LIPESALEMA 76

₂Molimo oa tsejoa naheng ea Juda,

lebitso la hae le leholo Iseraeleng.

₃Motlotloane oa hae o Salema,

leaho la hae le Sione.

₄Ke moo a robileng metsu,

metsu e bebang ea seqha,

le thèbè, le sabole, le hlomo tsa ntoa.

₅U khanya hakaakang,

u tlōtleha hakaakang,

ha u khutla lithabeng tsa tlhōlo!

₆Linatla li hlakotsoe khapo ea tsona,

tsa robala boroko ba lefu;

bahlabani bohle

ba sitiloe ho itoanela.

₇Eare ha u khalemela,

uena Molimo oa Jakobo,

likariki le lipere tsa ntoa tsa fetoha,

tsa fetoha liemahale.

₈Uena, ua tšabeha!

Ke mang

ea ka emang kapele ho uena,

a ema teng ha u halefile?

₉U lihile kahlōlo u le leholimong,

lefatše la tšoha, la khutsa,

₁₀ha Molimo a ema ho ahlōla bohle,

le ho pholosa bohle,

bohle ba eisehang ba lefatše.

₁₁Khalefo ea batho

e tla u fetohela thoriso,

ba phonyohileng khalefo ea hao

ba tla u etsetsa mekete.

₁₂Etsang likano,

le li etsetse Morena Molimo oa lōna,

le be le li phethe;

lichaba tsohle tse ka mathōko

li nyehelle Ea Tšajoang,

₁₃eena ea felisang boikhōhōmōso,

boikhōhōmōso ba mahosana,

eena ea tšajoang

ke likhosi tsa lefatše.