Molimo o baballa sechaba sa hae
1Haleluja!
Ke hantle
ho boka Morena,
ho monate
ho roka Molimo oa rōna,
o lokeloa ke thoriso.
2Morena o tsosa
marako a Jerusalema,
o phutha Baiseraele
ba neng ba lelekiloe.
3O folisa ba pelo li hlabehileng,
o tlamella maqeba a bona.
4O tseba palo ea linaleli,
kaofela ha tsona
o li bitsa ka mabitso.
5Morena oa rōna o moholo,
o matla haholo,
kelello ea hae e ke ke ea lekanngoa.
6Morena o phahamisa ba eisehang,
ba khopo o ba lihela fatše.
7Binelang Morena sefela sa teboho,
le roke Molimo oa rōna ka harepa.
8Ke eena ea koahelang maholimo,
ea a koahelang ka maru,
ea nesetsang lefatše pula,
ea melisang joang lithabeng.
9O fepa liphoofolo ka lijo tsa tsona,
le malinyane a makhoaba
ka tseo a li llelang.
10Morena ha a thabele matla a lipere,
ha a khahloe ke lebelo la motho;
11o khahloa ke ba mo tšabang,
le ba tšepileng mohau oa hae.
12Tlotlisa Morena, uena Jerusalema,
uena Sione, rorisa Molimo oa hao.
13O tiisitse mekoallo,
mekoallo ea likhoro tsa hao,
a hlohonolofatsa bana ba hao
ba phelang ho uena.
14O entse hore khotso e be teng
meeling ea hao,
a u khōrisa ka koro e atlehileng.
15Ke eena ea ntšang taelo ea hae
e eang lefatšeng,
molaetsa oa hae oa potlaka.
16O khethehisa lehloa le kang boea,
o etsa hore serame se lale,
se ke molora.
17O hasanya sefako sa hae
se kang makumane;
ke mang ea ka phelang
har'a mohatsela oa hae?
18Hang ha a ntša taelo,
li se li qhibiliha.
O fokisa moea,
metsi a boele a phalle.
19O tsebisa ba lelōko la Jakobo,
o ba tsebisa lentsoe la hae,
le thato le kahlōlo tsa hae ho Iseraele.
20Ha ho sechaba
seo a kileng a se etsetsa joalo,
ha ho sechaba
seo a kileng a se tsebisa
kahlōlo tsa hae.
Haleluja!
