LIPALO 25

₁Ha Baiseraele ba le Shitime, sechaba sa qala ho etsa bootsoa le barali ba sechaba sa Moabe. ₂Barali bana ba memela Baiseraele mahlabelong ao ba neng ba nyehella melimo eo ea bona ka 'ona. Sechaba sa e-ja, sa khumama kapele ho melimo eo ea bona. ₃Baiseraele ba khumamela Baale-Peore, 'me khalefo ea Molimo ea ba tlōkōmela.

₄Morena a re ho Moshe: “Nka baetapele bohle ba sechaba, u ba fanyehe kapele ho Morena, motšeare, tsatsi le itse nte! khalefo ea Morena e tlōkōmang e tle e faposoe Baiseraele.”

₅Moshe a re ho baahlōli ba Iseraele: “E mong le e mong oa lōna a bolaee banna ba habo, ba ileng ba sebeletsa Baale-Peore.”

₆Bonang, monna e mong oa bana ba Iseraele a tlisa mosali oa Momidiane ho bana babo, moo Moshe a ntseng a bona, le moo sechaba sohle sa bana ba Iseraele se ntseng se bona, se ntse se lla se le monyakong oa Tente ea Morena. ₇Ha Finiase, mora oa Eleasare, setlōhōlō sa moprista Arone, a bona hona, a ema, a tloha har'a phutheho eo. A nka lerumo ka letsoho la hae, ₈a sala monna eo oa Moiseraele morao ho ea ka tenteng ea hae, a ba phehletsa ka lerumo bobeli ba bona, monna eo oa Moiseraele le mosali eo. Seoa se neng se oetse bana ba Iseraele holimo sa fela, ₉empa se ne se se bolaile batho ba likete tse mashome a mabeli a metso e mene.

₁₀Morena a bua ho Moshe, a re: ₁₁“Finiase, mora oa Eleasare, setlōhōlō sa moprista Arone, o fapositse khalefo ea ka ho bana ba Iseraele, hobane ke eena feela har'a bona ea mpoulelang joalokaha ke boulela. Ke ka baka lena ha ke ne ke halefile ke sa kang ka timetsa bana ba Iseraele. ₁₂Kahoo ba bolelle, u re: ‘Ke etsa selekane sa ka sa khotso le eena. ₁₃Ho eena, le ho litlōhōlō tsa hae, selekane sena e tla ba sa boprista kamehla eohle, hobane o ile a boulella Molimo oa hae, a etsetsa bana ba Iseraele tefelo ea sebe.’ ”

₁₄Lebitso la monna oa Moiseraele, ea ileng a bolaoa 'moho le mosali oa Momidiane, e ne e le Simeri, mora oa Salō, khosana ea ntlo ea morabe oa Simeone. ₁₅Lebitso la mosali oa Momidiane, ea ileng a bolaoa, e ne e le Kosebi, morali oa Sure, khosana ea ntlo e 'ngoe ea Moabe oa Bamidiane.

₁₆Morena a bua ho Moshe, a re: ₁₇“Futuhela Bamidiane, u ba timetse, ₁₈ka baka la bolotsana boo ba ileng ba le etsetsa bona, ba le thetsa ka taba ea Peore; le ka baka la taba ea Kosebi, morali oa khosana ea Midiane, khaitseli ea bona e ileng ea bolaoa ka baka la Peore, mohl'a letsatsi la seoa.”