LIPESALEMA 144

Ho bokoe Morena, lefika la ka,

eena ea nthutang ho loana,

eena ea nkoetlisetsang ntoa.

₂Ke setšabelo sa ka

le qhobosheane ea ka,

seqhobo sa ka

le monamoleli oa ka;

ke thèbè ea ka,

eo ke itšireletsang ka eona,

ke eena ea beang lichaba

katlas'a puso ea ka.

₃Morena, ebe motho e ne e le eng,

hoo u ka mo nkelang hloohong?

Ngoan'a motho e ne e le eng,

hoo u ka mo hopolang?

₄Motho o tšoana le lefeela,

litšiu tsa hae

li joaloka moriti o fetang.

₅Morena, phetla maholimo a hao,

u theohe, u ame lithaba

li tle li fōqōhe mosi.

₆Betsa mahalima,

lira li tle li qhalane,

u fule ka metsu ea hao,

li tle li phasa-phase.

₇'Nanabele u le holimo,

u mpholose,

u nkinole metsing a leoatle,

le matsohong a balichaba;

₈ba buang mashano

ka melomo ea bona,

ba phahamisang matsoho

ho hlapanyetsa bohata.

₉Molimo, ke tla u binela,

ke u binele sefela se secha,

ke u roke

ka harepa e khoele li leshome,

₁₀uena ea neang likhosi tlhōlo,

uena ea pholosang Davida,

mohlanka oa hao.

₁₁Mpholose saboleng e sehlōhō,

'namolele matsohong a balichaba

ba buang mashano

ka melomo ea bona,

ba phahamisang matsoho

ho hlapanyetsa bohata.

₁₂Bara ba rōna, bocheng ba bona,

ba ke ba be joaloka litlama,

tlama tse hōlang hantle;

barali ba rōna ba be joaloka litšiea,

tšiea tsa lihuku

tse betletsoeng ntlo ea bokhosi.

₁₃Meliko ea rōna e ke e tlale,

e tšolohe lijo tsa mefuta-futa.

Manku a rōna a ke a ate ka likete,

e be likete-kete makhulong a rōna;

₁₄makhomo a rōna a ke a emare,

a se folotse

kapa a shoeloa ke manamane,

ho se be libōkō mabaleng a motse.

₁₅Ho lehlohonolo sechaba

se tleloang ke tse joalo,

ho lehlohonolo sechaba

seo Morena e leng Molimo oa sona.