Ho hlolohela ntlo ea Molimo
1Pesalema ea bara ba Kora. Taelo ho motsamaisi oa libini: E binoe ka setolotolo.
2Meaho ea hao e rateha hakaakang,
uena Morena oa mabōtho!
3Moea oa ka o motela ke ho hlolohela
mabala a ntlo ea Morena;
pelo ea ka le 'mele oa ka
li etsetsa Molimo ea phelang litlatse.
4Esitana le serobele
se iphumanela leaho,
le lefokotsane le iphumanela sehlaha,
moo le beang malinyane a lona teng,
haufi le lialetare tsa hao,
uena, Morena oa mabōtho,
khosi ea ka, le Molimo oa ka.
5Ho lehlohonolo
ba phelang tlung ea hao,
ba sa khaotseng ho u rorisa.
6Ho lehlohonolo
batho bao uena u leng matla a bona,
ba thabelang maeto a ho ea rapela.
7Ha ba feta khohlong e omeletseng,
e fetoha liliba;
le eona pula ea selemo
e e apesa ka mahlohonolo.
8Ba ntse ba matlafala ho ea pele,
ha ba itlhahisa ho Molimo, Sione.
9Oho, Morena, Molimo oa mabōtho,
ak'u utloe thapelo ea ka,
u ntšekehele tsebe,
Molimo oa Jakobo.
10Molimo, uena thèbè ea rōna,
ak'u talime, u bone sefahleho,
fahleho sa motlotsuoa oa hao.
11Letsatsi le le leng
le hloloang mabaleng a hao,
le molemo ho feta a sekete
a hloloang hosele.
Ke rata ho ba monyako
oa ntlo ea Molimo oa ka,
ho e-na le ho phela
metlotloaneng ea ba khopo.
12Morena Molimo ke qhobosheane,
ke thèbè ea rōna,
o fana ka mohau le tlōtla;
ha ho letho le molemo
leo Morena a ka le timang
ba metsamao e hloekileng.
13Morena oa mabōtho,
ho lehlohonolo motho ea u tšepang.
