MATHEU 22

₁Jesu a boela a bua le bona ka litšoantšo, a re: ₂“'Muso oa leholimo o joaloka khosi e neng e etselitse mora oa eona mokete oa lenyalo. ₃Ea rōma bahlanka ba eona ho ea bitsa ba memetsoeng moketeng, empa ba hana ho tla.

₄“Ea boela ea rōma bahlanka ba bang hape, ea re: ‘Bolellang bamemuoa hore ke lokisitse mokete; lipholo le linonneng tsa ka li se li hlabiloe, tsohle li lokile, ba tle moketeng.’

₅“Empa bamemuoa ba se ke ba ba natsa, ba itsamaela; e mong a ikela masimong, e mong a ikela khoebong ea hae. ₆Ba bang ba tšoara bahlanka ba khosi, ba ba etsa hampe, 'me ba ba bolaea. ₇Khosi ea halefa, ea rōmela limphi tsa eona, tsa ripitla babolai bao, tsa chesa motse oa bona.

₈“Eaba e re ho bahlanka ba eona: ‘Mokete oa lenyalo o lokisitsoe, empa ba neng ba memiloe ba ne ba sa lokela. ₉E-eang ke hona mateanong a litsela, 'me bohle bao le ba fumanang le ba memele moketeng.’ ₁₀Eaba bahlanka ba ea litseleng, ba phutha bohle bao ba ba fumanang, ba lokileng le ba khopo, 'me ntlo ea mokete ea tlala tsoete!

₁₁“Khosi ea kena ho tla bona bamemuoa, 'me ea bona motho ea sa aparang seaparo sa mokete. ₁₂Ea re ho eena: ‘Motsoalle, u kene joang moo u se na seaparo sa mokete?’ Empa eo a khutsa.

₁₃“Eaba khosi e re ho basebeletsi: ‘Mo tlameng sekōlōkōtō, le mo lahlele kantle lefifing, moo ho tla ba le lillo le litsikitlano tsa meno.’

₁₄“Ba mengoang ba bangata, empa ba khethoang ha ba bakae.”

₁₅Eaba Bafarisi baa tsamaea, ba il'o buisana ka hore na ba ka mo tšoasa joang ka lipuo tsa hae. ₁₆Ba rōma barutuoa ba bona ba e-na le balateli ba Heroda, 'me ba re: “Moruti, rea tseba hore u motho oa 'nete, 'me u ruta tsela ea Molimo kannete, ha u natse motho, hobane ha u ee ka tšobotsi. ₁₇Re bolelle he: U re'ng? Na hoa lumelleha hore ho ntšetsoe Sesare lekhetho kapa che?”

₁₈Empa Jesu a lemoha bokhopo ba bona, 'me a re: “Baikaketsi ting! Le ntekela'ng? ₁₉Mpontšeng chelete ea lekhetho!” Ba mo tlisetsa denare. ₂₀A re ho bona: “Setšoantšo see, le mongolo oo, ke tsa mang?”

₂₁Ba re: “Ke tsa Sesare.” Eaba o re ho bona: “Ka baka leo, neang Sesare seng sa Sesare, le Molimo seng sa Molimo.”

₂₂Ha ba utloa hona ba hlolloa, ba tloha ho eena, ba ikela.

₂₃Ka lona tsatsi leo Basaduke, ba neng ba re ha ho tsoho ea bafu, ba tla ho eena ba 'motsa, ₂₄ba re: “Moruti, Moshe o itse: ‘Ha monna a e-shoa a se na bana, ngoan'abo o tla kenela mohlolohali eo, a tsoalle ngoan'abo bana.’ ₂₅Joale har'a rōna ho ne ho e-na le bara ba motho ba supileng. Oa pele a nyala, a shoa, 'me kaha a il'a shoa a se na bana a siela ngoan'abo mosali oa hae. ₂₆Ha e-ba joalo le ho oa bobeli le ho oa boraro, ho fihlela le ho oa bosupa. ₂₇Qetellong le eena mosali a shoa. ₂₈Joale, mohl'a tsoho ea bafu, mosali eo e tla ba oa mang ho bao ba supileng, hobane e bile oa bona kaofela?”

₂₉Jesu a ba araba, a re: “Le lahleha ke ho se tsebe Mangolo a halalelang, leha e le matla a Molimo, ₃₀hobane tsohong ea bafu batho ha ba nyalane, empa ba joaloka mangeloi leholimong. ₃₁Tabeng ea tsoho ea bafu, na ha le e-s'o bale seo Molimo a neng a le bolelle sona, a re: ₃₂‘Ke 'na Molimo oa Aborahama, Molimo oa Isaka, le Molimo oa Jakobo?’ Molimo hase Molimo oa bafu, empa ke Molimo oa ba phelang.”

₃₃Matšoele ha a utloa taba ena a hlolloa ke thuto ea hae.

₃₄Hoba Bafarisi ba utloe hore Jesu o koetse Basaduke melomo, ba phutheha. ₃₅E mong oa bona, eo e leng Setsebi sa Molao, a leka Jesu ka potso ena: ₃₆“Moruti, taelo e kholo Molaong ke efe?”

₃₇A re ho eena: “ ‘Rata Morena Molimo oa hao ka pelo ea hao eohle, le ka moea oa hao oohle, le ka maikutlo a hao 'ohle.’ ₃₈Ena ke eona taelo e kholo, ea pele. ₃₉Ea bobeli e tšoanang le eona e re: ‘Rata oa heno joalokaha u ithata.’ ₄₀Molao oohle le Baporofeta ba itšetlehile ka litaelo tse peli tsena.”

₄₁Eare ha Bafarisi ba phuthehile, Jesu a ba botsa, a re: ₄₂“Le re'ng ka Kreste? Ke mora oa mang?”

Ba re ho eena: “Oa Davida.”

₄₃A re ho bona: “Ke ka baka la'ng ha Davida, ka tataiso ea Moea, a 'mitsa Morena, a re: