Teboho ea motho ea thusitsoeng ke Molimo
1Pesalema ea Davida, e qapetsoeng motsamaisi oa libini.
2Ke ile ka lebella Morena
ka mamello;
a retelehela ho 'na,
a mamela sello sa ka.
3A 'nyolla mokoting oa timelo,
tebetebeng ea seretse,
a nkemisa holim'a lefika,
a tiisa mehato ea ka.
4A etsa hore ke bine sefela se secha,
se rorisang Molimo oa rōna.
Ba bangata ha ba bona hona,
ba tla tšaba Morena, ba mo tšepe.
5Ho lehlohonolo motho ea tšepang,
ea beileng tšepo ea hae ho Morena,
ea sa khemeng le baikakasi,
le ba khelosoang ke mashano.
6Morena Molimo oa ka,
u re etselitse tse kholo,
e leng mesebetsi ea hao
e makatsang,
le merero ea hao e makatsang;
ha ho ea ka lekanngoang le uena.
Ha nka rata ho e bolela
le ho e phatlalatsa,
e mengata hoo e ke keng ea baloa.
7Ha u khahloe ke sehlabelo
kapa nyehelo,
u thibolotse tsebe tsa ka.
Ha u batle secheso kapa sehlabelo
e leng tse etsoang ka baka la libe.
8Ke moo ke ileng ka re:
“Bona, kea tla.
Ho ngotsoe ka 'na Bukeng ea Molao:
9Ke thabela ho etsa thato ea hao,
Molimo oa ka.
Molao oa hao o ka pelong ea ka.”
10Ke boletse tsa ho loka ha hao,
ka li bolela phuthehong e kholo;
uena Morena, ua tseba,
ha kea ka ka khutsa.
11Ha kea ka ka pata ho loka ha hao,
ka ho pata pelong ea ka,
ke boletse botšepehi ba hao,
ka bolela le eona thuso ea hao;
ha kea ka ka pata,
ka patela phutheho e kholo,
ka e patela mohau le 'nete ea hao.
12Morena, u se ke ua ntima
lerato la hao,
mohau oa hao le 'nete ea hao
li 'ne li mpōlōke ka mehla eohle.
13Ke aparetsoe ke litlokotsi,
tlokotsi tse ke keng tsa baloa,
melato ea ka e ntšoere,
e ntšoere
hoo ke sitoang le ho sheba,
e mengata
ho feta qōba tsa moriri oa ka,
pelo ea ka e nyahame.
14Ak'u khahloe ho 'namolela, Morena;
Morena, phakisa u nthuse.
15Ba batlang ho timetsa bophelo ba ka
ba ke ba hlajoe ke lihlong,
ba ferekane kaofela.
Ba ntakaletsang bobe
ba ke ba cheche, ba tlontlolohe.
16Ba ke ba soabe haholo
ka baka la ho tlontloloha ha bona,
bana ba reng ka 'na: “Aha! Aha!”
17Bohle ba u batlang
ba ke ba nyakalle,
ba u thabele.
Ba ratang ho pholosoa ke uena
ba 'ne ba re: “Morena o moholo!”
18Ha e le 'na
ke mohlōphehi le mofutsana,
empa Morena oa nkhopola.
Ke uena mothusi le molopolli oa ka;
Molimo oa ka, se liehe.
