1Kamorao ho tsena ka utloa ho kang molumo oa letšoelehali le buang leholimong, le re:
“Haleluja!
Tlhōlo, le tlōtla, le matla
ke tsa Molimo oa rōna,
2hobane likahlōlo tsa hae
ke tsa 'nete, li lokile.
O ahlōtse seotsoa se seholo,
se sentseng lefatše
ka bootsoa ba sona,
'me a lefeletsa mali
a bahlanka ba hae ka sona.”
3Hape la re:
“Haleluja!
Mosi oa sona o fōqōha
kamehla le mehla.”
4Baholo ba mashome a mabeli a metso e mene, le libōpuoa tse 'ne tse phelang, ba itihela fatše, ba khumamela Molimo ea lutseng teroneng, ba re:
“Amen, Haleluja!”
Mokete oa lenyalo la Konyana
5Joale teroneng ha tsoa lentsoe le reng:
“Rorisang Molimo oa rōna, ōna bahlanka bohle ba hae,
le lōna ba mo tšabang,
ba banyenyane le ba baholo.”
6Ka boela ka utloa ho kang molumo oa letšoelehali, ho kang molumo oa metsi a leoatle, le ho kang molumo oa letōlō le matla, ho re:
“Haleluja!
Oa busa Morena,
Molimo oa rōna ea matla 'ohle.
7A re thabeng, re nyakalleng,
'me re mo tlotlise,
hobane ke letsatsi la mokete
oa lenyalo la Konyana.
Monyaluoa oa hae o itokisitse,
8o neiloe mose oa lesela le letle-letle,
le benyang, le hloekileng.
Lesela lena le letle-letle
ke liketso tse lokileng
tsa bahalaleli.”
9Eaba lengeloi le re ho 'na: “Ngola. Ho lehlohonolo ba memetsoeng moketeng oa lijo oa lenyalo la Konyana.” La nt'o re: “Tsena ke lipolelo tsa Molimo tsa sebele.”
10Eaba ke itihela maotong a lona, ka re kea le khumamela, empa la re ho 'na: “Se etse joalo, hobane ke molekane oa hao oa bohlanka, le oa bana beno ba nang le bopaki ba Jesu. Khumamela Molimo. Bopaki ba Jesu ke moea oa boporofeta.”
Mopalami oa pere e tšoeu
11Joale ka bona leholimo le butsoe, ka ba ka bona pere e tšoeu, mopalami oa eona e le ea bitsoang Ea Tšepahalang, Oa 'Nete; o na le toka ha a ahlōla, leha a loana. 12Mahlo a hae a joaloka malakabe a mollo, hloohong o roetse mefapahlooho e mengata; o na le lebitso le ngotsoeng holim'a hae, leo ho seng ea le tsebang, haese eena feela. 13O apere seaparo se innoeng maling. Lebitso la hae ke Lentsoe la Molimo. 14Limphi tsa leholimo li ne li mo latetse, li palame lipere tse tšoeu, li apere masela a matle-matle, a masoeu, a hloekileng. 15Ka molomong oa hae ho tsoa sabole e bohale, eo a tlang ho hlatha lichaba ka eona. O tla li busa ka lere la tšepe, a hatikele setlhōtlelo sa veine ea khalefo e tukang ea Molimo ea matla 'ohle. 16Holim'a seaparo sa hae, le holim'a serope sa hae, ho ngotsoe lebitso lena: “Khosi ea likhosi, le Morena oa marena.”
17Eaba ke bona lengeloi le eme har'a letsatsi. Ka lentsoe le phahameng la hōoeletsa linonyana tsohle tse fofang holimo-limo, sebakeng, la re: “Tloong, le phuthehele moketeng o moholo oa lijo oa Molimo, 18le tle le je linama tsa likhosi, le tsa balaoli, le tsa linatla; linama tsa lipere le tsa bapalami ba tsona; linama tsa batho bohle, tsa makhoba le tsa balokolohi, tsa ba banyenyane le tsa ba baholo.”
19Joale ka bona sebatana, le likhosi tsa lefatše, le limphi tsa tsona, li phuthehetse ho loantša mopalami oa pere le limphi tsa hae. 20Sebatana sa tšoaroa hammoho le moporofeta oa bohata, ea ileng a etsa mehlolo kapele ho sona, 'me ka eona a khelosa ba neng ba e-na le letšoao la sebatana, ba ileng ba khumamela setšoantšo sa sona. Bobeli ba bona ba akheloa letšeng le tukang mollo oa sebabole ba ntse ba phela. 21Ba setseng ba bolaoa ke sabole e tsoang ka molomong oa mopalami oa pere, 'me linonyana tsohle tsa khōra linama tsa bona.
