LIPESALEMA 44

₂Molimo, re utloile ka tsebe tsa rōna,

bo-ntat'a rōna ba re phetetse tsohle

tseo u li entseng mehleng ea bona,

ua li etsa ka tsoho la hao,

ua li etsa mehleng eo ea khale.

₃U ile ua leleka lichaba,

hore u tle u ba bee naheng ea tsona;

ua etsa merabe hampe,

hore ba tle ba namele hohle.

₄Hase ka sabole ba hapileng naha eo,

leha e le ho hlōla

ka matsoho a bona;

empa e bile

ka tsoho la hao le letona,

le ka sefea sa hao,

le ka ho ba phuthollela

fahleho sa hao,

hobane u ne u ba rata.

₅Ke uena khosi ea ka

le Molimo oa ka,

ea sitsang Jakobo ka tlhōlo.

₆Ke ka uena re lihang

ba re loantšang;

ka lebitso la hao rea hatakela,

re hatakela ba re tsohelang matla.

₇Ha kea tšepa seqha sa ka,

le ho hlōla ka sabole ea ka.

₈Empa ke uena ea re pholosang,

ea re pholosang

ho ba re loantšang;

ba re hloileng

ba hlabisa lihlong.

₉Re rorisa Molimo kamehla,

ha re khaotse ho boka lebitso la hao.

₁₀Empa joale u re lahlile,

ua etsa hore re tlontlolohe;

ha u sa tsoa le mabōtho a rōna.

₁₁U entse hore ba re loantšang

ba re chechise;

ba re hloileng

ba ikhapetse tsa rōna,

ba ikhapela tsona ka ho rata.

₁₂U re tloheletse

ho ba linku tse hlajoang,

ua re qhalanya har'a lichaba.

₁₃U rekisitse sechaba sa hao

u sa fumane letho,

ha ua rua letho ka theko ea sona.

₁₄U re fetotse sekhobo

ho baahisane ba rōna;

sesomo le setšeho

ho ba re pota-potileng.

₁₅U re entse pale har'a lichaba,

merabe e re sisinyetsa lihlooho.

₁₆Ke hopola

ho tlontloloha ha ka kamehla,

sefahleho sa ka

se aparetsoe ke lihlong,

₁₇ka baka la mantsoe a ea hlapaolang,

mantsoe a ea nyefolang,

ka baka la sera le moiphetetsi.

₁₈Tsena tsohle li re oetse holimo,

tsa re oela re sa ka ra u lebala,

re sa ka ra roba selekane sa hao.

₁₉Pelong tsa rōna ha rea u koenehela,

maoto a rōna

ha aa fapoha tsela ea hao;

₂₀empa uena u re robokeletse,

ua re robokella

moo ho phelang liphokojoe,

ua re koahela ka lefifi,

fifi le letšo-letšo.

₂₁Hoja re ne re lebetse lebitso,

lebitso la Molimo oa rōna,

re phahamisitse matsoho a rōna,

re a phahamiselitse molimo osele,

₂₂na Molimo a ka be a sa sibolla hoo,

eena ea tsebang liphiri

tse ka lipelong?

₂₃Ke ka baka la hao

re bolaoang kamehla,

re nkoang re le linku tse hlajoang.

₂₄Tsoha, Morena, u robaletse'ng?

Tsoha, u se ke ua re lahlela ruri!

₂₅U patetse'ng sefahleho sa hao?

U lebaletse'ng

ho hlōpheha ha rōna

le ho hatelloa ha rōna?

₂₆Meea ea rōna e kulupana lerōleng,

re hahaba fatše ka limpa.

₂₇Tsoha, u re thusetse!

Re lopolle ka baka la mohau oa hao.