LIPESALEMA 26

Nkahlolele Morena;

metsamao ea ka ha e na koli,

kea u tšepa, ha ke thekesele.

₂Ntlhahlobe, Morena,

u nonye maikutlo a ka,

hlahlobisisa moea oa ka

le pelo ea ka.

₃Ke hopola mohau oa hao kamehla,

ke phela ho ea ka 'nete ea hao.

₄Ha ke ahisane le batho ba leshano,

ha ke kopane le baikaketsi.

₅Ke hloile mokhatlo

oa ba etsang bobe,

nke ke ka ahisana le ba khopo.

₆Ke hlapa matsoho

ho bontša hore ha ke na molato,

ke pota-pota aletare ea hao Morena,

₇ke ntse ke bina sefela sa teboho,

'me ke bolela limakatso tsa hao.

₈Morena, ke rata ntlo

eo u ahileng ho eona,

e leng sebaka seo tlōtla ea hao

e lulang ho sona.

₉U se ke ua ntimetsa

'moho le baetsalibe,

ua felisa bophelo ba ka

'moho le ba bona,

bona ba ratang ho tšōlla mali,

₁₀bao matsoho a bona

a etsang tsa bolotsana,

bao liatla tsa bona

li amohelang tjotjo.

₁₁Ha e le 'na,

metsamao ea ka ha e na koli;

ak'u ntopolle, u nkhauhele.

₁₂Maoto a ka a eme motsitseng;

Morena, ke tla u boka liphuthehong.