NEHEMIA 13

₁Ka tsatsi leo batho ba balloa Buka ea Moshe, 'me ha fumanoa moo ho ngotsoeng hore le ka mohla ho se be le ea mong oa Baamone le oa Bamoabe ea ka lumelloang ho kena phuthehong ea Molimo, ₂hobane ha baa ka ba phallela Baiseraele ka lijo le ka metsi, empa ba ile ba hira Bileame hore a ba rōhake. Leha ho le joalo, Molimo oa rōna a fetola thōhako eo hore e be lehlohonolo. ₃Eitse ha ba utloa Molao, ba qhelela ka thoko balichaba bohle le bohle ba tsoetsoeng ke Baiseraele ba nyallaneng le balichaba.

₄Pele ho moo, moprista Eleashibe e ne e le molebeli oa likamore tsa Tempele ea Molimo. O ne a amana le Tobiea ka lenyalo. ₅O ne a mo lokiselitse kamore e kholo, eo pele e neng e sebelisoa ho bōlōka linyehelo tsa lijo, le mokubetso, le thepa, le karolo e le 'ngoe ea tseo ho fanoeng ka tsona ho tse leshome tsa koro, le tsa veine e ncha, le tsa ole, tseo ka molao ba neng ba lokela ho li nea Balevi, le libini, le balebeli ba menyako, le linyehelo tse neng li fuoa baprista.

₆Empa ka nako ena eohle, 'na, Nehemia, ke ne ke se Jerusalema, hobane ka selemo sa mashome a mararo a metso e 'meli sa puso ea Aretaseresese, khosi ea Babilona, ke ne ke ee ho eena. Kamora' nako e itseng ka kōpa hore khosi e ntokolle, ke tsamaee. ₇Ha ke fihla Jerusalema, ka elelloa bokhopo boo Eleashibe a ileng a bo etsa, ka ho lokisetsa Tobiea kamore mabaleng a Tempele ea Molimo. ₈Taba ena ea nkutloisa bohlōkō haholo. Ka ntša thepa eohle ea Tobiea ka kamoreng eo, ka e lahlela kantle. ₉Eaba ke laela hore ho hloekisoe likamore, 'me tsa hloekisoa. Ka nt'o khutlisetsa thepa ea Tempele ea Molimo, le nyehelo ea lijo, le mokubetso, ka ho tsona.

₁₀Ka hlokomela hore Balevi le libini, e leng bona ba neng ba sebeletsa, ha baa ka ba neoa seabo sa bona, kahoo e mong le e mong oa bona o ne a ipoeletse ha habo. ₁₁Joale ka omanya babusi, ka re ho bona: “Ke ka lebaka la'ng le furaletseng Tempele ea Molimo?” Eaba kea ba bōkella, 'me ka khutlisetsa e mong le e mong litulong tsa hae.

₁₂Bohle ba morabe oa Juda ba tlisa ka matlung a pōlōkelo karolo e le 'ngoe ho tse leshome tsa koro, le tsa veine e ncha, le tsa ole. ₁₃Ka khetha moprista Shelemiea, le Sadoke eo e neng e le mongoli, le Pedaea oa Molevi, ho ba baokameli ba matlo a pōlōkelo. Ba ne ba tlatsitsoe ke Hanane, mora oa Sakure, setlōhōlō sa Mataneea, hobane ba ne ba tšepahala, 'me mosebetsi oa bona e le ho nea bana babo bona liabo tsa bona.

₁₄Eaba ke re: “Oho, Molimo oa ka, ak'u nkhopole ka baka la hona. U se ke ua lebala mesebetsi ea ka e metle, eo ke e etselitseng Tempele ena ea Molimo oa ka, le litšebeletso tsa eona!”

