MAELE 30

Monna eo a bua, a re:

“Oho, Molimo ke khathetse!

Oho, Molimo ke khathetse!

Ke feletsoe ke matla!

₂'Na ke sethoto

ho feta mang kapa mang,

ha ke na le kutloisiso ea botho.

₃Ha kea ka ka ithuta bohlale,

ebile ha ke tsebe Ea Halalelang.

₄Ea nyolohetseng leholimong

a b'a theoha ke mang?

Ea fupereng moea

ka liatla tsa hae ke mang?

Ea bokeletseng metsi

ka aparong sa hae ke mang?

Ea sehileng meeli

ea lipheletso tsa lefatše ke mang?

Lebitso la hae ke mang?

La mora oa hae lona ke mang?

Haeba ua tseba, bolela!

₅“Polelo tsohle tsa Molimo

ke tsa 'nete.

Ke thèbè ho bohle ba mo tšepang.

₆Se eketse letho polelong tsa hae,

esere a u khalema,

ua fumanoa u le leshano.”

₇“Ke kōpile ntho li le peli ho uena,

u se nkhanele ka tsona

pele ke e-shoa:

₈Suthisetsa bolotsana le mashano

hōle le 'na,

u se ke ua nthuisa

kapa ua mphutsanehisa,

u mphepe ka lijo tse ntekaneng;

₉esere ha ke khotše

eaba kea u latola,

ke re: ‘Morena ke mang?’

Kapa ka futsaneha,

eaba kea utsoa,

'me ka tlaela

ka lebitso la Molimo oa ka.

₁₀“U se ke ua nyelisa mohlanka

ho mong'a hae,

esere a u rōhaka,

ua fumanoa u le molato.

₁₁“Molōko o teng

o rōhakang bo-ntat'a oona,

o sa hlompheng le bo-'m'a oona.

₁₂Molōko o teng

o ithetsang ka ho re o hloekile,

empa o sa hloekisoa

litšila tsa oona.

₁₃Molōko o teng o ikhōhōmōsang,

o shebang batho ka ho ba nyelisa.

₁₄Molōko o teng

o meno o kang lisabole,

oo a mohlaare a kang lithipa,

ho harōla bafumanehi lefatšeng,

le bahloki ba phelang har'a sechaba.

₁₅“Koili e na le malinyane

a le mabeli,

a kōpang a re: ‘Re fepe! Re fepe!’

“Ntho li tharo tse sa khotsofaleng,

e, li 'ne tse sa ke be li re:

‘Ho lekane!’

₁₆Ke lebitla le mosali oa nyōpa,

le mobu o omeletseng,

le mollo o sa ke be o re:

‘Ho lekane!’

₁₇“Leihlo le tšehang ntat'a lona,

le nyelisang taelo ea 'm'a lona,

makhoaba a likhohlo a tla le honya,

'me malinyane a ntsu a le je.

₁₈“Ntho li tharo

tse 'makatsang haholo,

e, li 'ne tseo ke sa li tsebeng:

₁₉Mohlala oa ntsu sepakapakeng,

mohlala oa noha holim'a lefika,

mohlala oa sekepe har'a leoatle,

mohlala oa monna ho moroetsana.

₂₀“Mokhoa oa mosali oa sefebe

ke mokhoa a tjena:

Oa ja, ebe oa itlhakola, o re:

‘'Na ha kea etsa letho le khopo.’

₂₁“Ntho li tharo

tse reketlisang lefatše,

li 'ne

tseo le ke keng la li mamella:

₂₂Ke lekhoba leo e-bang khosi,

le sethoto se nyonyobetseng,

₂₃le moshejoa-hang ha a nyaloa,

le lekhabunyane

le jang lefa la mong'a lona.

₂₄“Ntho li 'ne

tse nyenyane lefatšeng,

empa tse bohlale bo makatsang:

₂₅Bohloa ke chaba se hlokang matla,

empa bo bokella

lijo tsa bona hlabula.

₂₆Lipela ke chaba se fokolang,

empa li etsa

qhobo tsa tsona mafikeng.

₂₇Litsie tsona ha li na khosi,

empa ha li falla

li fofa ka mekhahlelo.

₂₈Mokholutsoane

u ka o tšoara ka letsoho,

empa o fumanoa

ka matlung a likhosi.

₂₉“Ntho li tharo

tse bohehang ha li tsamaea,

e, li 'ne tse natlailang:

₃₀Ke tau,

batana se matla ho feta tsohle,

eo ho seng letho

leo e ka le balehang;

₃₁ke mokōkō o qholoshang

har'a lithole,

hape ke phooko,

ke khosi

e futuhang ka mabōtho a eona.

₃₂“Haeba u bile sethoto,

ua ikhantša,

kapa ua nahana merero e mebe,

bea letsoho molomong u khutse,

₃₃hoba lebese ha le fehloa

le etsa sereleli,

le nko ha e otloa e tsoa mokola,

kahoo khalefo e fehla meferefere.”