LIPESALEMA 17

Morena, ak'u utloe thapeli ea ka,

u mamele sello sa ka;

u sekehele thapelo ea ka tsebe,

hobane e tsoa molomong

o se nang mano.

₂A nke ke ahlōloe ke uena,

mahlo a hao a bone seo e leng toka.

₃U hlahlobile pelo ea ka,

ua ntlhoela le bosiu,

ua 'nonya,

empa ha ua fumana letho le khopo;

ha kea bua tse mpe joaloka ba bang.

₄Ho ea ka mantsoe

a tsoang molomong oa hao,

ke qobile mekhoa ea linokoane.

₅Mehato ea ka

e latetse mehlala ea hao,

maoto a ka

ha aa ka a khothometseha.

₆'Na ke ipiletsa ho uena Molimo,

hobane u tla nkaraba;

ntšekehele tsebe,

u mamele lentsoe la ka.

₇Ak'u bonahatse mohau oa hao,

mohau o hlollang.

Ba balehelang ka tsohong la hao

le letona,

ke uena ea ba pholosang

ho ba ba tsohelang matla.

₈U mpaballe

joaloka thaka ea leihlo la hao;

u mpate moriting oa mapheo a hao,

₉hōle le ba khopo ba ntlhekefetsang,

hōle le lira tse ntikanetseng.

₁₀Pelo tsa bona ha li na mohau,

melomo ea bona e tletse boikakaso.

₁₁Ba tla ba ntobile,

joale ba nketsetsa sakana-la-nkōpe,

ba ntsoepetse mahlo

ho nkhatakella fatše.

₁₂Ba joaloka tau

e labalabelang ho harōla,

le joaloka taoana

e bothileng selaong.

₁₃Thusa, Morena!

Ba futuhele, u ba lihe;

ka sabole ea hao

pholosa bophelo ba ka ho ba khopo;

₁₄ka letsoho la hao mpholose Morena,

mpholose ho batho bana ba lefatše,

bao moputso oa bona

o leng bophelong bona.

Ba khorise sa mpana-phatloha,

ba khorise

ka tseo u ba bōlōketseng tsona;

le bana ba bona

ba tla li khotsofalla,

ba tle ba li siele

le litlōhōlō tsa bona.

₁₅Empa 'na, ha ke se ke ahlōletsoe,

ke tla bona fahleho sa hao;

ha ke tsoha

ke tla khotsofalla boteng ba hao.