Jesu oa lekoa
1Eaba Jesu o isoa ke Moea feelleng ho ea lekoa ke Diabolosi. 2A itima lijo ka matsatsi a mashome a mane, le ka masiu a mashome a mane, a nt'o lapa. 3Moleki a mo atamela, a re: “Haeba u Mora oa Molimo, e-re majoe ana a fetohe bohobe!”
4A mo araba, a re: “Ho ngotsoe, ho thoe:
“ ‘Motho a ke ke a phela
ka bohobe feela,
empa o tla phela le ka polelo
e 'ngoe le e 'ngoe
e tsoang molomong oa Molimo.’ ”
5Eaba Diabolosi o mo nka a mo isa motseng o halalelang, 'me a 'mea tlhōrōng ea Tempele, 6a re ho eena: “Haeba u Mora oa Molimo, itihele, hobane ho ngotsoe, ho thoe:
“ ‘O tla laela mangeloi a hae,
'me a tla u khakeletsa ka liatla,
esere leoto la hao
la khoptjoa ke lejoe.’ ”
7Jesu a re ho eena: “Le teng ho ngotsoe, ho thoe: ‘U se ke ua leka Morena Molimo oa hao.’ ”
8Hape Diabolosi a mo nka, a mo isa thabeng e telelehali, a 'montša mebuso eohle ea lefatše le maruo a eona, 9a re ho eena: “Tsena tsohle ke tla u fa tsona ha u ka itihele fatše, ua nkhumamela.”
10Empa Jesu a re ho eena: “Tloha, Satane! Ho ngotsoe, ho thoe:
“ ‘U tla khumamela Morena
Molimo oa hao,
u sebeletse eena a 'notši.’ ”
11Joale Diabolosi a mo tlohela, 'me bonang, mangeloi a atamela, a mo sebeletsa.
Jesu o qala tšebetso ea hae Galelea
12Eare ha Jesu a utloa hore Johanne o tšoeroe, a ea Galelea. 13A tloha Nasaretha, a tla aha Kaperenauma e lebōpong la letša, tikolohong ea Sebulone le Nafthali, 14e le hore ho tle ho phethahale ho boletsoeng ke moporofeta Esaea, ha a re:
15“Lefatše la Sebulone
le lefatše la Nafthali,
nq'a leoatle, mose ho Jorodane,
Galelea ea balichaba,
16sechaba se neng se lutse lefifing
se bone leseli le leholo,
'me ba neng ba lutse lefatšeng
la lefu le lefifing,
ba chabetsoe ke leseli.”
17Ho tloha nakong eo, Jesu a qala ho ruta, a re: “Bakang, hobane 'Muso oa maholimo o atametse!”
Jesu o bitsa batšoasi ba bane ba litlhapi
18Eare ha Jesu a sika le letša la Galelea, a bona bara ba babeli ba motho, Simone ea bitsoang Petrose le Andrease ngoan'abo, ba ntse ba akhela letlōoa letšeng, hobane e ne e le batšoasi ba litlhapi. 19A re ho bona: “Ntšaleng morao, 'me ke tla le etsa batšoasi ba batho.” 20Hang-hang ba tlohela matlōoa a bona, ba mo latela.
21Hoba a fetele pele, a bona bara ba bang ba babeli ba motho, Jakobo mora oa Sebedea le Johanne ngoan'abo, ba e-na le ntat'a bona Sebedea ka sekepeng, ba ntse ba lokisa matlōoa a bona, 'me a ba bitsa. 22Hang-hang ba tlohela sekepe le ntat'a bona, ba latela Jesu.
Jesu oa ruta, o folisa ba bangata
23Jesu a tsamaea le Galelea eohle, a ntse a ruta matlung a thapelo a teng, a phatlalatsa molaetsa o molemo oa 'Muso, a folisa mafu le maloetse 'ohle sechabeng. 24Setumo sa hae sa utloahala Siria eohle, 'me ha tlisoa ho eena bohle ba jeoang ke mafu a mefuta-futa, ba imetsoeng ke mahlōkō, ba nang le bademona, ba shoang sethoathoa, le liritsa, 'me a ba folisa. 25A ba a lateloa ke matšoelehali a tsoang Galelea, Dekapolese, Jerusalema, Judea, le mose ho Jorodane.