₁₅Mehleng eona eo, ka bona batho ba bang naheng ea Juda, ba tlhōtlang veine ka Sabatha, ba bang ba tlisa mangata a koro, ba a belesitse holim'a litonki; le veine, le morara, le feiee, le thepa ea mefuta-futa, eo ba neng ba e tlisa Jerusalema ka Sabatha. Ka ba khalemela hore ba se ke ba rekisa lijo ka tsatsi leo. ₁₆Banna ba Tire, ba neng ba ahile moo, ba ne ba tlisa litlhapi le thepa ea mefuta-futa Jerusalema, ba e rekisetsa ba morabe oa Juda ka Sabatha. ₁₇Ka khalemela mahosana a Juda, ka re ho 'ona: “Ke bokhopo ba eng boo, boo le bo etsang, 'me le hlompholla letsatsi la Sabatha? ₁₈Bontat'a lōna ba ne ba etse tjena, 'me Molimo oa rōna a re otla, a ba a otla le motse ona. Joale, ka ho hlompholla Sabatha, le etsa hore Molimo a halefele Baiseraele le ho feta.”

₁₉Eitse ha meriti ea mantsiboea e koahela menyako Jerusalema, Sabatha se e-s'o qalehe, ka laela hore menyako e koaloe, 'me e se ke ea ba ea buloa ho fihlela Sabatha se feta. Ka re ba bang ba bahlanka ba ka ba lebele menyako, hore ho se be letho le ka kenngoang ka letsatsi la Sabatha.

₂₀Ka lekhetlo le le leng kapa a mabeli, bahoebi le barekisi ba thepa ea mefuta-futa ba ile ba robala kantle ho Jerusalema. ₂₁Ka ba khalemela, ka re: “Le roballa'ng kantle ho lerako? Ha le ka la boela la etsa joalo, ke tla le isa letsoho.” Ho tloha tsatsing leo, ha baa ka ba hlola ba e-tla ka Sabatha. ₂₂Ka laela Balevi hore ba itlhoekise, ba tl'o lebela menyako, hore letsatsi la Sabatha le 'ne le halalele.

Eaba ke re: “Molimo oa ka, ak'u nkhopole ka baka la hona, 'me u mpaballe ka baka la boholo ba mohau oa hao.”

₂₃Mehleng eona eo, ka bona Bajuda ba nyetseng basali ba Ashedode, le ba Baamone, le ba Bamoabe. ₂₄Karolo e 'ngoe ea bana ba bona e ne e bua puo ea Seashedode, kapa puo e 'ngoe ea lichaba tseo, empa ba sitoa ho bua Seheberu. ₂₅Ka ba khalemela, ka ba nea thōhako, ka ba ka otla ba bang ba bona, ka ba hlōtha moriri. Ka re ba hlapanye ka lebitso la Molimo, ba re: “Re ke ke ra nyallana le balichaba. ₂₆Na Solomone, khosi ea Iseraele, ha aa ka a etsa sebe ka ho etsa lintho tsee? Empa leha ho le joalo, har'a lichaba tse ngata ha ho ea ka ha e-ba le khosi e kang eena, e neng e ratoa ke Molimo oa eona. Molimo a 'mea ho ba khosi ea Baiseraele bohle. Empa le eena o ile a liheloa sebeng ka basali ba balichaba. ₂₇Joale le re re le lumelle le etse bokhopo bo bokaale-kaale, le siteloe Molimo oa rōna, ka ho nyala basali ba balichaba?”

₂₈E mong oa bara ba Joeada, setlōhōlō sa Moprista e Moholo Eleashibe, e ne e le mokhoenyana oa Sanebalate oa Mohore. Eaba kea mo leleka.

₂₉Ka boela ka re: “Ak'u ba hopole, Molimo oa ka, hobane ba hlompholotse boprista, le selekane sa boprista, le sa Balevi.”

₃₀Ka mokhoa o joalo ka ba hloekisa ka ho ba lahlisa mekhoa eohle ea balichaba, ka ba abela mesebetsi ea bona ea boprista le ea Balevi, e mong le e mong a ba mosebetsing oa hae. ₃₁Ka ba ka ba beela nako ea ho tlisa patsi ea secheso le ea ho tlisa lilopotsiea.

Ka re: “Oho, Molimo oa ka, ak'u nkhopolele tse molemo!”