MAREKA 10

₁Jesu a tloha moo, a ea naheng ea Judea le mose ho Jorodane; matšoele a 'mōkanela hape, 'me a a ruta hape, joalokaha a ne a tloaetse.

₂Bafarisi ba tla ho eena, ba 'motsa ka ho mo leka, hore na hoa lumelleha hore motho a hlale mosali oa hae.

₃A ba araba, a re: “Moshe o le laetse'ng?”

₄Ba re: “Moshe o ne a lumele hore ho ngoloe lengolo la tlhalo, 'me ho hlaloe.”

₅Jesu a re ho bona: “O le ngoletse taelo eo ka baka la bothata ba lipelo tsa lōna. ₆Empa ho tloha tšimolohong ea tlholeho Molimo o ile a etsa e motona le e motšehali; ₇ka baka lena monna o tla tlohela ntat'ae le 'm'ae a matahane le mosali oa hae, ₈'me ba babeli bao ba tla fetoha ntho e le 'ngoe; kahoo ha ba sa le babeli, empa e se e le ntho e le 'ngoe. ₉Seo Molimo a se kopantseng se se ke sa arohanngoa ke motho.”

₁₀Ha ba se ba le ka tlung hape, barutuoa ba hae ba 'motsa ka taba ena. ₁₁A re ho bona: “Mang le mang ea hlalang mosali oa hae, a nyala e mong, o mo siteloa ka ho feba, ₁₂'me haeba mosali a hlala monna oa hae, a nyaloa ke e mong, oa feba.”

₁₃Eaba ba tlisa bana ho Jesu hore a ba ame, empa barutuoa ba khalemela ba ba tlisang. ₁₄Eare ha Jesu a bona hona, a halefa, a re ho bona: “Lesang bana ba tle ho 'na, le se ke la ba thibela, hobane 'Muso oa Molimo ke oa ba joaloka bona. ₁₅Kannete kea le bolella, mang le mang ea sa amoheleng 'Muso oa Molimo joaloka ngoana, ha a ka ke a kena ho oona.” ₁₆A ba sika, a ba hlohonolofatsa ka ho ba bea matsoho.

₁₇Ha Jesu a tsoela tseleng, monna e mong a mathela ho eena, a khumama kapele ho eena, a 'motsa, a re: “Moruti ea molemo, nka etsa'ng hore ke tle ke rue bophelo bo sa feleng?”

₁₈Jesu a re ho eena: “U mpitsetsa'ng ea molemo? Ha ho ea molemo haese Molimo feela. ₁₉U tseba melao e reng: ‘U se ke ua bolaea, u se ke ua feba, u se ke ua utsoa, u se ke ua etseletsa motho e mong, u se ke ua qhekanyetsa, hlompha ntat'ao le 'm'ao.’ ”

₂₀A re ho eena: “Moruti, tsena tsohle ke li bōlōkile ho tloha bocheng ba ka.”

₂₁Jesu a mo talima, 'me a mo rata, a re ho eena: “U haelloa ke ntho e le 'ngoe: E-ea, u rekise tsohle tseo u nang le tsona, u abele mafutsana chelete eo, 'me u tla ba le letlotlo leholimong; joale u tle, u ntatele!”

₂₂Mohlankana a khathala matla ke polelo eo, a tsamaea a soabile, hobane o ne a ruile haholo.

₂₃Jesu a qamaka, 'me a re ho barutuoa ba hae: “Ho tla ba thata hakaakang hore ba nang le maruo ba kene 'Musong oa Molimo!”

₂₄Barutuoa ba hlolloa ke lipolelo tsa hae. Jesu a boela a re ho bona: “Bana ba ka, ho thata hakaakang ho kena 'Musong oa Molimo! ₂₅Ho bonolo hore kamele e tsoe lesobeng la nale, ho e-na le hore morui a kene 'Musong oa Molimo!”

₂₆Ba makala haholo, ba botsana, ba re: “Ke mang ea ka pholohang?”

₂₇Jesu a ba talima, 'me a re: “Hona ho sita batho, e seng Molimo, hobane Molimo ha a sitoe ke letho.”

₂₈Petrose a qala ho bua le eena, a re: “Bona, re tlohetse tsohle, ra u latela!”

