MAELE 6

₁Mora oa ka,

ha u itlamme

ho lefa molato oa oa heno,

ua hlapanyetsa e mong ho mo lefella,

₂polelo tsa hao li tla u tšoasa,

mantsoe a hao a u etsetse leraba.

₃Ha u rata ho itokolla, mor'a ka,

kahobane u tla be u le matsohong,

matsohong a mohaeno,

etsa tjena:

E-ea, u ikokobetse ho eena,

u mo rapele ho fihlela a u mamela.

₄U se ke ua robala,

leha e le hona ho otsela.

₅Ipholose sa tšèpè

matsohong a setsomi,

ipholose sa nonyana

rabeng la motšoasi oa eona.

₆Hela! uena sekhōba,

tsamaea u ee ho bohloa!

Hlahloba mekhoa ea bona,

u tl'u hlalefe!

₇Leha bo se na motsamaisi,

bo se na 'musi le mohlahlobi,

₈hlabula bo ipatlela lijo tsa bona,

bo ipokellele tsona ha ho kotuloa.

₉Uena sekhōba

u tla robala ho fihlela neng?

U tla tsoha neng borokong ba hao?

₁₀U re: “A nke ke re shoa!

ke boele ke re shoa!

ke phutha-phuthe matsoho,

ke iphomolele.”

₁₁Fuma ba hao bo tla u nanarela,

bo u nanarele joaloka senokoane,

tlala e u oele holimo

sa motho a nkile lihlomo.

₁₂Motho e mobe, ea khopo,

o tsamaea a fefetha leshano;

₁₃o roba leihlo la hae,

a ngola-ngole fatše ka leoto,

a qhoaea-qhoaee ka monoana;

₁₄o rera thetso ka pelong ea hae,

kamehla o jala moferefere.

₁₅Koluoa e tla mo oela holimo,

e mo oele holimo ka tsometso,

a timetsoe hang-hang

ho se na pheko.

₁₆Ntho li tšeletse,

tseo Morena a li hloileng,

e, li supile

tseo e leng manyala ho eena:

₁₇Ke mahlo a ikhōhōhōmōsang,

leleme le tletseng thetso,

matsoho a tšollang mali,

mali a se nang molato;

₁₈pelo e rerang bokhopo,

maoto a potlakelang bobeng;

₁₉paki ea bohata, e bolelang leshano,

le ea jalang liqabang

har'a bana ba motho.

₂₀Mora oa ka,

boloka taelo tsa ntat'ao,

u se furalle thuto ea 'm'ao;

₂₁li boloke ka pelong ea hao,

li roale molaleng oa hao.

₂₂Ha u tsamaea li tla u etella pele,

ha u robala ebe lia u lebela,

ha u tsoha ebe li bua le uena.

₂₃Taelo ke lona lebone,

thuto ke lona leseli,

khalemo ke bona bophelo,

₂₄ho u phemisa mosali oa sehlola,

le molomo-monate oa seraburabu.

₂₅pelo ea hao

e se lakatse botle ba sona,

mahlo a sona a se k'a u hohela,

₂₆hoba seotsoa,

le ka sengoatho u ka se reka,

athe sehlola sona

se tsoma bophelo ba hao.

₂₇Na motho a ka okha mollo,

a o okhela fubeng sa hae,

ebe aparo tsa hae

tsona ha li tuke malakabe?

₂₈Na motho a ka tsamaea

holim'a mashala,

ebe maoto a hae 'ona ha a che?

₂₉O joalo ea kenang

kobong tsa mosali oa motho,

ea amang mosali,

eo a ke ke a phema kahlōlo!

₃₀Sholu ha le utsoa hoba le lapile,

batho ha ba ke ba le nyelisa.

₃₁Ha le ka tšoaroa le tla lefa hasupa,

le lefe ka tsohle tsa lapa la lona.

₃₂Motho ea febang o hloka kelello,

ea etsang joalo

o timetsa bophelo ba hae;

₃₃o tla batoa leoma a tlontlolohe,

lihlong tsa hae

li se ke tsa hlola li fela.

₃₄Poulelo e halefisa mong'a mosali,

ha a iphetetsa ha a qenehele letho;

₃₅a ke ke a amohela tefo

ea mofuta ofe le ofe,

a ke ke a khotsofatsoa ke limpho,

leha mpho tseo li ka ba ngata.