LIPESALEMA 5

₂Oho, Morena,

ak'u sekehele mantsoe a ka tsebe,

u mamele mefehelo ea ka.

₃Uena khosi ea ka le Molimo oa ka,

ak'u utloe ha ke llela thuso.

Ke rapela uena Morena,

₄hoseng u utloa sello sa ka;

hoseng ke lokisa sehlabelo,

'me ke lebella karabelo ea hao.

₅U Molimo ea sa thabeleng bokhopo;

motho e mobe

u ke ke ua mo amohela.

₆Baikhōhōmōsi ba ke ke ba ema

pel'a sefahleho sa hao;

u hloile bohle

ba etsang tse sa lokang.

₇U timetsa ba leshano;

Morena o nyonya babolai

le bathetsi.

₈Empa 'na nka kena tlung ea hao,

ka baka la boholo ba mohau oa hao.

Ke tla u khumamela ka tšabo,

ka Tempeleng ea hao e halalelang.

₉Morena, ak'u ntataise

ka ho loka ha hao,

ka baka la lira tsa ka tse ntaletseng.

Batalatsa tsela ea hao kapele ho 'na.

₁₀Melomong ea lira tsa ka

ha ho 'nete e tsoang,

lipelong tsa tsona li rera ho timetsa,

'metso ea tsona

ke lebitla le ahlameng,

maleme a tsona a monate.

₁₁Molimo, li ahlōlele

molato oa tsona,

li oe ka baka la merero ea tsona.

Li leleke

ka baka la litlōlo tsa tsona tse ngata,

hobane li u teletse.

₁₂Empa bohle ba tšabelang ho uena

ba ke ba thabe,

bao u ba sireletsang

ba se khaotse ho etsa litlatse,

bohle ba ratang lebitso la hao

ba u nyakallele.

₁₃Ke uena Morena,

ea hlohonolofatsang ea lokileng,

u mo sireletsa ka mohau oa hao

joalokaha eka ke thèbè.