bonang, re nyolohela Jerusalema, 'me Mor'a Motho o tla neeloa matsohong a baprista ba baholo le Litsebi tsa Molao. Ba tla mo ahlōlela lefu, 19ba neelane ka eena ho balichaba, hore ba mo some, ba mo shape, 'me ba mo thakhise sefapanong, a nt'o tsoha ka letsatsi la boraro.”
Kōpo ea mohats'a Sebedea
20Mohats'a Sebedea, a e-na le bara ba hae, a tla ho Jesu, a mo khumamela, 'me a mo kōpa ho hong.
21Jesu a re ho eena: “U batla'ng?”
A re ho eena: “Laela hore 'Musong oa hao bara bana ba ka ba babeli ba tle ba lule, e mong ka letsohong la hao le letona, e mong ka ho le letšehali.”
22Jesu a araba, a re: “Ha le tsebe seo le se kōpang. Na le ka noa senoelo seo ke leng lekhatheng la ho se noa?”
Ba re ho eena: “Re ka se noa.”
23A re ho bona: “Ha e le senoelo sa ka le tla se noa, empa ha e le ho lula ka letsohong la ka le letona kapa ka ho le letšehali hase 'na ea ka fanang ka hona, ke ha ba ho lokiselitsoeng ke Ntate.”
24Ha barutuoa ba hae ba leshome ba utloa hoo, ba halefela bara bao ba babeli. 25Eaba Jesu oa ba bitsa, o re: “Lea tseba hore babusi ba lichaba ba li busa ka thata, 'me ba baholo ba li tšoara ka thata. 26Empa ha ho na ho ba joalo ho lōna; ea batlang ho ba e moholo har'a lōna, e tla ba mosebeletsi oa lōna, 27'me ea batlang ho ba oa pele har'a lōna, e tla ba mohlanka oa lōna. 28Ka mokhoa o joalo Mor'a Motho ha a ea tlela ho sebeletsoa, empa ho tla sebeletsa le ho neelana ka bophelo ba hae hore e be topollo ea ba bangata.”
Pholiso ea lifofu tse peli
29Ha ba tloha Jeriko letšoelehali la latela Jesu. 30Lifofu tse peli, tse neng li lutse pel'a tsela, ha li utloa hore Jesu oa feta, tsa hōoa, tsa re: “Morena, Mor'a Davida, re hauhele!”
31Letšoele la li khalemela hore li thōle, empa tsa eketsa tsa hōoa, tsa re: “Morena, Mor'a Davida, re hauhele!”
32Jesu a ema, a li bitsa, a re: “Le rata ha ke le etsetsa eng?”
33Tsa re ho eena: “Morena, re batla ho foufolloa.”
34Jesu a li utloela bohlōkō, a ama mahlo a tsona; hang-hang tsa bona, 'me tsa mo latela.