₂₉Jesu a re: “Kannete kea le bolella, ha ho motho ea tlohetseng ntlo ea hae, le bana babo, le likhaitseli, le 'm'ae, le ntat'ae, le bana, kapa le masimo ka baka la ka le la molaetsa o molemo, ₃₀eo mehleng ea joale a ke keng a fuoa halekholo matlo, le bana babo, le likhaitseli, le bo-'m'ae, le bana, le masimo, hammoho le litlhoriso, a nt'o amohela bophelo bo sa feleng mehleng e tlang. ₃₁Empa ba bangata bao e leng ba pele e tla ba ba ho qetela, ba ho qetela e be ba pele.”

₃₂Ba ne ba le tseleng, ba nyolohela Jerusalema. Jesu o n'a tsamaea kapele ho bona, 'me ba ne ba hloletsoe; athe ha e le ba latetseng ba ne ba tšohile. Eaba o boela a nkela ba leshome le metso e 'meli kathōko, a qala ho ba bolella tse tla etsahala ka eena, ₃₃a re: “Bonang, re nyolohela Jerusalema, 'me Mor'a Motho o tla neeloa baprista ba baholo le Litsebi tsa Molao, 'me ba tla mo ahlōlela lefu, ba neelane ka eena ho balichaba; ₃₄ba tla mo soma, ba mo tšoele ka mathe, ba mo shape, ba 'molaee, a nt'o tsoha ka tsatsi la boraro.”

₃₅Jakobo le Johanne, bara ba babeli ba Sebedea, ba tla ho Jesu, ba re: “Moruti, re batla u re etsetse seo re tla u kōpa sona.”

₃₆A re ho bona: “Le rata ha ke le etsetsa'ng?”

₃₇Ba re ho eena: “Ak'u re nee hore, tlōtleng ea hao, re lule e mong ka letsohong la hao le letona, e mong ka ho le letšehali!”

₃₈Jesu a re ho bona: “Ha le tsebe seo le se kōpang. Na le ka noa senoelo seo ke se noang, kapa le ho kolobetsoa ka kolobetso eo 'na ke kolobetsoang ka eona?”

₃₉Ba re ho eena: “Re ka etsa.”

Jesu a re ho bona: “Senoelo seo ke se noang le tla se noa, 'me kolobetso eo ke tla kolobetsoa ka eona, le tla kolobetsoa ka eona. ₄₀Ha e le ho lula ka letsohong la ka le letona kapa ka ho le letšehali, hase 'na ea ka fanang ka hona, ke ha ba ho lokiselitsoeng.”

₄₁Ha ba leshome ba utloa hona, ba qala ho halefela Jakobo le Johanne. ₄₂Jesu a ba bitsa, 'me a re ho bona: “Lea tseba hore ba talingoang e le babusi ba lichaba ba li busa ka thata, 'me ba baholo ba bona ba li tšoara ka thata. ₄₃Empa ha ho na ho ba joalo ho lōna. Ea batlang ho ba e moholo har'a lōna e tla ba mosebeletsi oa lōna; ₄₄ea batlang ho ba oa pele har'a lōna e tla ba mohlanka oa bohle, ₄₅hobane le Mor'a Motho ha aa ka a tlela ho sebeletsoa, empa ho tla sebeletsa le ho neelana ka bophelo ba hae hore e be topollo ea ba bangata.”

₄₆Ba fihla Jeriko. Ha Jesu a tloha Jeriko le barutuoa ba hae le letšoele, sefofu Baretimea, mor'a Timea, o ne a lutse pel'a tsela a nts'a kōpa. ₄₇Ha a utloa hore ke Jesu oa Nasaretha, a qala ho hōoa, a re: “Jesu, mor'a Davida, nkhauhele!”

₄₈Ba bangata ba ne ba mo khalemela hore a thōle, empa a eketsa ho hōoa haholo, a re: “Mor'a Davida, nkhauhele!”

₄₉Jesu a ema, a re: “'Mitseng!”

Ba bitsa sefofu, ba re ho sona: “Beta pelo, ema, oa u bitsa!”

₅₀Eaba se hlobola seaparo sa sona, se tlōlela holimo, se tla ho Jesu.

₅₁Jesu a se araba, a re: “U rata ha ke u etsetsa'ng?”

Sefofu sa re ho eena: “Morena, nke ke boele ke bone!”

₅₂Jesu a re ho sona: “E-ea, tumelo ea hao e u folisitse.” Hang-hang Baretimea a boela a bona, 'me a latela Jesu tseleng.