Lehlohonolo la ea lokileng le bomalimabe ba ea khopo
1Pesalema ea Davida; mohla a itlhantšang kapele ho Abimeleke; eo a mo tebela, eaba Davida oa itsamaela.
2Ke tla boka Morena ka nako tsohle,
ke 'ne ke mo rorise kamehla.
3Ke ithorisa ka Morena,
ba eisehang ba ke ba utloe,
'me ba thabe.
4A re tlotliseng Morena re le 'moho,
a re phafeng lebitso la hae,
re le phafe hammoho.
5Ke ile ka batla Morena,
'me a nkaraba,
a ntopolla matsoalong 'ohle a ka.
6Ba talimang ho eena
ba khanya khotso,
mahlong a bona lihlong ha li eo.
7Motho oa batho
ha a ipiletsa ho Morena,
Morena oa mo utloa,
o mo pholosa
matšoenyehong 'ohle a hae.
8Lengeloi la Morena
le sireletsa kamahohle
ba mo tšabang,
'me lea ba namolela.
9Latsoang, le utloe
molemo oa Morena!
Ho lehlohonolo motho
ea tšabelang ho eena.
10Tšabang Morena,
lōna bahalaleli ba hae,
hobane ba mo tšabang
ha ba hloke letho.
11Leha barui ba ka futsaneha, ba lapa,
ba batlang Morena ba ke ke ba hloka,
ba ke ke ba hloka letho le molemo.
12Tloong, bana ba ka, le 'mamele,
ke tla le ruta ho tšaba Morena.
13Ke mang oa lōna
ea lakatsang ho phela,
ea ratang ho bona matsatsi a thabo?
14Tšoara leleme la hao
le se bue tse mpe,
le molomo oa hao
o se bue leshano.
15Furalla bobe, u etse botle;
batla khotso, u e pheelle.
16Morena o beile leihlo la hae
ho ba lokileng,
o sekehetse sello sa bona tsebe.
17Sefahleho sa Morena se sosobane,
se sosobanetse ba etsang bobe,
hore a ba hlakole lefatšeng,
ba se hlole ba hopoloa.
18Ha ba lokileng ba lla,
Morena oa ba utloa;
o ba lopolla
matšoenyehong 'ohle a bona.
19Morena o haufi
le ba feletsoeng ke tšepo,
o pholosa ba meea e tetebetseng.
20Mahlomola a ea lokileng a mangata,
empa Morena o mo lopolla
ho 'ona 'ohle.
21O baballa masapo 'ohle a hae,
ha ho le le leng la 'ona
le tla robeha.
22Bobe bo tla timetsa ea khopo,
ba hloileng ea lokileng
ba tla ahlōloa.
23Morena o lopolla bophelo
ba bahlanka ba hae;
ho ba tšabelang ho eena,
ha ho le ea mong ea tla ahlōloa.
